Երևանի հրաձգության մարզադպրոցում հանգստյան օրերին կայացավ աշխարհի քառակի չեմպիոն Զինաիդա Սիմոնյանի անվան հուշամրցաշարը: Ավանդական դարձած հուշամարցաշարն անցկացվում էր արդեն 8-րդ անգամ: Նախորդ տարի մրցաշարը չկայացավ կորոնավորուսի համավարակի պատճառով: Այս անգամ մրցաշարին մասնակցում էր շուրջ 80 մարզիկ՝ Երևանից և Գյումրիից: Մասնակիցները մրցում էին 3 մրցաձևում՝ հրացան, ատրճանակ և վազոթ թիրախ.
«Մրցաշարին մասնակցում են Հայաստանի ուժեղագույն մարզիկները: Այս տարի մասնակիցների թիվն անհամեմատ շատ է: Երբ նոր էր անցկացվում Զինաիդա Սիմոնյանի հուշամրցաշարը, ունենում էինք 40-50 մասնակից, իսկ այսօր թիվը հասնում է շուրջ 80-ի»-ասաց Հայաստանի հավաքականի գլխավոր մարզիչ Սեյրան Նիկողոսյանը:
Ռազմական նշանակություն ունեցող մարզաձևն ու դրանում առկա խնդիրները
«Անընդհատ կրկնում եմ, այս մարզաձևը ռազմական նշանակություն ունի: Թեկուզ գան մի քանի ամիս էլ մարզվեն ու գնան, դա մեզ պիտանի է, քանի որ մարդն արդեն ծանոթ կլինի հրաձգությանն ու անվտանգության կանոններին: Հրաձգությամբ այսօր զբաղվում են Երևանում ու Գյումրիում: Մի ժամանակ մարզվում էին նաև Վանաձորում, բայց դա էլ հիմա չի գործում: Կարող ենք ասել, որ հրաձգությունը մասսայական սպորտաձև չէ Հայաստանում»,-նշեց Նիկողոսյանը:
Այսօր Հայաստանում հրաձգությամբ զբաղվում է մոտ 300 մարդ: Գլխավոր մարզչի խոսքով զենքերի քանակը չի բավարարում նույնիսկ գործող մարզիկներին.
«Մարզիկը մարզվում է, զենքը թողնում է, հետո հաջորդն է գալիս նույն զենքով մարզվելու: Մեզ պետք է, որ ամեն մի մարզիկ ունենա անհատական զենք: Շատ քիչ է: Ֆեդերացիայի նախագահը ինչքան հնարավորություն ստեղծի, որ կարողանա զարգացնի: Մարզադպրոցը 2008-ին է կառուցվել ու միայն այդ ժամանակ ենք զենքեր ձեռք բերել: Հետո 2014-ին ենք գնել երկու հրացան ու մի ատրճանակ ու վերջ: Փամփուշտների ձեռքբերումը լինում է տարբեր տեղերից, մարզիչների, ֆեդերացիայի նախագահի անձնական միջոցներով և կապերով»-նշեց Նիկողոսյանը:
Առջևում Եվրոպայի առաջնությունն է, որը վարկանիշային է
Այս մրցաշարը Եվրոպայի առաջնությունից առաջ վերջինն է հայ մարզիկների համար: Մի քանի օրից հավաքական թիմը կմեկնի Խորվաթիա, որտեղ կկայանա Եվրոպայի առաջնությունը: Օլիմպիական խաղերի համար վարկանիշային Եվրոպայի առաջնությունից առաջ հայ հրաձիգները հենց Խորվաթիայում կանցկացնեն 10-օրյա ուսումնամարզական հավաք։
«Հուսով եմ ամեն ինչ նորմալ կլինի: Այստեղ մարզումները ուրիշ ցիկլով են գնում, իսկ հենց տեղում մարզվելը լրիվ այլ է: Հավաքի ժամանակ բոլորը կտրվում են առօրյա հոգսերից ու կենտրոնանում են միայն մարզումների վրա»,-ասաց հավաքականի գլխավոր մարզիչը:
Եվրոպայի առաջնությանը մասնակցելու է 7 մարզիկ՝ հրացան, ատրճանակ, և ստենդային հրաձգություն ձևում: Վերջինում հանդես է գալու լեգենդար Երջանիկ Ավետիսյանը: Հրացան ձևում Հայաստանը ներկայացնելու է պատանեկան Օլիմպիական խաղերի և աշխարհի երիտասարդների առաջնության արծաթե մեդալակիր, Ռիոյի Օլիմպիական խաղերի մասնակից Հրաչիկ Բաբայանը, ով Զինաիդա Սիմոնյանի անվան հուշամրցաշարում գրավեց միայն 3-րդ տեղը: Այս ձևում հաղթող ճանաչվեց Վրեժ Թորոսյանը, սակայն Բաբայանը ավելի բարձր ռեյտինգ ունի, այդ պատճառով հենց նա կմասնակցի ԵԱ-ին: Նրա խոսքով, Եվրոպայի առաջնությունից առաջ այս մրցաշարն իր համար փորձարարական բնույթ էր կրում.
«Եվրոպայի առաջնությունից առաջ տեխնիկական բաներ կան, որ փորձում եմ նմանատիպ մրցումների ժամանակ, որպեսզի հասկանամ, թե որն է ճիշտը: Դրա համար այս կարգի մրցումները միշտ օգտագործում եմ տեխնիկան կատարելագործելու համար: Մեկնելու ենք Խորվաթիա ու հավաք անցկացնենք, որից հետո մասնակցենք Եվրոպայի առաջնությանը: Բոլորս մարտական ենք տրամադրված: Իհարկե, պայքարելու եմ մեդալի համար, բայց կոնկրետ իմ նպատակն է Օլիմպիական խաղերի ուղեգիր նվաճելը»,-նշեց Հրաչիկ Բաբայանը:Հ
Հրացան ձևի՝ աղջիկների պայքարում լավագույնն էր Ալլա Պողոսյանը: Վերջինս նույնպես կմասնակցի Եվրոպայի առաջնությանն ու կպայքարի Օլիմպիական ուղեգրի համար.
«Եվրոպայի առաջնությունից առաջ մարզավիճակս լավ է: Ամեն ինչ անելու եմ ուղեգիր նվաճելու համար: Զինաիդա Սիմոնյանի հուշամրցաշարում ցույց տված արդյունքս այնքան էլ գոհացուցիչ չէր: Լարվածություն իհարկե կա, բայց աշխատում ենք ավելի լավ մարզվել, որ լարվածությունը չխանգարի»,-նշեց Պողոսյանը:
Հրաչիկ Բաբայանից ու Ալլա Պողոսյանից բացի ՕԽ-ի ուղեգրի համար պայքարելու են նաև Էլմիրա Կարապետյանը (ատրճանակ) և լեգենդար Երջանիկ Ավետիսյանը (ստենային հրաձգություն):
Մյուս 3 մարզիկները՝ Հայկ Բաբայանը, Մեսրոպ Սահակյանն ու Միլենա Պողոսյանը հանդես են գալու երիտասարդների մրցաշարում:
Զինաիդա Սիմոնյանի անվան մրցաշարում վազող թիրախ ձևում անգերազանցելի էր Եվրոպայի երիտասարդական առաջնության չեմպիոն Լիլիթ Մկրտչյանը: Ոչ օլիմպիական այս մրցաձևը ներառված չէ այս տարվա Եվրոպայի առաջնությունում:
Հավաքականի գլխավոր մարզիչը, խոսելով ԵԱ-ում սպասելիքների մասին, նշեց հետևյալը. «Օլիմպիական ուղեգրի համար վերջին պայքարն է: Բոլոր 4 մարզիկներից էլ սպասելիքներ կան: Ամեն մրցաձևում երկու ուղեգիր է խաղարկվելու, սակայն մասնակից շատ մարզիկներ կան, ովքեր արդեն ունեն Օլիմպիական ուղեգիր, հետևաբար մեր շանսերն ավելի մեծ են»,-ասաց Սեյրան Նիկողոսյանը:
Նշենք, որ Զինաիդա Սիմոնյանի անվան մրցաշարին ներկա էր նաև ՀԱՕԿ նախագահ Գագիկ Ծառուկյանը, ով Օլիմպիական բարձրագույն պատվո շքանշան շնորհեց ՀՀՖ նախագահ Արթուր Հովհաննիսյանին, ՀՀՖ նախագահն էլ ՀԱՕԿ նախագահին շնորհեց հրաձգությունը խորհրդանշող հուշանվեր և շնորհակալագիր։
Երվանդ ՀԱԿՈԲՅԱՆ