ԱԱ-2022-ի ընտրական փուլի երրորդ տուրում Սերբիայի հավաքականը հյուրընկալվելիս մրցել է Ադրբեջանի հետ ու 2-1 հաշվով հաղթանակ է տարել:
Հանդիպման հաշիվը խաղի 16-րդ րոպեին բացել է Սերբիայի ընտրանու հարձակվող Ալեքսանդր Միտրովիչը: Երկրորդ կեսում՝ 59-րդ րոպեին Էմին Մահմուդովը հավասարեցրել է հաշիվը՝ անվրեպ իրացնելով 11-մետրանոցը: Բայց 81-րդ րոպեին Միտրովիչը դուբլ է ձևակերպել ու հաղթանակ պարգևել իր թիմին:
Սերբիայի հավաքականը 7 միավոր է վաստակել ու գլխավորում է A խմբի մրցաշարային աղյուսակը: Ադրբեջանը 3 խաղից հետո ոչ մի միավոր չունի իր ակտիվում ու գտնվում է վերջին՝ 5-րդ տեղում: A խմբում նրանց մրցակիցներն են Պորտուգալիայի, Լյուքսեմբուրգի և Իռլանդիայի հավաքականները:
Օրվա մյուս խաղում Կիպրոսի հավաքականը սեփական հարկի տակ ընդունել է Սլովենիային ու նվազագույն հաշվով սենսացիոն հաղթանակ է տարել: Հանդիպման միակ գնդակը առաջին կեսի վերջնամասում խփել է Յոհանիս Պիտասը:
Կիպրոսն այս հաղթանակի շնորհիվ բարձրացել է H խմբի մրցաշարային աղյուսակի երկրորդ հորիզոնականը՝ 4 միավորով: Սլովենիան 3 միավորով 4-րդ տեղում է: Հիշեցնենք՝ Ռուսաստանի հավաքականը, որը երրորդ տուրի իր հանդիպումը դեռ չի անցկացրել, 6 միավորով գտնվում են առաջին տեղում:
