Մյունխենի «Բավարիայի» հարձակվող և «Ոսկե գնդակի» դափնեկիր Հարի Քեյնն արձագանքել է Մադրիդի «Ատլետիկոյի» գլխավոր մարզիչ Դիեգո Սիմեոնեի հաճոյախոսությանը։
Չեմպիոնների լիգայի լիգայի փուլի 4-րդ տուրի կենտրոնական հանդիպմանն ընդառաջ արգենտինացի մասնագետը հայտարարել էր, որ հիանում է անգլիացի ռմբարկուով, արժանի է համարում նրա նվաճած «Ոսկե գնդակը» և նրան օրինակելի կերպար է տեսնում մյուս ֆուտբոլիստների համար։
«Սիմեոնեն մեր ժամանակների լավագույն մարզիչներից մեկն է, և նրանից նման գնահատական լսելը մեծ պատիվ է ինձ համար։ «Ոսկե գնդակը» նվաճելուց հետո արձագանքները շատ բուռն էին։
Հավանաբար, իմ անցած ճանապարհը տարբերվում էր այս մրցանակին արժանացած մյուս ֆուտբոլիստների ուղուց, քանի որ այն լի էր բավականին բարդ պահերով։ Սակայն նպատակասլացության և քրտնաջան աշխատանքի շնորհիվ կարողացա հասնել նրան, ինչ ունեմ այսօր։
Վստահ եմ՝ խաղադաշտում Սիմեոնեն ամեն ինչ անելու է ինձ և մեր թիմին կանգնեցնելու համար։ Մեզ շատ ծանր դիմակայություն է սպասվում, բայց ես անչափ գնահատում եմ նրա ջերմ խոսքերը», — Քեյնի խոսքերն է մեջբերում իսպանական AS պարբերականը։
Հիշեցնենք, որ «Ատլետիկո» – «Բավարիա» հանդիպումը կկայանա այսօր՝ նոյեմբերի 3-ին, Մադրիդում։ Խաղի մեկնարկը՝ Երևանի ժամանակով 23:55-ին։
