Մարտի 18-ին նախատեսված VBET ՀՊԼ-ի 18-րդ տուրում Վանաձորի «Լոռին» խաղադաշտ դուրս եկավ, սակայն հրաժարվեց մասնակցել «Արարատի» հետ խաղին: Նույն օրը հայտնի դարձավ, որ ակումբը դադարեցնում է իր ելույթները Հայաստանի Պրեմիեր լիգայի ընթացիկ առաջնությունում: Պատճառն այն էր, որ նախորդ խաղում «Ալաշկերտը» 5 փոփոխություն է կատարել 4 դադարի ընթացքում, մինչդեռ ՖԻՖԱ-ի կանոններով՝ թույլատրվում է այդ փոփոխությունները կատարել երեք դադարով։ «Լոռին» դիմել էր ՀՖՖ-ին՝ պահանջելով տեխնիկական պարտություն գրանցել «Ալաշկերտին», սակայն ՀՖՖ-ից որևէ պատասխան չէր ստացել: Այս և այլ թեմաների շուրջ ArmSport-ը ծավալուն հարցազրույց է ունեցել վանաձորյան ակումբի հիմնադիր Թովմաս Գրիգորյանի հետ:
-Ե՞րբ էր կայացվել առաջնությունից հեռանալու որոշումը։
-Այդ որոշումը կայացրեցինք այս մարտի սկզբին։ Արդեն մեզ մոտ լարված իրավիճակ էր, երբ մենք անընդհատ քննարկում էինք «Ուրարտուի» խաղի հետ կապված միջադեպը, թե ինչու բողոքարկման կոմիտեն չի քննարկում մեր հարցը: Այս ամենին գումարվեց «Ալաշկերտի» հետ խաղի միջադեպը: Միջազգային մասնագետները մեզ ասում են, որ անգամ առանց մեր բողոքարկման՝ ֆեդերացիան պարտավոր էր պարտություն գրանցել «Ալաշկերտին»: Դրան գումարվեց ՀՖՖ-ի` «Ալաշկերտին» 100 մլն դրամ տալը, որը ֆեդերացիան գաղտնի է տվել, ինչպես նաև «Նոա»-«Լոռի» խաղի կողմնակալ մրցավարությունը: Այս 4 դեպքերը զուգադիպեցին, տեղի ունեցան մարտին, և արդեն մենք զգացինք, որ հայտնվել ենք անելանելի վիճակում, ու որևէ լուծում ու պայքարի ձև չի մնում, քան առաջնությունից դուրս գալը:
-Ի՞նչ 100 միլիոնի մասին է խոսքը: Կմանրամասնե՞ք:
-100 մլն-ի մասին կարող եմ ասել, որ գործկոմի անդամներից ոչ մեկ տեղյակ չէ: Ակումբներից «Արարատը» ՀՖՖ-ին դիմել է պաշտոնական նամակով, բայց մինչև այսօր պատասխան չի եղել: Թե ինչու է փոխանցվել այդ գումարը` կարող եք հարցնել ֆեդերացիայի նախագահին: Կարծում եմ՝ փոխառնություն կամ աջակցություն, դա կատարվածի հետևանքը չի փոխում, թե ինչ նպատակով են տվել:
Հայաստանի Պրեմիեր լիգայում կա 9 ակումբ, ինչո՞ւ է որոշվել միայն «Ալաշկերտին» տալ այդ գումարը: Ինչո՞ւ դա արվեց գաղտնի: Շատ ակումբներ ունեն դրա կարիքը: Ինչո՞ւ դա բացահայտեց նախաձեռնող խումբը: Սրանք հարցեր են, որ պետք է պատասխան գտնեն: Ինչո՞ւ դրա մասին տեղյակ չեն գործկոմը կամ հիմնադիր անդամները, կամ մյուս ակումբները: Այսինքն՝ ստացվում է՝ 100 մլն փոխանցվել է «Ալաշկերտին», բայց թե ինչու` չգիտենք: Մենք հետազոտություն ենք անցկացրել մեր ռեսուրսներով և բացահայտել ենք դա: Հիմա ես հարց եմ տալիս, եթե «Ալաշկերտին» 100 մլն տալիս է ֆեդերացիան` արդյոք նույն օպերայից չէ՞ «Ալաշկերտին» պարտություն չգրանցելն ու գումար տալը:
-Դուք երկար տարիներ եղել եք գործկոմի անդամ, նախկինում եղե՞լ են նման դեպքեր:
-Ես կարող եմ ասել, որ 17-18 տարի եղել եմ գործկոմի անդամ, եղել են նման դեպքեր, բայց բացառապես թափանցիկ` գործկոմի քննարկումով: Չակերտավոր «վատ» Հայրապետյանի կամ «վատ» Վանեցյանի ժամանակ չի եղել նման գաղտնի բան: Եղել է, որ գործկոմը քննարկել է ու համապատասխան որոշում է կայացրել: Գաղտնիությամբ` այն էլ ակումբներից, որը մրցակցում է մյուս ակումբի հետ, այդպիսի բան չի եղել: Չմոռանանք նաև, որ դեկտեմբերին «Ալաշկերտ-2»-ը ֆինանսական խնդիրների պատճառով դուրս է գալիս առաջնությունից, իսկ հունվարին ակումբը անում է ամենաթանկ ձեռքբերումը:
-Խոսեցիք նախաձեռնող խմբի մասին: Կմանրամասնե՞ք՝ ինչ է իրենից ներկայացնում նախաձեռնող խումբն ու ովքեր են անդամները:
-Դա ֆուտբոլային ընտանիքի մի հատվածն է, որը մեծամասնություն է կազմում, ու ովքեր ֆեդերացիայի ղեկավարման պրոցեսներից դժգոհ են, չեն տեսնում ֆուտբոլի զարգացումն այս ճանապարհով, որը տանում է ֆեդերացիան: Նախաձեռնող խումբը պայքարելու է, որպեսզի ֆուտբոլի շահառուների իրավունքները վերականգնվեն: Նախաձեռնող խումբը վերջերս Գյումրիում առանց ֆեդերացիայի անդամների ժողով է անցկացրել: Խմբի մեջ նույնիսկ կար այն տրամադրությունը, որ ծայրահեղ քայլերի գնայինք, հեռացնենք ֆեդերացիայի ղեկավարին, բայց իշխանական թևի և ֆուտբոլի մյուս շահառուների հետ տարբեր քննարկումներից հետո որոշեցինք թողնել վերջին երկխոսության տեղը: Մենք մեր պաշտոնական հաղորդագրության մեջ ասել ենք, որ ֆեդերացիան ակումբներին բաժանել է յուրայինների ու ոչ յուրայինների: Ոչ յուրայինների խումբը հենց նախաձեռնող խումբն է:
-Ֆուտբոլիստները ե՞րբ տեղեկացան, որ «Արարատի» հետ խաղը չի կայանալու:
-Մենք մինչև ամսի 16-ը, ժամը 18:00-ն հույս ունեինք, որ այդ խաղը կխաղանք, բայց ֆեդերացիան ու բողոքարկման կոմիտեն ոչինչ չարեցին: Խնդիրներն այնքան շատ են, որ ժամանակը չի բավականացնի դրանք թվարկելու համար: Նայեք՝ ինչ է կատարվում: ՀՖՖ-ի ներսում գոյություն ունի բողոքարկման կոմիտե, որը ենթադրում է լինել անկախ մարմին, որին ընտրում են հիմնադիր անդամները՝ որպես զսպող գործիք ֆեդերացիայի գործադիր իշխանությանը: Այսինքն, եթե ՀՖՖ-ի ղեկավարությունը որևէ որոշում կայացնի, բողոքարկման կոմիտեն այնքան պետք է անկախ լինի, որ վերջին ատյանով բեկանի այդ որոշումը, բայց այսօր բողոքարկման կոմիտեն ու նաև մյուս կոմիտեները բոլորը փոխկապակցված են, որը ՈՒԵՖԱ-ի ու ՖԻՖԱ-ի հիմնարար օրենքներով արգելված է: Օրինակ բերեմ. բողոքարկման կոմիտեում 2 հոգի «Ամերիա» բանկից է, որը իրավաբանական ծառայություն է մատուցում ֆեդերացիային, ու վճարվում են ՀՖՖ-ի կողմից, իսկ անդամներից մեկի ընտանիքի հետ անձնական մտերմություն ունի Մելիքբեկյանը: Բոլորի մասին կարող եմ մանրամասն ասել, ուղղակի կշեղվենք ու կմտնենք դետալների մեջ: Այ նման բաներ, որ տեսնում ես, անզոր ես լինում պայքարել: Շենքը ծուռ է սարքած, դա քանդվելու է: Ասում ենք՝ կանգ առեք, քննարկենք` առաջ գնանք: Արդեն դա էլ չի անցնում, ստիպված էինք այս քայլին գնալ:
-Ակումբը չէ՞ր կարող դիմել ՈՒԵՖԱ կամ ՖԻՖԱ այս խնդրով՝ նախքան նման որոշում կայացնելը։
-Հենց այս պահին մենք կարող ենք բողոքարկման կոմիտեի որոշումը բեկանել CAS-ով: Հասարակ էպիզոդ է: Ֆեդերացիան պետք է ֆիքսեր, բողոքարկման կոմիտեն պետք է ֆիքսեր՝ 3 դադար է եղել, թե 4, բայց ոչ մեկ դա չֆիքսեց: Այսինքն՝ ամեն այսպիսի հարցի համար պետք է դիմենք ՈՒԵՖԱ՞: Հենց հիմա ես հանդիպումներ եմ ունենում իրավաբանների հետ, ու մի քանի հարցերով դիմելու ենք CAS: Բողոքարկման կոմիտեին մենք օգոստոսին էինք դիմել «Ուրարտուի» հետ խաղը վերանայելու համար, բայց իրենք մեզ պատասխանել են 8 ամիս անց: Ասել են` կներեք, որ 8 ամիս հետո ենք քննում, քանի որ երկրում համավարակ է եղել ու պատերազմ: Այդ դեպքում «Լոռին» ինչպե՞ս կարողանար կարանտինի ընթացքում լեգիոներներ բերեր հասցներ, պատրաստվեր ու մասնակցեր այդ խաղին: Լեգիոներներին բերել էինք, բայց այդ ժամանակ օրենք կար, որ երկիր մտնողը 14 օր պետք է մեկուսանար: Այսինքն՝ մենք 40 հոգով պետք է 10 օրում կարանտինից դուրս գայինք, իսկ իրենք 8 ամսում 4 հոգով չկարողացան նիստ անել: Իրենց կարելի է: Այ նմանատիպ հարյուրավոր հարցեր կան, դրա համար արդարության սկզբունքը խախտված է, ու ելք չունենալով գնացել ենք ծանր, ոչ մարդկային քայլի:
-Ի՞նչ եք պահանջում դուք հիմա ֆեդերացիայից:
-Միակ որոշումը, որը մեր կողմից նախապայման է եղել, դա «Ալաշկերտին» պարտություն գրանցելն է, հատկապես այս 100 մլն-ի դեպքը բացահայտելուց հետո: Եթե դուք տեղյակ չեք, հիշեցնեմ, որ սա այն խաղն է, որը պետք է կայանար դեկտեմբերին, բայց որպեսզի «Ալաշկերտը» ֆինանսական տույժերի չենթարկվեր, մենք համաձայնեցինք խաղը հետաձգել: «Ալաշկերտը» պաշտոնական նամակով դիմել էր «Լոռի ՖԱ»-ին խաղը հետաձգելու համար, քանի որ «Ալաշկերտի» 5 ֆուտբոլիստներ օբյեկտիվ պատճառներով չէին կարողանալու մասնակցել տվյալ հանդիպմանը, և եթե մենք չհամաձայնեինք խաղը հետաձգել, Բագրատ Նավոյանը ֆինանսական կորուստներ կունենար կապված լեգիոներների տոմսերի հետ:
Դուք առաջնության ընթացքում տեսել եք՝ ով քանի խաղ ցանկացավ հետաձգել: Խաղ հետաձգելու խնդրանքով «Լոռին» դիմեց ՀՖՖ-ին ու պարտություն գրանցեցին: Այսինքն՝ ֆեդերացիայի ցանկացած որոշում կայացվում է ի վնաս «Լոռիի»: Կարող ենք ասել, որ գնում ենք CAS, բայց թիմն առաջնությունից հանած: Կխաղանք հաջորդ տարի Բարձրագո՞ւյն խմբում, թե՞ Առաջին խմբում, դա CAS-ի որոշումից հետո հայտնի կդառնա: Ես կարծում եմ, որ մեր ֆուտբոլային ընտանիքում մոտ ապագայում մեծ փոփոխություններ կլինեն: Կարծում եմ՝ հիմնադիր անդամները մեծամասնությամբ դեմ կքվեարկեն նախագահի վստահության հարցում: Վերջին հաշվով մենք մեր ֆուտբոլի կառույցի ղեկավար ենք ընտրել, որից նաև իրավունք ունենք հրաժարվելու:
-Ինչքանո՞վ կապ ունի ձեր որոշումը երկրում տիրող քաղաքական խառը իրավիճակի հետ:
-Ասեմ, որ մենք այս գործառույթը սկսել ենք նախորդ տարվա մարտից, երբ քաղաքական հանգիստ իրավիճակ էր: Նախաձեռնող խմբի անդամները` սկսած ինձնից, հանդիպումներ են ունեցել տարբեր քաղաքական գործիչների ու ֆեդերացիայի նախագահի հետ: Նախաձեռնող խմբի ղեկավար կազմով հանդիպումներ ենք ունեցել տարբեր ֆորմատի։ Շահարկում են, որ քաղաքական իրավիճակը խառնվել է, մենք էլ առիթից ուզում ենք օգտվել: Ոչ, այդպիսի բան չկա, և ես շատ ուրախ եմ, որ Արմեն Մելիքբեկյանն իր խոսքի մեջ նշեց, որ օգոստոսին էլ են շատ ակտիվացել, այսինքն՝ մենք շատ ենք ակտիվացել: Դրանից առաջ էլ ես ասացի, որ նախորդ տարվա մարտին անընդհատ դժգոհություններ ենք ունեցել: Սկզբից առաջարկում էինք մոդել, տարբեր քննարկումներ են եղել, և փառք Աստծո, որ այդ քննարկումները եղել են այս իրավիճակից առաջ: Եվ դա ֆիքսվում է նաև իրենց կողմից: Մենք ապաքաղաքական կառույց ենք, ու մենք խնդրում ենք մեզ չքաղաքականացնել: Անգլիացիները լավ խոսք ունեն` մենք չենք զբաղվի քաղաքականությամբ այնքան, ինչքան դուք չեք զբաղվի մեզանով: Թողեք ֆուտբոլային ընտանիքն իր որոշումները կայացնի: Ֆուտբոլի զարգացման կարևոր նախապայմաններից է, որպեսզի ֆուտբոլի ընտանիքն ընտրություն կատարի: Մենք բազում փորձեր ունենք` քաղաքական որոշումները ֆուտբոլում միշտ չարիք են եղել:
-ՀՖՖ նախագահն իր հայտարարության մեջ ասում էր, որ ունեն փաստեր, որ տարբեր ուժեր մշտապես ցանկանում են լարվածություն և սկանդալային իրավիճակի իմիտացիա ստեղծել ազգային հավաքականի յուրաքանչյուր հավաքից առաջ։ Ազգային հավաքականի խաղերը որևէ կապ ունե՞ն այս իրավիճակի հետ։
-Ինքը շեշտել էր, որ օգոստոսին ու նաև մարտին հավաքից առաջ ակտիվացել ենք և այլն, և այլն: Կասեմ, որ պետք չէ թաքնվել հավաքականի հետևում: Եթե մենք չճանաչեինք Մելիքբեկյանին, կմտածեինք, որ ինքը հավաքականի կամ գլխավոր մարզիչն է, կամ ադմինիստրատորը: ՀՖՖ նախագահի գործառույթների մեջ մտնում է և՛ հավուր պատշաճի ներկայացնել տարբեր տարիքային հավաքականները, և՛ ակումբային ֆուտբոլը ղեկավարել: Այսինքն՝ անխոս, Հայաստանի ազգային հավաքականը բոլորիս համար ամենա-ամենան է, և բոլորս ուրախանում ենք հավաքականի հաղթանակով: Բայց դրանով պաշտպանվել` հարիր չէ նորմալ մարդուն:
-Բազմիցս նշել եք, որ ՀՖՖ-ն ընդգծված արհամարհական վերաբերմունք ունի «Լոռիի» նկատմամբ․ Ձեր կարծիքով՝ ինչո՞վ է պայմանավորված այդ վերաբերմունքը։
-Իսկ եթե ես ձեզ հարցնե՞մ: Դուք չե՞ք նկատել դա: Ես 4 օրինակ բերեցի: Ինձ թվում է՝ ինքնախաբեության վախեր կան: Ես չեմ կարող ասել՝ ինչից է եկել այդ վերաբերմունքը` չնայած որ շատ եմ մտածել այդ մասին: Կամ նենգություն է, կամ վախի հետևանք: Ես անձամբ Մելիքբեկյանին ասել եմ, որ փակում եմ ընտրությունների էջը, որն ամբողջությամբ կեղծիք էր, բայց հանուն հայկական ֆուտբոլի եմ փակում: Տա Աստված՝ ես սխալվեմ, դու լավ նախագահ դառնաս: Ասել եմ սա Մելիքբեկյանին, բայց թե իրենք ինչու չեն փակում, դա հանելուկ է ինձ համար: Կամ նենգ են, կամ վախեր ունեն, բայց չգիտեմ ինչից է դա սկիզբ առել: Կարող եմ ասել, որ ընտրություններից հետո որևէ դրական կամ վիճելի հարցում «Լոռիի» օգտին որոշում չի կայացվել:
-Արդյոք սա լավագույն տարբերա՞կն էր ակումբի համար։ Հնարավո՞ր է՝ շարունակեք ելույթներն առաջնությունում:
-Ես ասում եմ, որ ինձ համար շատ ցավալի է այս ամենը, բայց անելանելի վիճակում եմ, լուծում չունեմ ու չեմ գտնում այլ լուծում, ուրիշ քայլ չկար, եթե մեկը հուշեր այլ քայլ, որի ճշտությունը համոզիչ լիներ, ես կգնայի դրան: Ամբողջ թիմը` մեծ տղաներ են, բոլորը լացում էին: Դա մարդկային չէ: Ես հանդիպել եմ ֆուտբոլիստների հետ, բոլորը թասիբով տղաներ են, խաղադաշտում կռիվ տվող: Ամենաքիչ միջոցներով ու ամենաբարձր նպատակների գնացող թիմն է: Դրա մեջ կա լուրջ մենեջմենթ, կա հոգեբանական ճիշտ ներարկում, որը արել ենք այդ մարդկանց մեջ, և այսօր ասել, որ մենք ի զորու չենք պայքարել այս անօրինականությունների դեմ, շատ դժվար է: Իհարկե, հնարավոր չէ շարունակել, քանի որ մեր պայմանը նորից եմ կրկնում «Ալաշկերտին» պարտություն գրանցելն է ու այդ 3 միավորից զրկելը: Դա նույն օպերայից է: Ձեզ հարց տվե՞լ եք՝ ինչու մրցավար Հենրիկ Նալբանդյանի սպասարկումից հետո «Գանձասարը» գնաց առաջնությունից, հիմա «Լոռի»-«Նոա» խաղից հետո, որը նորից Նալբանդյանն էր սպասարկում, «Լոռին» հեռացավ: Սա զուգադիպությո՞ւն էր, թե՞ օրինաչափություն:
-Իսկ ի՞նչ եք մտածում Դուք այս հարցի վերաբերյալ:
-Անկեղծ ասած՝ չգիտեմ, ես ավելին՝ կակնկալեի, որ լրագրողներն ավելի խորը վերլուծեին այս ամենը: Ասում եմ՝ ո՞նց կարող է միտում չլինել: Եթե տեսականորեն այս 3 վիճելի խաղերի միավորները գումարենք, հիմա առաջին տեղում կլինեինք: Ո՞նց կարող է առաջին տեղի թիմը երբևէ 11-մետրանոցի իրավունք ստացած չլինի: Մեր ամբողջ թիմը տեսել էր Նալբանդյան Հենրիկին ու ասել, որ այսօր պարտվելու ենք, ու այդպես էլ եղավ: «Նոայի» մարզիչը մտնում է խաղադաշտ ու դեղին չի ստանում: Դա ուղիղ կարմիր քարտ է: Դրանից երկու րոպե հետո էլ մեր դարպասին 11-մետրանոց է նշանակում: Դրանից հետո ո՞նց կարող ենք հավաքել թիմին:
-Ֆեյսբուքում նորության հրապարակումից հետո արձագանքների մոնիտորինգը ցույց տվեց, որ ձեր որոշումը ֆուտբոլասերների մեծամասնությունը քննդատում է և արդարացված չի համարում։ Ասում էին, որ ֆինանսակական խնդիրներ կային ու ինչ-որ պատճառ էր պետք առաջնությունից դուրս գալու համար: Ակումբում ֆինանսական խնդիրներ կայի՞ն։
-Ասեմ, որ եղել են ֆինանսական խնդիրներ, և դա բարձրաձայնել ենք անցյալ տարի: Մարտի 15-ի դրությամբ որևէ ֆուտբոլիստի պարտք չենք ունեցել: Ես կարծում եմ՝ մյուս ակումբների մեջ քիչ կլինեն, որ խնդիրներ չունենան: Կրկնում եմ, մարտի 15-ի դրությամբ որևէ մեկի հանդեպ ոչ մի պարտք չենք ունեցել: Բայց մյուս կողմից նայենք հարցին: Ենթադրենք՝ ունեցել ենք պարտքեր: Ինչո՞ւ պետք է ՀՖՖ-ն գումարով օգնի «Ալաշկերտին», իսկ մյուսներին` ոչ: Կարծում եմ՝ հենց ֆեյքերն են այդ լուրերը տարածում: Այդպիսի բաներ կասեր միայն անգրագետ մարդը, քանի որ ձմեռային տրանսֆերային պատուհանի ընթացքում մենք շատ տրանսֆերներ ենք արել ու մեծ գումարներ ենք ծախսել: Եթե 7 ամիս ծախսել ենք, ու մնացել է ընդամենը 2 ամիս, այդ ընթացքում մենք չպե՞տք է գումար ծախսեինք: Սա անգրագիտություն է:
-Դուք մրցաշարային աղյուսակում զբաղեցնում եք 3-րդ տեղը, արդյոք հետագա խաղերին ձեր հաջողությունների շանսերն այնքան էին նվազել, որ կարծում եք Բողոքարկման կոմիտեի որոշումները բեկումնային ազդեցությո՞ւն կունենային ձեր զբաղեցրած տեղի տատանման վրա։
-Մենք վստահ էինք, որ եթե մեզ չխանգարեին, մենք չեմպիոն կդառնայինք կամ չեմպիոնության գլխավոր հավակնորդը կլինեինք: Տրանսֆերային պատուհանի ընթացքում ֆանտաստիկ ձեռքբերումներ ենք ունեցել, իսկ այդ ձեռքբերումներից դեռ երկու հոգին էին խաղադաշտ դուրս եկել, և մենք պլանավորած տակտիկական քայլեր ունեինք, որոնք դեռ չէինք իրականացրել: Չեն թողնում, հասկանո՞ւմ եք: Չեն թողնում ու վերջ: Ես վստահ եմ, որ առաջնությունն էլի ավարտելու էինք 5-րդ տեղում: Ֆուտբոլի գլխավոր կանոնը արդար խաղի կանոններն են: Եթե մենք չկարողացանք արդարությունը վերականգնել, այսինքն՝ ճիշտ վերակազմավորել ՀՖՖ-ն իր կոմիտեով, գործիքակազմով, վստահ եմ, որ «Լոռիի» ճանապարհով գնացող թիմեր կլինեն: Իսկ ես վստահ եմ, ոչ թե ենթադրյալ, այլ տեղյակ եմ իմ ունեցած խոսակցություններից, որոնք չուզեցան հիմա գնալ այդ քայլին, քանի որ առաջնության ավարտին մնացել է 2 ամիս։
-Նշեցիք, որ եղել են ֆինանսական խնդիրներ: Կմանրամասնե՞ք:
-Իմ ասած խնդիրները եղել են աշխատավարձերի մի քանի օրվա ուշացում: Կարևորը ֆիքսենք՝ «Ալաշկերտի» հետ խաղից մեկ օր առաջ մենք որևէ պարտք չենք ունեցել: Ես նկատել եմ ուրիշ բան, որ բարձրաստիճան պաշտոնյաներ կան նույնիսկ, որ ասում են, իբրև ինձ խնդրել են, որ այս խառը իրավիճակում ես թիմը հանեմ առաջնությունից, որպեսզի ամեն ինչ ավելի խառնեմ: Պաշտոնապես ասում եմ՝ Հայաստանում, աշխարհում, չկա որևէ մեկը, որ կարողանար ինձ ասել՝ «Լոռիին» հանեք առաջնությունից: Չկա այդպիսի բան: Լոռու թե’ մարզը, թե’ ակումբը ինձ համար սրբության նման է: Բամբասանքների մակարդակով ինչ ասես՝ կարող է լինել: Կրկնում եմ՝ այս տարի ֆինանսական ծանր տարի է եղել, բայց բոլոր հարցերը լուծվել են: Ակումբներ են եղել, որ ամիսներով չեն վճարել աշխատավարձ, ինչի՞ իրենց մասին չեն խոսում:
-Հնարավո՞ր է, որ ակումբը լուծարվի։
-Ոչ, մենք ունենք 30 երեխա, որոնք ներկայացնում են տարբեր հավաքական թիմեր: Մենք կշարունակենք մեր աշխատանքը, կգնանք մեր նպատակին, դա է` հեռացնել ՀՖՖ նախագահին իր պաշտոնից, հակառակ դեպքում՝ մենք մայիսին կունենանք «Լոռիի» ճանապարհով գնացող ևս մի քանի ակումբ: Դա լինելու է իրավական, օրենքի ճանապարհով: Վերջին հաշվով մենք ՀՖՖ նախագահ չենք կարգում, մենք ընտրում ենք:
-Ի վերջո, ինչի՞ց սկսվեց «Լոռի»-Ֆեդերացիա լարումը:
-Վստահեցնում եմ, որ լարում մեր կողմից երբևէ չի եղել: Ընտրություններից հետո ավելի լարվեց իրավիճակը, բայց կրկնում եմ՝ մենք մեր կողմից, բազում գործիքակազմ ունենալով հանդերձ, որևէ բան չարեցինք այդ ընտրությունների օրինականությունը կասկածի տակ դնելու՝ չնայած նրան, որ ունեինք բազում գործիքակազմ: Դրանից հետո գոնե իրենք մեզանից շնորհակալ լինեն, սկսեցին քայլեր կատարել: Ասեմ ավելին, այս քանի օր է՝ ինձ մոտ մարդիկ են գալիս, նույնիսկ իրենց կողմից, ասում են՝ չարժե այսպես անել, բերեք ընդհանուր խոսենք և այլն: Գալիս, ասում են` գիտեք Մելիքբեկյանը լավ մարդ է, ինքը ձեր հանդեպ հարգալից է, բոլորը Նիկողոսյան Արմենն է սարքում: Մենք հոգնել ենք այսպիսի բաներից: Մեզ չի հետաքրրքում, թե ով է սարքում: Ով սարքում է, չի սարքում, վստահ եմ, որ այդ մարդիկ, հանրային ու փողոցային պարսավանքի են ենթարկվելու, ու դա է լինելու իրենց համար ամենադաժանը: Ամբողջ մի մարզում վերացնել ֆուտբոլը իրենց նենգության, ամբիացիաների ու վախի պատճառով․ դա անպատիժ չի մնալու: Իրենք թե՛ իրավական դաշտում պատասխանելու հարցեր ունեն, թե՛ երկրպագուների բանակի առջև:
-Կհստակեցնե՞ք այս պահի ձեր պահանջը՝ ֆեդերացիայի նախագահի հրաժարակա՞նն է:
-Հրաժարականի մասին խոսք չկա, ես պարզապես փակագծեր բացեցի, որ գնալու ենք այդ ճանապարհով: Այս պահին մեր պահանջն է ֆիքսել 3 դադա՞ր է եղել, թե՞ 4, ու պատժել «Ալաշկերտին»՝ տեխնիկական պարտությամբ: Կրկնում եմ՝ եթե դա այսօր լինի, մենք հենց վաղը կհայտարարենք առաջնությանը մասնակցելու մասին:
Երվանդ ՀԱԿՈԲՅԱՆ
