Ռեկորդներ, պատմական նվաճումներ, հիասթափություններ. Սա Չեմպիոնների Լիգան է

Ավարտվեց Չեմպիոնների լիգայի գավաթի խաղարկության խմբային փուլը: Խմբային փուլ, որը գրանցեց մի քանի պատմական ցուցանիշ: Առանձնացավ նրանով, որ ամենագոլառատն էր պատմության մեջ: Ակումբ, որը պարտվել էր մեկնարկային 3 խաղում, հավաքվեց ու դուրս եկավ խմբից: Ռոմանտիկ մի թիմ, որը գերել էր միլիոնավոր մարդկանց սրտեր, անսպասելիորեն դուրս մնաց հետագա պայքարից: Մի խոսքով՝ հերթական անգամ ՉԼ-ն ապացուցեց, որ ամենահեղինակավոր ակումբային առաջնություն կոչումը պատահական չէ:

Ամեն ինչի մասին հերթով.

A խմբում ի սկզբանե կար 2 ընդգծված առաջատար՝ «Ռեալն» ու ՊՍԺ-ն: Մնում էր պարզել, թե ով որ տեղով կավարտի խմբային փուլը: Ի վերջո, մեկնարկային մի քանի անհաջող խաղի պատճառով Զիդանի թիմը երկրորդ տեղը գրավեց, իսկ խմբում հաղթեց Տուխելի աստղային «Փարիզը»: Եվրոպա լիգայի ուղեգիր նվաճեց «Բրյուգեն», իսկ «Գալաթասարայը» հանգրվանեց 4-րդ հորիզոնականում:

B խմբում, կրկին, լուրջ պայքար չծավալվեց: «Բավարիան» ու «Տոտենհեմը» խմբում գրավեցին համապատասխանաբար առաջին ու երկրորդ տեղերը: «Օլիմպիակոսը» երրորդն էր, իսկ «Ցրվենա Զվեզդան»՝ 4-րդը: Այս խմբում «Բավարիայի» ու «Տոտենհեմի» դիմակայությունը ամենասպասվածներից մեկն էր, սակայան «Բավարիան» առաջին խաղում ստորացրեց Պոչետինոյի թիմին, իսկ երկրորդում՝ Մոուրինյոյի տղաներին: «Բավարիան պատմական ցուցանիշ գրանցեց: Մյունխենցիները 6 խաղում տարան նույնքան հաղթանակ, խփեցին 24 և ընդունեցին 5 գնդակ:  Սա լավագույն արդյունքն է Չեմպիոնների լիգայի խմբային փուլի պատմության մեջ:

C խմբում պայքարը հետաքրքիր էր այնքանով, որ կար միայն մեկ ընդգծված առաջատար՝ «Սիթին»: «Ատալանտան», «Շախտյորն» ու Զագրեբի «Դինամոն» պետք է պայքարեին երկրորդ ուղեգրի համար: Այդպես էլ եղավ: «Սիթին» 14 միավորով գրավեց առաջին տեղը, իսկ երկրորդ տեղի համար մինչև վերջին վայրկյանը պայքարեցին «Շախտյորն» ու «Ատալանտան»:  Ի վերջո, իտալական ակումբը սխրանք գործեց: «Ատալանտան» պարտվել էր մեկնարկային 3 խաղում, բայց հետո 3 խաղում տարավ 2 հաղթանակ ու խաղաց 1 ոչ-ոքի ու դուրս եկավ փլեյ-օֆֆ: «Շախտյորը», շատերի համար անսպաելի,  պայքարը կշարունակի Եվրոպա լիգայում:

D խմբում կար 2 առաջատար՝ «Ատլետիկոն» ու «Յուվենտուսը»: Հենց նրանք էլ տիրացան 2 ուղեգրին, իսկ Լևերկուզենի «Բայերը» 3-րդն էր ու կպայքարի Եվրոպա լիգայում: 4-րդ տեղը գրավեց Մոսկվայի «Լոկոմոտիվը»՝ չնայած բավական ակնահաճո ֆուտբոլին:

E խմբում «Նապոլին» ու «Լիվերպուլն» էին իշխում, թեև մինչև վերջին տուրը «Զալցբուրգը» տեսական շանսեր ուներ: «Լիվերպուլը»՝ առաջին, իսկ «Նապոլին»՝ երկրորդ տեղով նվաճեցին փլեյ-օֆֆի ուղեգիր, իսկ Հոլանդի «Զալցբուրգը» կխաղա հեղինակությամբ երկրորդ ակումբային մրցաշարում:

Մահվան՝ F խմբում ամեն ինչ սպավածի պես էր: Չնայած նրան, որ Վալվերդեն «Ինտերին» տվեց հաղթելու հնարավորություն, սակայն միլանյան թիմը չօգտվեց Մեսսիի ու Սուարեսի բացակայությունից ու պարտվեց, իսկ երկրորդ ուղեգիրը բաժին հասվ Դորտմունդի «Բորուսիային»: «Ինտերը» կխաղա Եվրոպա լիգայում:

G խմբից փլեյ-օֆֆ դուրս եկան «Լայպցիգն» ու «Լիոնը», իսկ «Բենֆիկան» ուղևորվեց Եվրոպա լիգա:

H խմբում պայքարն ամենահետաքրքիրներից էր. «Վալենսիա», «Այաքս», «Չելսի»: Հենց նրանք մինչև վերջին վայրկյանը պայքարեցին, ու արդյունքում «Այաքսը» դուրս մնաց պայքարից՝ շատերի համար անարդար՝ հիշելով «Չելսի»-«Այաքս» խաղը: «Վալենսիան» ու «Չելսին» դուրս եկան խմբից ու պայքարը կշարունակեն նոկաուտ փուլում:

Չեմպիոնների լիգայի այս խաղարկությունն առանձնացավ նաև նրանով, որ պատմության  մեջ առաջին անգամ փլեյ-օֆֆում են հայտնվել թիմեր՝ միայն թոփ-5 առաջնությունից:

Իհարկե, ցանկալի էր, որ պայքարը շարունակեին նաև «Այաքսն» ու «Ինտերը», բայց ֆուտբոլը գեղեցիկ է նաև հիասթափություններով:

Դեկտեմբերի 16-ին տեղի կունենա փլեյ-օֆֆի վիճակահանությունը: Մադրիդի «Ռեալը», «Ատլետիկոն», «Բորուսիան» ու «Չելսին» խմբից դուրս են եկել երկրորդ տեղով և նրանց հավանական մրցակիցները բավական զորեղ են։

Արմեն Գարամյան