«Ռեալը» Լա լիգայի 2019/20 թվականների խաղարկության չեմպիոնն է։ «Արքայական» ակումբը 34-րդ անգամ պատմության մեջ հաղթեց Իսպանիայի առաջնությունում։ Բացառիկ նվիրվածություն, անսպառ կիրք․ եկե՛ք հասկանանք, թե ինչպես Զիզուն ու իր ոսկե տղաները հաղթեցին Լա լիգան։
Երբ 2019-ի մարտին Զիդանը վերադարձավ, «Ռեալը» ծանրագույն վիճակում էր։ Մրցաշրջանը ամբողջությամբ տապալված էր, մադրիդյան թիմը դուրս էր մնացել ՉԼ-ից ու գավաթի խաղարկությունից։ Իսպանիայում չեմպիոնական մրցավազքն ավարտված էր։ Թիմի մթնոլորտը մտահոգիչ էր։ Զիդանը վերադարձավ թիմին վերադարձնելու այնտեղ, որտեղ այն պիտի լիներ։
Լա լիգան՝ առաջնահերթություն
Գաղտնիք չէ, որ Լա լիգան առաջնահերթություն էր Զիդանի համար այս տարի։ «Ռեալը» վերջին տարիներին շատ հազվադեպ է հաղթում Իսպանիայում։ Զիդանը հասկացնել էր տվել, որ նորմալ չէ, երբ օրինակ Լուկա Մոդրիչի պես ֆուտբոլիստը հաղթել է Պրիմերայում մեկ անգամ (արդեն երկու)։
Ամեն խաղը՝ որպես եզրափակիչ։ Հենց սա էր Զիդանի ու «արքայական» թիմի մարտավարությունը։ Դադարից առաջ ֆրանսիացի մասնագետը անգամ չեմպիոնության մասին զրույց էր ունեցել իր ֆուտբոլիստների հետ՝ բացատրելով, որ Լա լիգան հաղթելու համար պետք է ամեն խաղի մոտենալ որպես եզրափակիչ։ Ու հիմա՝ 1 ու կես ամիս անց, «Ռեալը» 10 անընդմեջ խաղերում հաղթելուց հետո հռչակվեց Իսպանիայի չեմպիոն։ Զիդանը հաղթանակից հետո ասաց, որ Լա լիգայում հաղթելն իրեն ավելի ուրախացրեց այս անգամ, քան Չեմպիոնների լիգայում հաղթելը։
Գրեթե նույն կազմը, բայց արդեն 2 տիտղոս
«Ռեալը» նախորդ ամառ մեծ ձեռքբերումներ կատարեց։ Առաջին հնչեղ անունը, իհարկե, Էդեն Ազարն էր։ Սակայն եկե՛ք չխաբենք իրար․ Ազարը այս չեմպիոնության մեջ մեծ ներդրում չունի։ Մեկ պարզ պատճառով։ Նա մրցաշրջանի մեծ մասը բաց թողեց կոճի վնասվածքի պատճառով։ «Ռեալի» նորեկներն ունեն իրենց լուման, սակայն թիմի կազմի հիմնական կորիզն այն նույն հնաբնակներն էին, որոնց գոլերն ու ցուցադրած խաղը բերեցին այս չեմպիոնությունը։
Հրաշագործ Զիդանն ու «Ռեալին» «սիրահարվածները»
Չեմպիոն հռչակվելուց հետո Զինեդին Զիդանի մասին գեղեցիկ խոսքեր ասաց Սերխիո Ռամոսը։
«Զիդանը այս ամենի բանալին է։ Մենք հավատում ենք նրան։ Մենք սիրում ենք Զիզուին։ Նա հրաշագործ է։ Նա ինչին դիպչում է, ոսկի է դառնում»։
Եվ իսկապես․ Զիդանը «Ռեալի» ղեկին 125 խաղում 11 տիտղոս է նվաճել։ Սա նշանակում է, որ միջինը 19 խաղում «Ռեալը» 1 տիտղոս է նվաճում։ Այս տրիումֆի գործում մեծ ավանդ ունեն «Ռեալի» բոլոր ֆուտբոլիստները, սակայն որոշներն, իհարկե, առանձնացան։ Առաջինը հենց Սերխիո Ռամոսն է։ «Ռեալի» լեգենդը ապացուցեց, որ սիրում է այս թիմը անսահման սիրով։ Նա մնալու է «Ռեալում» ու այստեղ է ավարտելու կարիերան, հաստատել է Ֆլորենտինո Պերեսը։
Առանձնահատուկ էր Կարիմ Բենզեմայի դերը, որը թիմի լավագույն ռմբարկուն է։ Կազեմիրո, Կրոս, Մոդրիչ, Կարվախալ․ հնաբնակներ, որոնք հերթական անգամ ապացուցեցին, որ բացառիկ նվիրվածություն ունեն թիմին ու միշտ ծարավ են հաղթելու։ Եվ իհարկե, Տիբո Կուրտուա։ «Ռեալի» դարպասապահը փակեց բոլոր քննադատների բերանը։ Նա թիմի գլխավոր հերոսներից մեկն է։
«Ռեալը» առանց Ռոնալդուի ուժեղ է Լիոնել Մեսսիի «Բարսելոնայից»։ Սա նախադասություն է, որի մասին հաստատ երազել է Պերեսը։ Ռոնալդուի հեռանալուց հետո «Ռեալը» նվաճում է 3-րդ տիտղոսը, բայց այս մեկը պարզապես անգին է։ Զիդանը վերադարձից հետո չբողոքեց նրանից, որ չունի կազմում Ռոնալդուի պես ֆուտբոլիստ, որը մեկ մրցաշրջանում խփում էր 50 գոլ։ Զիդանը գլուխը կախ աշխատեց այլ ուղղությամբ։ Ուժեղացրեց թիմի պաշտպանությունը՝ չմոռանալով հարձակման մասին։ Հենց դրա շնորհիվ «Ռեալը» այս Լա լիգայի ամենահուսալի թիմն է ու պաշտպանության գծում մի շարք ռեկորդներ է գրանցում։
Արժանի չեմպիոնություն
Հիմա արդեն բոլորը համոզված են, որ «Ռեալը» չեմպիոն դարձավ ոչ թե մրցավարների շնորհիվ, ոչ թե VAR-ի շնորհիվ, այլ լուռ աշխատանքի ու նվիրվածության շնորհիվ։ Սա պետք է ընդունել։ «Ռեալը» Իսպանիայի չեմպիոն է։ Չեմպիոնություն, որ անգին է «արքայական» թիմի համար։
Արամ Սահակյան
