«Արագած» ակումբը, որը ՀՖՖ-ի կողմից զրկվել է ՀՀ Առաջին խմբի 2019-2020 մրցաշրջանի առաջնության մասնակցությունից, ինչպես նաև 2 տարի ժամկետով արգելվել է «Արագած ՖԱ»-ի մասնակցությունը ՀՖՖ կողմից կազմակերպվող որևէ ֆուտբոլային առաջնությանը, դիմել է Հայաստանի ֆուտբոլի ֆեդերացիային՝ խնդրելով օրենքով սահմանված կարգով տրամադրել այդ որոշման համար հիմք հանդիսացող բոլոր նյութերը:
ՀՖՖ-ն պատասխանել է, որ շահագրգիռ անձինք կարող են ստանալ նյութերը` կցելով ֆեդերացիայի հաշվին 100.000 դրամ վճարման անդորրագիրը:
«Ինչպե՞ս է հնարավոր բողոքարկել վճիռները, եթե դրանց համար պարզապես նյութեր տրամադրելու համար վճար է հարկավոր»,- ասվում էր «Արագածի» տարածած հաղորդագրության մեջ:
ArmSport-ը դիմել է Հայաստանի ֆուտբոլի ֆեդերացիային՝ խնդրելով պարզաբանել, թե ի՞նչ հիմքով է նյութերի ստացման համար վճար սահմանվել և արդյոք սա կանոնակարգվա՞ծ է ՀՖՖ կանոնադրությամբ: ՀՖՖ-ից մեզ ուղարկված նամակով հայտնում են, որ բողոքարկման հիմքերը ստանալու համար վճարելու կարգը սահմանված է նաև ՈՒԵՖԱ-ի և ՖԻՖԱ-ի համապատասխան ընթացակարգերում:
«Հիմքերի համար վճարել չի նշանակում վճարել բողոքարկման համար: Շահագրգիռ կողմը վճարում է, որպեսզի ստանա այն հիմքերը/նյութերը, որոնց հիման վրա էլ ինքը հետո կարող է բողոքարկել այս կամ այն որոշումը:
ՀՖՖ-ի կողմից «Արագած ՖԱ»-ին ուղարկված նամակի մեջ, համաձայն ՀՖՖ և ակումբների միջև գործող ընթացակարգերի, նշված է նաև վճարման սահմանման հիմքը»,- ասվում է ֆեդերացիայի պատասխան նամակում:
Հիշեցնենք՝ ՀՖՖ-ի Կարգապահական կոմիտեի որոշման արդյունքում «Արագածի» նախագահ Հակոբ Ֆահրադյանին, ակումբի փաստացի սեփականատեր Ռոստիսլավ Կոզարին, գլխավոր մարզիչ Յուրի Օկուլին և ևս 5 ֆուտբոլիստի ցմահ արգելվել է զբաղվելու որևէ ֆուտբոլային գործունեությամբ: Եվս 5 ֆուտբոլիստ էլ տարբեր ժամկետներով որակազրկվել ու տուգանվել է:
