Կորոնավիրուսի համավարակով պայմանավորված սահմանափակումներից ելնելով՝ մարզիկները համատեղ պարապմունքներ անցկացնել չեն կարողանում։ Սա, գուցե, բարդ չէ, քանի դեռ առաջիկա մրցաշարերի ժամկետները հայտնի չեն։
Բռնցքամարտիկները օրացույց դեռ չունեն ու չգիտեն էլ՝ երբ կունենան։ Այս մասին ArmSport-ի հետ զրույցում ասաց Հայաստանի օլիմպիական հավաքականի գլխավոր մարզիչ Ռաֆայել Մեհրաբյանը։
Հավաքականի տղաները ցրված են մարզվում՝ 7 հոգի Ենգիբարյանի դպրոցում են պարապում, 3 հոգի Դինամոյում, 3 հոգի Աբովյանում, Վանաձորի, Գյումրիի տղաներն իրենց մոտ են պարապում։
«Չուզեցի բոլորին մի տեղ հավաքել, որ ապահով լինեն»,- բացատրում է Մեհրաբյանը։
Ասում է՝ շաբաթ-կիրակի օրերին հավաքվում են Հրազդանի ձորում ու միասին ֆիզիկական վարժություններ անում, իսկ շաբաթվա 5 օրը նրանք առանձին մարզվում են։
Վարկանիշային մրցումները ևս դադարեցվեցին, եթե մինչև դեկտեմբեր վերսկսվեն, հավաքականը հավաք կանցկացնի։ Իսկ հիմա, եթե նույնիսկ իրավիճակը երկար ձգվի, հավաքականի մարզիչը խնդիր չի տեսնում․
«Եթե իրավիճակը երկարի նույնիսկ, դժվարություն ես չեմ տեսնում, բոլորն էլ նորմալ մարզվում են, ինչ պլանավորված է, անում են։ Կասկած չունեմ, որ մի 2-3 ամիս առաջ կիմանանք օրացույցը երբ է լինելու ու նորմալ կմարզվենք»։
Միակ խոչընդոտը, ըստ Մեհրաբյանի, ֆեդերացիայի հարցն է․
«Ֆեդերացիայի նախագահը հրաժարվել է, բայց չգիտենք թեկնածուներից ով իրավունք ունի, ով չունի․․․այս ամենն անհասկանալի է։
Եթե մենք եվրոպական խաղերին այդպես հաջող մասնակցեցինք, դա Ազգային ֆեդերացիայի նախագահի ու մարզիչների աշխատանքի արդյունքն էր։ Ֆեդերացիայի նախագահ Հովհաննես Հովսեփյանը ոչ մի բան չխնայեց․․․տարվա մեջ այնքան հավաքներ ու մրցումներ արեց, որ մենք արդեն մի քանի ամիս առաջ պատրաստվում էինք եվրոպական խաղերին։ Իսկ հիմա անորոշ է»։
Ստելլա Բաբլոյան