Արգենտինացի հայտնի լրագրող Վերոնիկա Բրունատին հուզիչ հոդված է հրապարակել՝ շնորհակալություն հայտնելով Լիոնել Մեսսիին Արգենտինայի հավաքականից հեռանալուց հետո։
Նա վերհիշել է 2014 թվականի ողբերգությունը, երբ իր ամուսինը՝ լրագրող Խորխե «Էլ Տոպո» Լոպեսը, մահացավ ավտովթարից. ոստիկաններից փախչող հանցագործների մեքենան բախվել էր նրա տաքսիին։ Այդ ծանր օրերին հենց Մեսսին է օգնության ձեռք մեկնել վշտահար ընտանիքին։
«Ես մի քանի օր չէի գրում, բառեր չէի գտնում… Կյանքիս կեսը ես լուսաբանել եմ Արգենտինայի հավաքականի խաղերը Մեսսիի հետ միասին։ Նա մեզ համար ամեն ինչ էր՝ ոգեշնչում, հույս, բնավորության դաս։ Լեոյի որպես մարդու հեղինակությունը պարզապես հսկայական է»,- գրում է Բրունատին։
Նա պատմում է, որ ամուսնու մահից հետո Մեսսին իրեն հրավիրել է «Ժոան Գամպեր» մարզաբազա։
«Նա դիմավորեց ինձ, գրկեց ու հարցրեց. «Ի՞նչ կարող եմ անել քեզ, Ագուսի և Լուսիայի համար»։ Նա հիշում էր երեխաներիս անունները։ Ես ապշած էի ու չգիտեի՝ ինչ ասել։ Ի՞նչ կարող էի խնդրել Լիոնել Մեսսիից»։
Լեոն պնդել է, որ ցանկանում է անպայման օգնել, ինչին ի պատասխան լրագրողն ասել է.
«Պարզապես եղիր Լիոնել Մեսսի։ Երեխաներս ուրախանում են քեզ տեսնելով։ Նրանք հիմա շատ են լաց լինում, իսկ ես պարզապես ուզում եմ նորից տեսնել նրանց ժպիտը»։
Մեսսին հրաժարվել է բավարարվել միայն դրանով՝ խնդրելով, որ դժվարությունների դեպքում Վերոնիկան անպայման դիմի իրեն կամ ուղարկի ռեզյումեն իր հորը։
Բրունատին խոստովանում է, որ Մեսսին իրեն ուժ է տվել, երբ այն սպառվել էր, և ստիպել է միայնակ՝ երկու փոքրիկների հետ շրջել աշխարհով մեկ՝ լուսաբանելով հավաքականի խաղերը։
«Մեսսին արգենտինացի է, բայց երբեմն մտածում եմ, որ նրան պետք է հռչակել համաշխարհային ժառանգության օբյեկտ։ Անգամ եթե նա թողնի ֆուտբոլը, կա մի բան, որ ոչ ոք չի կարող խլել՝ այն երջանկությունը, որ նա պարգևել է մեզ, երեխաներիս, Էլ Տոպոյին և ինձ։ Գուցե դա է նրա գլխավոր ժառանգությունը. ոչ թե տիտղոսներն ու ռեկորդները, այլ՝ երջանկությունը»։
