Ֆուտբոլը՝ թվերով․ Անավարտ լիգայի հետքերով

Ֆրանսիայի Ֆուտբոլի ֆեդերացիան որոշում է կայացրել առժամկետ դադարեցնել առաջին և երկրորդ լիգաների առաջնությունները:

«Ֆեդերացիան հաշվի է առել վարչապետ Էդուար Ֆիլիպի հայտարարությունը։ Իշխանության կողմից ընդունված քայլերը թույլ չեն տալիս դիտարկել մրցաշրջանը վերսկսելու հնարավորությունը։ Ֆրանսիայի Ֆուտբոլի ֆեդերացիան Ֆրանսիայի Պրոֆեսիոնալ ֆուտբոլային լիգային (LFP) առաջարկում է հնարավորինս շուտ ամփոփել Լիգա 1-ի և Լիգա 2-ի մրցաշրջանի արդյունքները և 2020/21 մրցաշրջանում գործունեությունը վերսկսելու նախագիծ մշակել»,- ասվում է ֆեդերացիայի տարածած հաղորդագրության մեջ։

Մրցաշրջանի արդյունքների հնարավորինս շուտ ամփոփումը չուշացավ․ ակումբների մրցաշրջանի արդյունքները կորոշվեն մրցաշարային աղյուսակի ներկայիս դասավորվածությամբ: Սա նշանակում է, որ 2019/20 մրցաշրջանում Ֆրանսիայի չեմպիոն է հռչակվում ՊՍԺ-ն: Չեմպիոնների լիգայում, բացի փարիզցիներից, կխաղան նաև «Մարսելը» և «Ռենը», որոնք համապատասխանաբար զբաղեցրել են 2-րդ և 3-րդ տեղերը:

Եվրոպա լիգայում Ֆրանսիան կներկայացնեն «Լիլը» (4-րդ տեղ), «Ռեյմսը» (5-րդ) և «Նիցցան» (6-րդ): «Ամյենը» (19-րդ) և «Թուլուզը» (20-րդ) դուրս են մնում առաջնությունից և հաջորդ մրցաշրջանում կմեկնարկեն արդեն Լիգա 2-ում:

Արժե նաև նշել, որ «Լիոնը» (7-րդ տեղ) 1997 թվականից ի վեր առաջին անգամ կմնա առանց եվրագավաթների:

⚽ Ովքե՞ր են գոհ

Գոհ են համեմատաբար քիչ թվով ակումբներ։ Իհարկե, դժգոհելու առիթ չունի ՊՍԺ-ն, նույնը կարելի է ասել «Մարսելի» և «Ռենի» մասին, որոնք ավելի շատ մտածում էին լավագույն եռյակում տեղը պահպանելու մասին, քան թե փարիզեցիների հետ չեմպիոնական մրցավազքին մասնակցելու համար։ Քչերն էին կասկածում, որ ՊՍԺ-ն արժանի է չեմպիոնության՝ 12 միավորի առավելությունը քիչ չէ՝ դեռ չհաշված, որ Նեյմարն ու ընկերները մեկ հանդիպում էլ պակաս էին անցկացրել մոտակա մրցակիցներից։

Գոհ են նաև «Նիմը», «Դիժոնը», «Սենտ Էտյենը»․ ոչ ստաբիլ խաղ ցուցադրող այս թիմերից յուրաքանչյուրը 10 տուր հետո կարող էր հայտնվել «Ամյենի» տեղում։ «Թուլուզի» դեպքում «գոհ» կամ «դժգոհ» արտահայտությունները տեղին չեն լինի․ թիմն ակնհայտ հետնապահն էր այս մրցաշրջանում, սակայն, խոստովանեմ՝ ցավալի է, որ Ֆրանսիայի ամենամեծ քաղաքներից մեկը կզրկվի իր ներկայացուցչից Լիգա 1-ում։

Շատ գոհ են նաև Լիգա 2-ի ներկայացուցիչները՝ «Լորյանն» ու «Լանսը», որոնք մարզական տեսանկյունից դեռ չէին ապահովել իրենց մուտքը ֆրանսիական ակումբային էլիտա։ Նրանք ընդամենը հմապատասխանաբար 2 և 1 միավորով էին առաջ իրենց անմիջական հետապնդողներից։

Այո, այս դեպքում միանշանակ կարելի է ասել, որ մրցաշրջանի դադարեցումը հենց 28-րդ տուրում աշխատեց ի օգուտ այս դուետի։

⚽ Ովքե՞ր են դժգոհ

Իսկ ահա բացասկան էմոցիաներ վերապրող թիմերի քանակն ավելի շատ է։ Եվ դա վերաբերվում է հիմնականում եվրագավաթային տեղերի համար պայքարող թիմերին։ Մրցաշրջանի առաջին կեսը անհաջող մեկնարկած «Լիլը», մոտավորապես աշնան վերջից սկսած, բավականին լավ սկսեց հանդես գալ և ընդհուպ մոտեցավ լավագույն եռյակին։ Թիմն արդարացիորեն հավակնություններ ուներ 2020/21 մրցաշրջանում ՉԼ-ում հանդես գալու։ Ընդամենը 1 միավոր էր բաժանում «Լիլին» «Ռենից», և առաջիկա 10 տուրերի ընթացքում կարող էր ամեն ինչ փոխվել։ «Նիցցան» և «Ռեյմսը»․․․ նրանք, կարծում եմ, դժգոհողների խմբից չեն, ընդհակառակը, ինչ-որ տեղ պետք է գոհ լինեն, որ հայտնվել են եվրագավաթային գոտում։ Չնայած, տեսականորեն կարող էին պայքարել նաև լավագույն եռյակում հայտնվելու համար, սակայն այստեղ գլխավոր բառն է՝ «տեսականորեն»։

«Լիոն» ․․․ ահա թե ո՛ր թիմն է հավանաբար ամենից զայրացած Պրոֆեսիոնալ ֆուտբոլային լիգայի որոշումից։ Դեռ 10 տուր կար առջևում, իսկ «Լիոնը» ընդամենը մեկ միավորով էր ետ մնում եվրագավաթային 6-րդ տեղից։ Ինչ-որ տեղ անարդարացի էր նրանց համար, սակայն մյուս կողմից․․․ ոչ ոք մեղավոր չէ, որ նրանք բավականին անհաջող մեկնարկեցին այս մրցաշրջանում՝ միավորներ բաժանելով կարգով ավելի ցածր թիմերին։ Բայց մյուս կողմից էլ, մարզական տեսանկյունից, միևնույն է, ցանկալի կլիներ, որ բոլոր թիմերն իրենց եվրագավաթային ուղեգրերը ստանային խաղադաշտում, ոչ թե այսպիսի որոշումից հետո։ «Լիոնի» ճակատագիրը կիսում են նաև «Մոնակոն», «Մոնպելյեն», «Նանտը», «Բորդոն»․ նրանք բոլորն էլ շատ լավ հնարավորություն ունեին հաջորդ մրցաշրջանում մասնակցելու եվրագավաթներին։ Համենայն դեպս, այժմ ունենք այն, ինչ ունենք․․․

Վերևում խոսեցինք Լիգա 2-ի հաջողակների մասին՝ «Լորյանի» ու «Լանսի»։ 28 խաղից հետո նրանք վաստակել էին 54 և 53 միավոր։ Իսկ ահա նրանց հաջորդող «Այաչոն» իր ակտիվում ուներ 52 միավոր, «Տրոյան»՝ 51, «Կլերմոնը»՝ 50․ դադարեցվեր մրցաշրջանը մեկ տուր ուշ՝ այս տրիոյից յուրաքանչյուրը կարող էր «շահել» Լիգա 1-ում հանդես գալու իրավունք։

ArmSport-ի պատրաստած սկետչը՝ այս թեմայի առթիվ։

⚽ Թիմերի արդյունավետությունը

28 տուրերում անցկացված 279 հանդիպումներում գրանցվել է 704 գոլ՝ 2,5 գոլ մեկ խաղում։ Ամենաարդյունավետ թիմին գուշակելը դժվար չէ․ Ֆրանսիական լիգայի վերջին տարիների դոմինանտը՝ ՊՍԺ-ն, ամենաարդյուավետն է նաև Եվրոպայում։ 75 գոլ 27 խաղում․ ստացվում է միջինը 2,77 գոլից ավել յուրաքանչյուր խաղում։ Թիմի գլխավոր ռմբարկուն Կիլիան Մբապեն է, ով իր հաշվին ունի 18 խփած գնդակ, նրան հաջորդում են Նեյմարը (13 գոլ) և Մաուրո Իկարդին (12 գոլ)։ 43 գոլ 75-ից երեք ֆուտբոլիստների հաշվին․․․ ֆանտաստիկ է։

«Ռեյմսը» այս մրցաշրջանում բավականի հաջող է հանդես գալիս, իսկ պաշտպանությունում՝ լավագույններից մեկն է Եվրոպայում։ Ընդ որում, Ֆրանսիայի վեցակի չեմպիոնը (60 տարի առաջ) ավելի քիչ գնդակ է բաց թողել՝ 21, քան փարիզյան գրանդը՝ ՊՍԺ-ն, որը 24 գնդակ է ընդունել սեփական դարպասը։ Սակայն, ինչպես ասում են, մեդալն ունի երկու կողմ․ «Ռեյմսը» գրավել է մրցակիցների դարպասը 26 անգամ․ ավելի քիչ գնդակ խփել է միայն առաջնության հետնապահը՝ «Թուլուզը» (22):

Պարադոքսալ է՝ առաջնության ամենաանարդյունավետ թիմերից մեկը հանդես է գալու Եվրոպա լիգայում, իսկ առաջնության երկրորդ ու երրորդ արդյունավետ թիմերը՝ «Մոնակոն» (44 գոլ) ու «Լիոնը» (42), եվրագավաթներից դուրս մնացին։ Եվս մեկ ապացույց, որ կարևորը խփած գոլերի քանակը չէ, այլ արդյունքը։ Սակայն «Ռեյմսի» վերը նշված արդյունքը՝ կապված քիչ գնդակ բաց թողնելու հետ, ևս արժանի է գովասանքի։

⚽ Լիգա 1-ի 2019/20 մրցաշրջանի խորհրդանշական հավաքականը

France Football-ը ներկայացրել է Ֆրանսիայի առաջնության խորհրդանշական հավաքականը 2019/20 մրցաշրջանի համար՝ ֆուտբոլիստների միջին գնահատականով: Խորհրդանշական հավաքականում ընդգրկված էին ՊՍԺ-ի 5 խաղացողներ, 3-ը՝ «Ռենի», 2-ը՝ «Ռեյմսի» և մեկը «Մոնակոյի» խաղացող:

Լիգա 1-ի խորհրդանշական հավաքականը հետևյալն է.

Դարպասապահ ՝ Պրեդրագ Ռայկովիչ («Ռեյմս», միջին գնահատականը – 5,96)։
Պաշտպաններ ՝ Ամարի Տրաորե («Ռեն», 5.41), Տիագո Սիլվա (ՊՍԺ, 5.75), Յունես Աբդելհամիդ («Ռեյմս», 5.64), Ֆետու Քրիստիան Մաուսա («Ռեն», 5.59):
Կիսապաշտպաններ՝ Մարկո Վերատի (ՊՍԺ, 6), Էդուարդո Կամավինգա («Ռեն», 6.13), Անխել Դի Մարիա (ՊՍԺ, 6.17):
Հարձակվողներ ՝ Կիլիան Մբապե (ՊՍԺ, 6.35), Նեյմար (ՊՍԺ, 6.07), Վիսամ Բեն-Յեդեր («Մոնակո», 5.84):

⚽ Լիգա 1-ի լավագույն ֆուտբոլիստը

Ամենադժվարը լիգայի լավագույն ֆուտբոլիստին ընտրելն է։ Այստեղ բոլորիս կարծիքները կարող են տարբեր լինել։ Լավագույն ֆուտբոլիստի ընտրությունն իր մեջ ներառում է թե՛ օբյեկտիվ (վիճակագրություն, ցուցանիշ), թե՛ սուբյեկտիվ ասպեկտներ։ Լավագույնին ամենայն հավանականությամբ պետք է փնտրել ՊՍԺ-ի ճամբարում․ Նեյմարը վնասվածքի պատճառով բաց է թողել մրցաշրջանի կեսը՝ չնայած աչքի է ընկել 13 գոլով, Մբապեն և Իկարդին մասնակցել են ՊՍԺ-ի հանդիպումների մոտ 2/3-ին, իսկ ահա Դի Մարիան բաց է թողել ընդամենը մեկ հանդիպում։ Արգենտինացի կիսապաշտպանը լավագույն դիսպետչերն է Լիգա 1-ում՝ 14 գոլային փոխանցում․ այդ ցուցանիշով երկրորդ տեղում գտնվող Սլիմանին «Մոնակոյից» իր ակտիվում ունի 7 գոլային փոխանցում։ Շշմեցուցիչ տարբերություն է , համաձայնվեք։ Դի Մարիան իր հաշվին ունի նաև 8 խփած գնդակ, և գոլ+պաս համակարգով՝ որը կազմում է 22 միավոր (8+14), նա միայն զիջում է իր թիմակից Մբապեին` 18 գոլ+5 գոլային փոխանցում (18+5)։ Ո՞վ է Լիգա 1-ի մրցաշրջանի լավագույն ֆուտբոլիստը, միգուցե մեկ ա՞յլ խաղացող։ Առաջարկում ենք թողնել Ձեր կարծիքը մեկնաբանություններում։

⚽ Գլխավոր ռմբարկուները

Իսկ այստեղ արդեն երկիշխանություն է․ «Մոնակոյի» գոլահար Բեն Յեդերը և ՊՍԺ-ի առաջատարներից մեկը՝ Մբապեն, իրենց ակտիվում ունեն 18-ական գոլ։ Հավանաբար այս երկու խաղացողներին էլ կտրվի մրցաշրջանի ոսկե խաղակոշիկը։ Բավականին լավ մրցաշրջան անցկացրեցին նաև նիգերիացի հարձակվող Օսիմենը և առաջնության հայտնություն դարձած Դիալոն, ովքեր ներկայումս հայտնվել են ԱՊԼ-ի մի շարք ակումբների դիտակետում։