ԱՄՆ-ի Միլուոկի քաղաքում կայացած Real American Freestyle (RAF) լիգայի 11-րդ մրցաշարը հայ երկրպագուների համար առանձնացավ և՛ դրամատիկ հաղթանակով, և՛ անսպասելի պարտությամբ։ Գորգի վրա ուշադրության կենտրոնում էին Արման Ծառուկյանն ու Արսեն Հարությունյանը։
Մրցաշարի գլխավոր իրադարձությունը UFC-ի աստղեր Արման Ծառուկյանի և ամերիկացի Քոլբի Քովինգթոնի դիմակայությունն էր միջին քաշային կարգում։ Գոտեմարտն ուներ տիտղոսային կարգավիճակ․ վիճարկվում էր լիգայի պատմության մեջ առաջին Crossover Belt գոտին, որը նախատեսված է այլ մարզաձևերի այն ականավոր մարզիկների համար, ովքեր կանոնավոր կերպով հանդես են գալիս RAF ըմբշամարտի լիգայում:
Ցավոք, «ախալքալաքցին» չկարողացավ զարգացնել նախորդ շաբաթ Թբիլիսիում կայացած մրցաշարում ղազախ Կուատ Խամիտովի նկատմամբ տարած ջախջախիչ հաղթանակի (11։0) հաջողությունը։ Համառ և հավասար պայքարում 38-ամյա ամերիկացին կարողացավ զսպել հայ մարտիկի ճնշումն ու 5։3 հաշվով նվազագույն առավելության հասնել՝ դառնալով նորաստեղծ տիտղոսի առաջին դափնեկիրը։
Սա Ծառուկյանի առաջին պարտությունն էր RAF-ում՝ նախորդ 7 անընդմեջ հաղթանակներից հետո․ նրա վիճակագրությունն այժմ 7-1 է։ Անպարտելի Քովինգթոնը գրանցեց լիգայում իր 4-րդ անընդմեջ հաղթանակը։
Մինչդեռ ազատ ոճի ըմբշամարտի Եվրոպայի քառակի չեմպիոն և աշխարհի առաջնության քառակի բրոնզե մեդալակիր Արսեն Հարությունյանը իսկական սպորտային հրաշք արարեց։
26-ամյա հայ ըմբիշի մրցակիցը 19-ամյա ամերիկացի Բեն Դավինոն էր։ Գոտեմարտի ընթացքում Դավինոն վստահորեն առաջ էր անցել 5։0 հաշվով, սակայն Հարությունյանը ցուցաբերեց իսկական չեմպիոնական կամք։ Հավաքելով ուժերը՝ նա վերջին վայրկյաններին կարողացավ բեկել հանդիպման ընթացքն ու դրամատիկ և կամային հաղթանակ տոնել 6։5 հաշվով։
Հիշեցնենք, որ սա Արսենի երկրորդ անընդմեջ հաղթանակն էր RAF-ում՝ հունիսի 14-ին Կալեբ Սմիթի նկատմամբ տարած վստահ (14։4) նորամուտից հետո։
