Իսպանիայի ազգային հավաքականի գլխավոր մարզիչ Լուիս դե լա Ֆուենտեն իր հիացմունքն է հայտնել Արգենտինայի հավաքականի ավագ Լիոնել Մեսսիի՝ ԱԱ-2026-ում ցուցադրած փայլուն խաղի վերաբերյալ։
39-ամյա հարձակվողը Մունդիալ-2026-ի շրջանակներում անցկացրած 5 հանդիպումներում արդեն դարձել է 8 գոլի հեղինակ և ֆրանսիացի Կիլիան Մբապեի հետ կիսում է մրցաշարի լավագույն ռմբարկուների ցուցակի առաջին հորիզոնականը։ Ընդ որում, ի տարբերություն ֆրանսիացիների, արգենտինացիները դեռ չեն անցկացրել իրենց քառորդ եզրափակիչի հանդիպումը, ինչը Մեսսիին հնարավորություն է տալիս շրջանցել մրցակցին։
«Նա կարծես 19 կամ 23 տարեկան լինի և հանդես է գալիս բացառիկ բարձր մակարդակի վրա։ Բանը միայն նրա ֆուտբոլային հասունության մեջ չէ, այլ առաջին հերթին՝ խաղադաշտում ունեցած նվիրվածության: Նա անխոնջ է և երբեք չի բավարարվում ձեռք բերածով: Նրան միշտ ավելին է պետք՝ ամեն Աստծո օր: Նա իսկական օրինակ է իր բոլոր թիմակիցների համար», — իսպանացի մասնագետի խոսքերն է մեջբերում հայտնի ինսայդեր և լրագրող Ֆաբրիցիո Ռոմանոն:
Հիշեցնենք, որ ԱԱ-2026-ի 1/4 եզրափակիչում Արգենտինայի ազգային հավաքականը հուլիսի 12-ին կմրցի Շվեյցարիայի հետ, իսկ Լուիս դե լա Ֆուենտեի գլխավորած Իսպանիայի ընտրանին այսօր՝ ուրբաթ օրը, կիսաեզրափակիչի ուղեգրի համար կպայքարի Բելգիայի հավաքականի դեմ:
