Խորվաթիայի ազգային հավաքականի կիսապաշտպան և ավագ Լուկա Մոդրիչը քննադատել է տեսակրկնությունների համակարգի (VAR) աշխատանքը ԱԱ-2026-ի 1/16 եզրափակիչում Պորտուգալիայից կրած պարտությունից (1:2) հետո, ինչպես նաև անդրադարձել է իր ապագային:
Տորոնտոյում կայացած հանդիպման երկրորդ խաղակեսում արդարադատությունն իրականացնող նորվեգացի մրցավար Էսպեն Էսկոսը VAR-ի միջամտությունից հետո 11-մետրանոց նշանակեց խորվաթների դարպասին, որն անվրեպ իրացրեց Կրիշտիանու Ռոնալդուն: Իսկ ավելացված ժամանակում Յոշկո Գվարդիոլը հավասարեցրեց հաշիվը, սակայն մրցավարը չեղարկեց գոլը՝ խաղից դուրս վիճակի պատճառով․ VAR-ն արձանագրել էր, որ Իգոր Մատանովիչի հպումից հետո գնդակը հասել է խաղից դուրս վիճակում գտնվող Մարիո Պաշալիչին:
«Մրցավարն ասաց, որ Մատանովիչը դիպել է գնդակին, բայց մենք նայեցինք կրկնապատկերը՝ ոչ մի տեղ չի երևում, որ նա հպվել է դրան: Եթե նա չի դիպել գնդակին, ուրեմն դա խաղից դուրս վիճակ չէ,- Մոդրիչի խոսքերն է մեջբերում Jutarnji List-ը:- Այո, մենք ավելիին էինք արժանի։ Որոշ բաներ մեր օգտին չէին: Այդ 11-մետրանոցը… Եթե իրավիճակը հակառակը լիներ, VAR-ը երբեք չէր միջամտի։
Այն պետք է կիրառվի միայն ակնհայտ սխալի դեպքում։ Եթե դրվագը վիճելի է, պետք չէ խառնվել։ Դա 11-մետրանոց չէր. երկուսն էլ պայքարում էին, հրմշտում, ոչ ոք միտումնավոր չէր քաշում, պարզապես բռնել էին իրար և երկուսն էլ ընկնում էին։
VAR-ը հաճախ օգտագործվում է սխալ կամ ընտրողաբար՝ երբեմն հաշվի առնելով թիմի կարգավիճակը։ Նման դրվագները կոտրում են երիտասարդ ֆուտբոլիստներին: Բայց մենք կարող ենք հպարտանալ մեր խաղով, սա այն Խորվաթիան է, որին բոլորը ճանաչում և հարգում են»։
Անվանի ինսայդեր Ֆաբրիցիո Ռոմանոն էլ X-ի իր էջում ներկայացրել է լեգենդար կիսապաշտպանի պատասխանը կարիերան ավարտելու վերաբերյալ հարցին.
«Հիմա իմ ապագայի մասին խոսելու ժամանակը չէ… դուք շուտով ամեն ինչ կիմանաք»։
Հիշեցնենք, որ Մոդրիչի պայմանագիրը «Միլանի» հետ, որի կազմում նա հանդես էր գալիս 2025 թվականից, ավարտվել է 2026 թվականի հունիսի 30-ին: Ակումբից հեռանալու մասին դեռ պաշտոնապես չի հայտարարվել։ Խորվաթիայի հավաքականում, որտեղ նա նորամուտը նշել է տարիներ առաջ, անցկացրել է 202 հանդիպում և դարձել 29 գոլի հեղինակ։
