Ուրուգվայի ազգային հավաքականի չորս ֆուտբոլիստներ սեփական նախաձեռնությամբ հանդիպում են պահանջել թիմի գլխավոր մարզիչ Մարսելո Բիելսայի հետ:
Սերխիո Ռոչետը, Մանուել Ուգարտեն, Ռոդրիգո Բենտանկուրը և Ֆեդերիկո Վալվերդեն աշխարհի 2026 թվականի առաջնության H խմբի երրորդ տուրի՝ Իսպանիայի դեմ կայանալիք խաղից առաջ արգենտինացի մասնագետին հայտնել են ծանր մարզումների պատճառով առաջացած հյուծվածության մասին:
Որպես օրինակ՝ խաղացողները հիշել են 2025 թվականի նոյեմբերին ԱՄՆ-ի հավաքականի դեմ կայացած ընկերական հանդիպումից (1:5) առաջ անցկացված մարզումը՝ նշելով, որ ծանրաբեռնվածության պատճառով այդ խաղին մոտեցել էին լիովին ուժասպառ եղած։
Ֆուտբոլիստները նաև մարտավարական այլ մոտեցում են առաջարկել Բիելսային։ Նրանք ցանկացել են Իսպանիայի դեմ խաղալ ցածր բլոկով և հակագրոհներով։ Այս համակարգը, սակայն, խիստ տարբերվում է գլխավոր մարզչի որդեգրած փիլիսոփայությունից։
Չորս խաղացողների և մարզչի հանդիպումն ի վերջո վերածվել է թիմի ընդհանուր ժողովի։ Բիելսան 48 րոպե անընդմեջ խոսել է՝ ներկայացնելով ստեղծված իրավիճակի վերաբերյալ իր տեսլականը։
Մարզիչը ֆուտբոլիստներին հիշեցրել է ներքին կոնֆլիկտների նախկին դրվագները, այդ թվում՝ Լուիս Սուարեսի շուրջ ծագած վեճը, և նշել, որ այն ժամանակ ևս զգացել է, որ թիմը փորձում է իրեն հեռացնել պաշտոնից։ Նա նաև ընդգծել է, որ անձամբ է օգնել կերտել հավաքականի որոշ խաղացողների, մասնավորապես՝ Սեբաստիան Կասերեսի և Մաքսիմիլիանո Արաուխոյի կարիերան: Ինչ վերաբերում է մարտավարությանը, ապա Բիելսան կտրուկ է եղել՝ հայտարարելով, որ Ուրուգվայը խաղալու է իսպանական ոճով՝ անտեսելով ֆուտբոլիստների խնդրանքը:
Երբ 40 րոպե տևած ելույթից հետո մարզիչը դադար է վերցրել, որոշ խաղացողներ սկսել են հեռանալ։ Պաշտպան Խոսե Խիմենեսը փորձել է կանգնեցնել նրանց, սակայն նրա միջամտությունը բավարար չի եղել բոլորին պահելու համար։ Արդյունքում որոշ ֆուտբոլիստներ հեռացել են, իսկ մյուսները մնացել են մինչև վերջ, քանի դեռ Բիելսան չի ավարտել ժողովը։
Հիշեցնենք, որ Ուրուգվայ — Իսպանիա հանդիպումը կկայանա հունիսի 27-ին՝ Երևանի ժամանակով 04:00-ին։ Աշխարհի 2026 թվականի առաջնության նախորդ երկու խաղերում Ուրուգվայի ընտրանին ոչ-ոքի է խաղացել Սաուդյան Արաբիայի (1-1) և Կաբո-Վերդեի (2-2) հետ։
