59-ամյա Միուրան կխաղա ևս մեկ մրցաշրջան։ Կազույոշի Միուրան կանցկացնի իր 42-րդ մրցաշրջանը որպես պրոֆեսիոնալ ֆուտբոլիստ։
«Ֆուկուսիմա Յունայթեդը», որը հանդես է գալիս Ճապոնիայի երրորդ լիգայում հայտարարել է 59-ամյա ֆուտբոլիստի վարձակալության պայմանագրի երկարաձգման մասին․ Միուրայի տրանսֆերային իրավունքները պատկանում են «Յոկոհամա» ակումբին։
«Ես որոշել եմ երկարաձգել պայմանագիրս։ Ես կանեմ ամեն ինչ, որպեսզի օգնեմ «Ֆուկուսիմային» դուրս գալ բարձրագույն լիգա։ Այսպիսով, ես կշարունակեմ ֆուտբոլ խաղալ նույնիսկ 60 տարեկանում»,- ասել է Միուրան։
Պայմանագիրը ուժի մեջ է մինչև հաջորդ տարվա հունիսի 30-ը։ Անցյալ մրցաշրջանում Կազույոշին մասնակցել է վեց հանդիպման։
«Թագավոր Կաձյուն»՝ Միուրան, պրոֆեսիոնալ մակարդակով ֆուտբոլ է խաղացել 5 տարբեր տասնամյակներում՝ 1980-ականներին, 1990-ականներին, 2000-ականներին, 10-ականներին և 20-ականներին:
Ճապոնացի հարձակվողի տպավորիչ ուղին սկսվել է դեռևս 1986 թվականին։ Տասնամյակների ընթացքում նա հասցրել է խաղալ աշխարհի տարբեր մայրցամաքներում և հայտնի ակումբներում, որոնց թվում են բրազիլական «Սանտոսը», իտալական «Ջենոան», ավստրալական «Սիդնեյը», խորվաթական «Դինամո Զագրեբը»։
Իր հայրենիքում նա հանդես է եկել այնպիսի թիմերում, ինչպիսիք են «Վիսել Կոբեն», «Վերդի Կավասակին» և «Յոկոհաման»։
Ճապոնիայի ազգային հավաքականի կազմում Միուրան անցկացրել է 89 հանդիպում և դարձել 55 գոլի հեղինակ՝ մնալով երկրի ֆուտբոլային պատմության լեգենդներից մեկը։
