Երևանի Վազգեն Սարգսյանի անվան «Հանրապետական» ստադիոնում կայացած Հայաստան — Մոլդովա (1:1) ընկերական հանդիպումից հետո Հայաստանի ազգային հավաքականի եզրային հարձակվող Արթուր Սերոբյանը կիսվել է իր տպավորություններով։
22-ամյա ֆուտբոլիստը, որն այս խաղի 89-րդ րոպեին դարձավ գոլի հեղինակ և բացեց հաշիվը, խփեց իր առաջին գնդակը ազգային ընտրանու կազմում։
Անդրադառնալով խաղի արդյունքին ու ձեռքից բաց թողած հաղթանակին՝ Սերոբյանը նշել է.
«Շատ ուրախ եմ հավաքականի կազմում երկար սպասված առաջին գոլս հեղինակելու համար, սակայն միևնույն ժամանակ տխուր եմ, քանի որ չկարողացանք հաղթել։ Մենք իսկապես արժանի էինք այսօրվա հաղթանակին։ Ճիշտ է, բազմաթիվ գոլային պահեր ունեինք, որոնք պարտավոր էինք իրացնել, և, ցավոք, ոչ պարտադիր գոլ բաց թողեցինք։ Քանի որ սա ընկերական հանդիպում էր, պետք է համապատասխան դասեր քաղենք և առաջ շարժվենք»։
Հիշեցնենք, որ Եղիշե Մելիքյանի գլխավորած թիմը լարված պայքարում բավարարվեց ոչ-ոքի արդյունքով։ Թեև մեր ընտրանին երկրորդ խաղակեսում տիրում էր նախաձեռնությանը, և «Արարատ-Արմենիայի» ֆուտբոլիստների՝ Կամո Հովհաննիսյանի ու Արթուր Սերոբյանի արդյունավետ համագործակցության շնորհիվ առաջ անցավ հաշվի մեջ, հայ ֆուտբոլիստները չկարողացան պահպանել հաղթական արդյունքը։ Հանդիպման ավելացված ժամանակում մոլդովական «Պետրոկուբի» կիսապաշտպան Վիկտոր Բոգաչյուկը վերականգնեց հավասարությունը:
Օրեր առաջ՝ հունիսի 6-ին, մեր հավաքականը նույն՝ 1։1 հաշվով էր ավարտել նաև Ղազախստանի դեմ ընկերական հանդիպումը։
Ազգային հավաքականն իր հաջորդ պաշտոնական հանդիպումը կանցկացնի արդեն աշնանը. սեպտեմբերի 25-ին մեր թիմը Ազգերի լիգայի խաղարկության առաջին տուրի շրջանակներում սեփական հարկի տակ կընդունի Լատվիայի ընտրանուն:
