Եթե կա թիմ, որն այստեղ կարող է քամբեք անել, ապա դա Ռեալն է․ Արբելոա

Մադրիդի «Ռեալի» գլխավոր մարզիչ Ալվարո Արբելոան Մյունխենի «Բավարիայի» դեմ Չեմպիոնների լիգայի քառորդ եզրափակչի պատասխան հանդիպումից առաջ կիսվել է իր սպասելիքներով։ Իսպանացի մասնագետը ելույթ է ունեցել «Ալյանց Արենայի» մամուլի ասուլիսների սրահում՝ նշելով, որ թիմը պետք է բնավորություն ցուցաբերի։

«Մենք շատ մոտիվացված ենք, ինչպես և բոլոր մադրիդիստները։ Համոզված ենք, որ կարող ենք դա անել, և պատրաստ ենք մեծ հանդիպման։ Մենք Մադրիդի «Ռեալն» ենք։ Եթե կա մի թիմ, որը գալիս է այս մարզադաշտ՝ մտածելով, որ կարող է քամբեք գրանցել, ապա դա հենց մենք ենք։ Մենք թիմ ենք, որն ունի եվրոպական 15 գավաթ։ Ունենք հիանալի ֆուտբոլիստներ, շարք կվերադառնան նաև նրանք, ովքեր նախորդ խաղում անհասանելի էին։ Ոչ ոք չի կարող հաստատ կանխատեսել վաղվա արդյունքը, բայց մենք «Ռեալն» ենք և դաշտ դուրս կգանք հպարտությամբ ու հանուն մեր զինանշանի։

Մենք շատ տարբերակներ ու ֆուտբոլիստներ ունենք, որոնք կարող են խաղալ Չուամենիի դիրքում՝ Կամավինգան, Տիագոն, Սեբալյոսը, Վալվերդեն… Ընտրությունը մեծ է։ Ես արդեն որոշել եմ, թե որն է լինելու վաղվա մեկնարկային կազմը, և շատ եմ վստահում այդ տղաներին։ Նաև վստահում եմ պահեստայիններին, քանի որ սպասվում է երկար հանդիպում, և խաղը սկսող 11 ֆուտբոլիստները չեն լինի նույնը, ովքեր կավարտեն այն։ Ինձ արտոնյալ եմ զգում նման կազմ ունենալու համար։

Սա այնպիսի հանդիպում է, որտեղ մենք պետք է լինենք էմոցիոնալ, հոգեբանական, տակտիկական և ֆիզիկական բարձր մակարդակի վրա։ Պետք է ցուցադրենք անհատական և թիմային փայլուն ելույթ ու տանք մեր առավելագույնը։ Մենք մեծ թիմ ենք՝ բարձրակարգ խաղացողներով ու ամուր բնավորությամբ։ Հենց այսպես պետք է խաղանք նման մարզադաշտում՝ ուժեղ մրցակցի դեմ։ Նրանք զգում են իրենց երկրպագուների աջակցությունը՝ հավատալով, որ կարող են շրջանցել մեզ, իսկ մենք պետք է ցույց տանք, թե ով ենք մենք իրականում։

Չեմ կարծում, թե հրաշք գործելու կարիք ունենք։ Եթե նախորդ խաղում հաղթեինք, դա զարմանալի չէր լինի։ Նրանց դարպասապահն արժանացավ հանդիպման լավագույն խաղացողի մրցանակին, ինչը վկայում է այն մասին, թե որքան վտանգավոր պահեր մենք ունեինք։ Յուրաքանչյուր ոք, ով ճանաչում է «Ռեալը», չի կարծում, որ այստեղ հաղթելը հրաշք կլինի»,- իսպանացի մասնագետի խոսքն է մեջբերում «Ռեալի» պաշտոնական կայքը։