UFC-ի մարտիկ Արման Ծառուկյանը պատասխանել է այն հարցին, թե ով է ավելի ուժեղ՝ Խաբիբ Նուրմագոմեդո՞վը, թե՞ Իսլամ Մախաչևն իրենց լավագույն մարզավիճակում։
Բլոգեր N3on-ը հարցրել է Ծառուկյանին. «Ո՞վ է ավելի լավը՝ պի՞կում գտնվող Խաբիբը, թե՞ պիկում գտնվող Իսլամը»:
«Իսլամը։ Որովհետև նա ավելի բազմակողմանի մարտիկ է, և բացի այդ, նրա անկյունում Խաբիբն է»,- պատասխանել է Ծառուկյանը:
Արման Ծառուկյանը մրցելույթներին կվերադառնա ապրիլի 18-ին՝ Ֆիլադելֆիայում կայանալիք «RAF 8» գրեփլինգի մրցաշարում, որտեղ երկրորդ կարևորագույն գոտեմարտում ուժերը կչափի ամերիկացի վետերան Յուրայա Ֆեյբերի հետ:
Արդեն հունիսին Ծառուկյանը նախատեսում է որպես պահեստային մարտիկ ապահովագրել Իլիա Թոփուրիայի և Ջասթին Գեյջիի միջև տիտղոսների միավորման մենամարտը, որը կգլխավորի Սպիտակ տան մոտ կայանալիք UFC-ի տոնական շոուն։
Ինչ վերաբերում է Իսլամ Մախաչևին, ապա UFC-ի կիսամիջին քաշային կարգի գործող չեմպիոնը նախատեսում է տիտղոսի իր առաջին պաշտպանությունն անցկացնել այս տարվա օգոստոսին, սակայն նրա հաջորդ մենամարտի մասին դեռ պաշտոնապես չի հայտարարվել:
