Մադրիդի «Ռեալի» գլխավոր մարզիչ Ալվարո Արբելոան Չեմպիոնների լիգայի 1/8 եզրափակիչի պատասխան խաղում «Մանչեսթեր Սիթիի» նկատմամբ տարած տպավորիչ հաղթանակից և քառորդ եզրափակիչի ուղեգիր նվաճելուց հետո կիսվել է իր տպավորություններով։ «Էթիհադ» մարզադաշտում կայացած մամուլի ասուլիսի ժամանակ իսպանացի մասնագետը խոսել է թիմի կատարած ահռելի աշխատանքի, Պեպ Գվարդիոլայի հետ դիմակայության, ինչպես նաև Կուրտուայի վնասվածքի ու Մբապեի վերադարձի մասին։
«Հենց ֆուտբոլիստներն են այս իրավիճակը բեկել իրենց խաղով, վերաբերմունքով, ջանքերով, տաղանդով և որակով։ Այսպիսի բարդ դիմակայությունում նման հաղթանակ տանելը հեշտ չէ, հատկապես մի թիմի դեմ, որն ունի այդքան տաղանդավոր խաղացողներ, խորը կազմ և այնպիսի մարզիչ, ինչպիսին Գվարդիոլան է։ Քչերն էին հավատում, որ մենք կհաղթենք երկու խաղերում էլ։ Տղաներն արժանի են այս հաջողությանը։
Ես պարզապես փորձում եմ ստանալ առավելագույնը իմ խաղացողներից՝ ապահովելով, որ նրանք իրենց հարմարավետ զգան խաղադաշտում, և ստեղծելով հավասարակշռված ու միասնական թիմ։ Տղաները հիանալի հասկացել են, որ ցանկացած մրցակցի հաղթելու համար մենք պետք է լինենք միասնական մեծ ընտանիք։
Ինչ վերաբերում է Գվարդիոլայի և Մոուրինյուի նկատմամբ հաղթանակներին, դա որպես իմ անձնական տակտիկական հաղթանակ չեմ դիտարկում։ Չեմ համարձակվի ասել, որ կարող եմ որևէ բանում գերազանցել Գվարդիոլայի պես մարզչի, որը բարձրագույն մակարդակում գրեթե 1000 հանդիպում է անցկացրել և անթիվ տիտղոսներ նվաճել։ Եթե մենք հաղթել ենք, ապա դա միայն ֆուտբոլիստների աշխատանքի շնորհիվ է։ Ինչ վերաբերում է Մոուրինյոյին և Գվարդիոլային պայքարից դուրս թողնելուն, դա պարզապես խոսում է այն մասին, որ ես ունեմ ֆանտաստիկ ֆուտբոլիստներ։ Երկու ամիս առաջ չէի էլ հավատա, որ կլինեմ այնտեղ, որտեղ հիմա եմ։
Չեմպիոնների լիգան յուրահատուկ է «Ռեալի» համար։ Մենք շրջանցեցինք Եվրոպայի լավագույններից մեկին, իսկ առջևում, հավանաբար, «Բավարիան» է, միգուցե հետո նաև ՊՍԺ-ն։ Եթե ուզում ենք նվաճել տիտղոսը, պետք է խաղանք այնպես, ինչպես այսօր և վեց օր առաջ։ 5:1 ընդհանուր հաշիվն ամեն ինչ ասում է։ Մյունխենցիները Եվրոպայում լավագույն մարզավիճակում գտնվող թիմերից են, բայց մենք դրան կանդրադառնանք «Ատլետիկոյի» և «Մալյորկայի» դեմ խաղերից հետո։
Կուրտուան որոշակի անհանգստություն ուներ խաղից առաջ։ Նա ցանկանում էր շարունակել, սակայն ռիսկի դիմելու կարիք չկար՝ հաշվի առնելով, որ չորս օրից մենք ևս մեկ եզրափակիչ ունենք՝ շատ կարևոր մադրիդյան դերբի։ Լավ է, որ ունենք Լունինի պես դարպասապահ, ով երկրորդ խաղակեսում շատ հուսալի գործեց և արժանի է շնորհավորանքների։
Ինչ վերաբերում է Մբապեին, ես շատ ուրախ եմ նրան կրկին խաղադաշտում տեսնելու համար։ Նա արագ էր, շատ լավ մտավ խաղի մեջ և վաստակեց այն 11-մետրանոցը։ Նա իրեն շատ լավ է զգում, և կտեսնենք, թե ինչպես նա պատրաստ կլինի կիրակի օրվա դերբիին»,- իսպանացի մասնագետի խոսքն է մեջբերում «Ռեալի» պաշտոնական կայքը։
