«Ասթոն Վիլան» պաշտոնապես հայտարարել է «Բեշիկթաշի» հարձակվող Թեմի Աբրահամի տեղափոխության մասին։ Անգլիացի ֆուտբոլիստը վերադարձել է «առյուծների» ճամբար ավելի քան վեց տարի անց։
28-ամյա հարձակվողը անգլիական ակումբի հետ պայմանագիր է կնքել մինչև 2030 թվականի ամառը։ Ըստ Transfermarkt-ի տվյալների՝ «Ասթոն Վիլան» տրանսֆերի համար վճարել է 21 միլիոն եվրո։
Աբրահամը նախկինում արդեն պաշտպանել է «Ասթոն Վիլայի» գույները․ 2018/19 մրցաշրջանում նա հանդես էր գալիս թիմում վարձավճարով («Չելսիից»):
Ընթացիկ մրցաշրջանում հարձակվողը «Բեշիկթաշի» կազմում անցկացրել է 26 հանդիպում բոլոր մրցաշարերում՝ դառնալով 13 գոլի և 3 գոլային փոխանցման հեղինակ։ Հատկանշական է, որ Աբրահամը թուրքական ակումբում խաղում էր վարձավճարով («Ռոմայից»), սակայն «Բեշիկթաշն» ակտիվացրել էր պայմանագրում նշված պարտադիր գնման կետը՝ վճարելով 13 միլիոն եվրո, ինչից հետո վաճառել է խաղացողին անգլիացիներին։
Այս պահին «Ասթոն Վիլան» Պրեմիեր լիգայի մրցաշարային աղյուսակում զբաղեցնում է երրորդ հորիզոնականը՝ իր ակտիվում ունենալով 46 միավոր։ Ունաի Էմերիի թիմը հաջորդ հանդիպումը կանցկացնի հունվարի 29-ին՝ Եվրոպայի լիգայի շրջանակում մրցելով «Զալցբուրգի» հետ։
