Օլիմպիական չեմպիոն և «Սպարտակի» լեգենդ Նիկիտա Սիմոնյանին շնորհվել է Աշխատանքի հերոսի կոչում՝ պետությանը մատուցած հատուկ ծառայությունների, ինչպես նաև հայրենական ֆուտբոլի զարգացման և տարածման գործում ունեցած մեծ ավանդի համար։
99-ամյա ֆուտբոլիստը, ով «Սպարտակի» պատմության լավագույն ռմբարկուն է (160 գոլ) և ԽՍՀՄ հավաքականի կազմում Մելբուռնի Օլիմպիադայի (1956) չեմպիոն, անսպասելի է համարել այս լուրը։ Նա նշել է, որ ֆուտբոլում նախկինում միայն Նիկոլայ Ստարոստինն ու Լև Յաշինն են արժանացել նման պատվի։
«Շնորհակալ եմ շնորհավորանքների համար։ Աշխատանքի հերոսի կոչում շնորհելու լուրը բավականին անսպասելի էր։ Իհարկե, ուրախ եմ և շնորհակալ։ Դեռ միայն նախագահի հրամանագրի մասին եմ իմացել. երբ և որտեղ տեղի կունենա պարգևատրման արարողությունը, հավանաբար, կհայտարարվի ավելի ուշ։ Ֆուտբոլում միայն Նիկոլայ Պետրովիչ Ստարոստինն ու Լև Իվանովիչ Յաշինն էին արժանացել այս պատվին։
Հատկապես հուզեց Աբխազիայից ընկերներիս զանգը, որտեղ անցկացրել եմ մանկությունս։ Մարդիկ ուրախ են, դա շատ հաճելի է», — Սիմոնյանի խոսքերը մեջբերում է ТАСС-ը։
