Դա լավ է, քանի որ ճնշում է գործադրում մրցակիցների վրա․ Ֆլիկը՝ Բարսելոնայի առաջին հորիզոնականի մասին

Կատալոնական «Բարսելոնայի» գլխավոր մարզիչ Հանսի Ֆլիկը գովեստի խոսքեր է հղել իր ֆուտբոլիստներին՝ «Ռեալ Սոսյեդադի» նկատմամբ տարած հաղթանակից հետո, ընդգծելով նրանց՝ ամբողջ ուժերը նվիրելու ունակությունը։

«Բարսելոնան» Լա Լիգայում գրավեց առաջին հորիզոնականը՝ «Էստադի Օլիմպիկ Լյուիս Կոմպանիիս» մարզադաշտում 2:1 հաշվով հաղթելով «Ռեալ Սոսյեդադին»։ Գոլերի հեղինակներ դարձան Կունդեն և Լևանդովսկին։ Դժվարին հաղթանակը ձեռք բերվեց քամբեքի շնորհիվ, ինչը, Հանսի Ֆլիկի խոսքով, ևս մեկ անգամ ապացուցում է թիմի՝ անհրաժեշտ պահին արձագանքելու կարողությունը։

«Մեզ համար բավականին բարդ խաղ էր, բայց մենք արժանի էինք այս հաղթանակին։ Ինձ շատ է դուր գալիս, թե ինչպես է խաղում իմ թիմը, ինչպես է հանդես գալիս։ Անկախ նրանից՝ փոխում ենք մեկնարկային կազմը, թե ոչ, բոլորը լիովին նվիրվում են խաղին, և ես դա բարձր եմ գնահատում։ Ես շատ հպարտ եմ։ Դա անհավանական է։ Ես ուրախ եմ և՛ խաղացողների, և՛ երկրպագուների համար», — նշեց Ֆլիկը՝ գոհունակություն հայտնելով արդյունքից և թիմի խաղից։ Մարզիչն ընդգծեց նաև, որ վստահ է՝ այս հաղթանակը կօգնի թիմին շարունակել առաջընթացը. «Կարծում եմ՝ այս հաղթանակն իսկապես կօգնի մեզ շարունակել զարգանալ»։

Ֆլիկը խոսեց նաև «Բարսելոնայի» առաջին հորիզոնականի մասին՝ հավելելով. «Սա ժամանակավոր է։ Դա լավ է, քանի որ ճնշում է գործադրում մրցակիցների վրա։ Բայց հիմա մենք պետք է պաշտպանենք այս դիրքը, և մենք ուրախ ենք դա անել»։

Լամին Յամալը հանդիպման գլխավոր դեմքերից մեկն էր։ Ֆլիկը նշեց. «Շատ լավ է, որ նա վերադարձավ»։

Մարզիչն անդրադարձավ նաև Պեդրիին, ով մշտապես խաղում է կենտրոնում և «Ռեալ Սոսյեդադի» դեմ խաղում ճանաչվեց լավագույնը. «Պեդրին առանձնահատուկ, մեծ խաղացող է։ Նա նաև ավելի լավ առաջնորդ է դառնում։ Նա ամենուր է խաղադաշտում։ Նա մեզ վերահսկողություն է ապահովում և հստակ գիտի, թե որտեղ պետք է լինի։ Նա շատ լավ է խաղում և հրաշալի կերպով կազմակերպում է թիմի խաղը Ֆրենկի դե Յոնգի հետ միասին։ Ինձ շատ են դուր գալիս այդ պահերը»։

Մարզիչը կարևորեց նաև ստանդարտ դիրքերի դերը, որոնք կրկին վճռորոշ էին Կունդեի գոլի շնորհիվ. «Մենք շատ ենք մարզում ստանդարտ դիրքերը, և շատ կարևոր է ունենալ այդպիսի ուժ։ Մենք շատ գոհ ենք, թե ինչպես է դա ստացվում»։

Վերջում Ֆլիկը դիմեց երկրպագուներին, որոնք մեծ թվով ներկա էին «Լյուիս Կոմպանիիս» մարզադաշտում. «Ինձ դուր է գալիս, որ շատ երկրպագուներ են գալիս մարզադաշտ։ Թիմի և երկրպագուների կապը շատ լավ է, և դա մեզ անհրաժեշտ է։ Նույնը վերաբերում է Չեմպիոնների լիգային՝ ՊՍԺ-ի դեմ խաղին։ Մեզ մի քանի օր է պետք վերականգնվելու համար, բայց մենք կհանդիպենք մի քանի օրից»։

Աղբյուրը՝ «Բարսելոնայի» պաշտոնական կայք