«Քրիսթալ Փելասի» պաշտպան Մամադու Սակոն կիսվել է «Լիվերպուլում» հանդես գալու ժամանակների հիշողություններով, ինչպես նաև հույս հայտնել, որ կարող է վերադառնալ Ֆրանսիայի հավաքական։
«Ես մերժել եմ «Բարսելոնային», «Բավարիային» ու «Արսենալին», որպեսզի խաղամ «Լիվերպուլում»։ Դա իմ երազանքների ակումբն էր, որը հիանալի պատմություն ունի։ Բախտս բերեց ու կարողացա 4 տարի հանդես գալ «Էնֆիլդում»։ Այնտեղ հանդիպեցի այնպիսի տաղանդավոր ֆուտբոլիստների, ինչպիսիք են Սուարեսը, Կոուտինյոն ու Ջերարդը։
Հիմա երջանիկ եմ Լոնդոնում։ Ուզում եմ հնարավորինս շատ խաղալ «Քրիսթալ Փելասում», որպեսզի գրավեմ Ֆրանսիայի հավաքականի մարզչի ուշադրությունը։ Գիտեմ, որ ֆրանսիացի լավ պաշտպաններ շատ կան, բայց ես ընդամենը 30 տարեկան եմ ու առաջվա պես ամբիցիոզ եմ»,-Սակոյի խոսքերն է փոխանցում Mundo Deportivo-ն։
Սակոն ՊՍԺ-ի սան է, որի կազմում հանդես է եկել մինչև 2013 թվականը, ինչից հետո 9 մլն եվրոյի դիմաց տեղափոխվել է «Լիվերպուլ»։ 2016 թվականին Մամադուն հայտնվեց դոպինգի հետ կապված սկանդալի կենտրոնում, ինչից հետո վարձավճարով տեղափոխվեց «Քրիսթալ Փելաս»։ Տարիներ անց ակումբը 28,2 մլն եվրոյով գնեց նրան։