Ֆուտբոլի միջազգային կանոնները սահմանող մարմինը՝ IFAB-ը, քննարկում է VAR համակարգի լիազորությունների ընդլայնումը մինչև 2026 թվականի աշխարհի առաջնությունը։ Այս մասին գրում է The Times-ը։
Առաջարկվում է, որ VAR-ը հնարավորություն ունենա միջամտել անկյունային հարվածի սխալ նշանակման դեպքում, երբ գնդակը վերջինը դիպել է հարձակվող կողմին, այլ ոչ թե պաշտպանվող։ Այս փոփոխությունը համարվում է փաստի վրա հիմնված որոշում և ունի լայն աջակցություն։
Միաժամանակ քննարկվում է VAR-ի միջամտությունը երկրորդ դեղին քարտերի դեպքում։ Այս առաջարկն ավելի վիճահարույց է, քանի որ դեղին քարտերը հաճախ ենթակա են սուբյեկտիվ գնահատման։ Այդուհանդերձ, շատերն ընդգծում են, որ երկրորդ դեղին քարտը, որը հանգեցնում է կարմիր քարտի և կարող է վճռական ազդեցություն ունենալ խաղի ելքի վրա, պետք է վերանայվի VAR-ի միջոցով։
Բացի այդ, առաջարկվում է փոփոխություն 11 մետրանոց հարվածների կանոններում. եթե դարպասապահը հետ մղի հարվածը, գնդակը հայտարարվի «մահացած», և հարձակվող թիմը չունենա գոլ խփելու երկրորդ հնարավորություն։ Այս փոփոխությունը նպատակ ունի պաշտպանել դարպասապահի հաջող գործողությունների արդարությունը և կանխել կանոնների խախտումները, օրինակ՝ տուգանային հրապարակ վաղաժամ ներխուժումը։
IFAB-ի որոշումները կքննարկվեն 2025 թվականի մարտին կայանալիք տարեկան ժողովում։ Հնարավոր փոփոխություններն ուժի մեջ կմտնեն 2025 թվականի հունիսի 1-ից՝ մինչև ԱՄՆ-ում, Կանադայում և Մեքսիկայում կայանալիք աշխարհի առաջնությունը։ Կանոնների փոփոխությունը հաստատելու համար անհրաժեշտ է ութ ձայնից առնվազն վեցը։
