Երկու պորտուգալացի բեռնատարների վարորդներ հրապարակայնորեն դժգոհություն են հայտնել իսպանական ոստիկանության վարկածի վերաբերյալ, որով պնդվում է, թե «Լիվերպուլի» ֆուտբոլիստ Դիոգու Ժոտան և նրա եղբայր Անդրե Սիլվան զոհվել են արագությունը գերազանցելու հետևանքով տեղի ունեցած վթարի պատճառով: Այս մասին գրում է Euronews-ը։
Երեքշաբթի օրը իսպանական ոստիկանությունը հայտարարել է, որ, իրենց տվյալներով, Ժոտայի Lamborghini-ի անիվը պայթել է, երբ նա, գերազանցելով արագությունը, վազանց է կատարել։ Մեքենան դուրս է եկել ճանապարհից և բռնկվել։
Սակայն բեռնատարի վարորդներից մեկը՝ Ժոզե Ալեյշու Դուարտեն, հայտարարել է, որ ֆուտբոլիստի մեքենան իրենից առաջ է անցել վթարից մոտ հինգ րոպե առաջ և ընթացել է չափավոր արագությամբ։
«Նրանք չէին գերազանցում արագությունը։ Ճանապարհը սարսափելի վիճակում էր», – ասել է Դուարտեն։ Նրա խոսքերը նախ հրապարակվել են Մադեյրայի Funchal Notícias կայքում, այնուհետև տարածվել իսպանական մամուլում։
Երկրորդ վարորդը՝ Ժոզե Ազևեդուն, նշել է, որ նկարահանել է վթարի հետևանքները և կանգ է առել օգնություն ցուցաբերելու համար, սակայն չի կարողացել որևէ բան անել։
«Իմ խիղճը մաքուր է։ Ես խոսք եմ տվել ընտանիքին, որ նրանք չէին գերազանցում արագությունը», – ասել է նա։
Երկու վարորդներն էլ ընդգծել են, որ A52 ավտոճանապարհը, որտեղ վթարը տեղի է ունեցել կեսգիշերից անմիջապես հետո, մութ է, վտանգավոր և վատ պահպանված։ Ազևեդուն, որը պարբերաբար երթևեկում է այդ ճանապարհով, ավելացրել է. «Ես տեսել եմ անզգույշ վարորդների, բայց նրանք լիովին հանգիստ էին վարում»։
Ոստիկանությունը նշում է, որ վթարի պատճառների հետաքննությունը շարունակվում է, սակայն վարորդների այս վկայությունները կարող են ազդել գործի ընթացքի վրա։
Դիոգու Ժոտան և Անդրե Սիլվան զոհվել են հուլիսի 3-ին։ Պորտուգալական լրատվամիջոցների փոխանցմամբ՝ ֆուտբոլիստն ուղևորվում էր Իսպանիայի հյուսիսում գտնվող Սանտանդեր՝ լաստանավով Անգլիա մեկնելու և «Լիվերպուլին» նախապատրաստական փուլին միանալու համար։
Դիոգու Ժոտայի և Անդրե Սիլվայի հուղարկավորությունը տեղի է ունեցել նախորդ շաբաթ օրը Պորտուգալիայում։
