«Մեծ սաղավարտի» մրցաշարերի քառակի հաղթող, աշխարհի երկրորդ ռակետ, իսպանացի թենիսիստ Կարլոս Ալկարասը խոսել է «Ոսկե գնդակի» մրցանակի շուրջ ստեղծված իրավիճակի մասին։
Երկար ժամանակ այդ մրցանակին արժանանալու ֆավորիտը Մադրիդի «Ռեալից» բրազիլացի Վինիսիուս Ժունիորն էր։ Սակայն այսօր հայտնի դարձավ, որ Ալկարասի հայրենակից, «Մանչեսթեր Սիթիի» ֆուտբոլիստ Ռոդրին դարձել է «Ոսկե գնդակի» քվեարկության առաջատարը։
«Թվում էր, թե Վինիսիուսը կհաղթի, իսկ հիմա, կարծես, Ռոդրին կհաղթի: Նրանք երկու մեծ մարզիկներ են և արժանի են դրան իրենց անցկացրած անհավանական տարվա համար:
Երկուսի հետ էլ լավ ընկերներ ենք, և ով էլ հաղթի, ես շատ երջանիկ կլինեմ»,- Ալկարասի խոսքերն է մեջբերում Mundo Deportivo-ն:
