Հայաստանի առաջատար շախմատիստ Լևոն Արոնյանի կնոջ՝ Արիանե Կաոիլիի անժամանակ մահը շատերին է ցնցել. նա կյանքից հեռացավ մարտի 30-ի՝ լույս 31-ի գիշերը 33 տարեկան հասակում:
Արիանե Կաոիլին մարտի 14-ին ժամը 23:50-ի սահմաններում իր վարած Lexus մակնիշի ավտոմեքենայով վթարի էր ենթարկվել՝ Երևանի Սեբաստիա փողոցում բախվելով կամրջի բետոնե հենասյանը: Վթարից հետո Կաոիլին տեղափոխվել էր «Աստղիկ» ԲԿ, ենթարկվել վերջույթների մի քանի վիրահատությունների, ու թվում էր՝ դրական տեղաշարժ կա նրա վիճակում, սակայն երեկ Կաոիլին դարձյալ տեղափոխվել էր վերակենդանացման բաժանմունք թոքերի հետ ունեցած խնդիրների պատճառով: Կաոիլի կյանքը, ցավոք, փրկել չհաջողվեց:
Լևոն Արոնյանին, նրա ընտանիքին ու հարազատներին ցավակցական ուղերձներ են հղել ՀՀ վարչապետ Նիկոլ Փաշինյանը, նրա տիկին Աննա Հակոբյանն ու մի շարք այլ գործիչներ:
Արոնյանը ցավակցական ու զորակցական խոսքեր է ստացել նաև շախմատի համաշխարհային դեմքերից՝ Գարի Կասպարովից, Մագնուս Կարլսենից և մյուսներից…
«Իմ խորին ցավակցությունները Լևոնին, և այն շատ մարդկանց, որոնց կյանքն ավելի պայծառ էր դարձել Արիանեի շնորհիվ»,- գրել է աշխարհի նախկին չեմպիոն Գարի Կասպարովը.
My deep condolences Levon, and to the many others whose lives were made brighter by Arianne. https://t.co/N26PvMdsSp
— Garry Kasparov (@Kasparov63) March 30, 2020
«Խոսքեր չկան: Ցավում եմ»,- գրել է Մագնուս Կարլսենը՝ մեկնաբանություն թողնելով Արոնյանի թվիթերյան էջում:
«Թանկագին Լևոն: Մեր խորին ցավակցությունները: Մենք Արիանեին ճանաչում էինք, երբ դեռ երիտասարդ աղջիկ էր, իսկ ավելի ուշ դարձավ քո կինը: Նա միշտ շատ ընկերասեր և քաղաքավարի էր: Այնքան շատ հետաքրքրություններ ուներ, որ երկուսով կիսում էիք: Մեր աղոթքներն ու մտքերը քեզ հետ են»,- գրել է հնդիկ գրոսմայստեր Վիշվանաթան Անանդը:
«Ցավում եմ քո կորստի համար, Լև»,- գրել է ամերիկացի գրոսմայստեր Ֆաբիանո Կարուանան:
«Աստված իմ, պինդ եղի՛ր … ցավակցում եմ»,- գրել է Յան Նեպոմնյաշչին:
Արոնյանին իրենց ցավակցություններն են հղել նաև Մաքսիմ Վաշիե-Լագրավը, Սերգեյ Կարյակինը, Անիշ Գիրին, Պավել Էլյանովը, Յուդիթ Պոլգարը և ուրիշներ։
Ցավակցական ուղերձ է հղել նաև Հայաստանի ֆուտբոլի ֆեդերացիան, ու հայկական մի շարք ակումբներ.
Ես ապրում եմ, որովհետև գտել եմ Հայաստանը. ամենահայ ֆիլիպինուհին՝ ընդմիշտ մեր սրտերում
