Հայաստանի Հանրապետությունում ֆուտբոլային ենթակառուցվածքների զարգացման ծրագրին պետական աջակցություն տրամադրելու նպատակով Կառավարությունն այսօրվա նիստում հավանության է արժանացրել ՀՀ կրթության, գիտության, մշակույթի և սպորտի նախարարության 2022 թվականի բյուջեն 2,5 մլրդ դրամով ավելացնելու որոշման նախագիծը:
Հայաստանում ֆուտբոլային ենթակառուցվածքների զարգացման նպատակով նախատեսվում է Երևան քաղաքում, ՀՀ Արարատի, Գեղարքունիքի և Տավուշի մարզերում կառուցել թվով 4 ֆուտբոլի դպրոց՝ արհեստական կամ բնական խաղադաշտերով, անհրաժեշտ հարակից շինություններով, փակ մարզադահլիճներով:
Երևան քաղաքում ֆուտբոլի դպրոցը նախատեսվում է կառուցել Դավիթաշեն համայնքում՝ հաշվի առնելով նմանատիպ մարզադպրոցի բացակայությունն ինչպես Դավիթաշեն, այնպես էլ հարակից՝ Աջափնյակ և Արաբկիր համայնքներում: Ընտրվել է 4 հա մակերեսով հողատարածք: Նախնական հաշվարկով՝ ենթածրագրի արժեքը կկազմի 1.6 մլրդ դրամ:
ՀՀ Արարատի մարզում ֆուտբոլի դպրոցի կառուցման համար ընտրվել է Արտաշատ քաղաքի համայնքային սեփականություն համարվող հողակտորը (մոտ 1,7 հա, հատակագիծը կցվում է): Նախնական հաշվարկով՝ ենթածրագրի արժեքը կկազմի 800 մլն դրամ:
ՀՀ Գեղարքունիքի մարզում ֆուտբոլի դպրոցի կառուցման համար ընտրվել է Մարտունի քաղաքի նախկին մարզադաշտի տարածքը (մոտ 4 հա), որն արդեն իսկ այս նպատակի իրագործման համար սեփականատիրոջից գնվել է Մարտունի համայնքի ավագանու կողմից: Առկա է նաև պայմանավորվածություն «Ալաշկերտ» ֆուտբոլային ակումբի հետ առ այն, որ Մարտունիում մարզադպրոց-մարզադաշտի կառուցումից հետո ակումբը տեղափոխվելու է Մարտունի և հանդես է գալու տեղի մարզադաշտում: Նախնական հաշվարկով՝ ենթածրագրի արժեքը կկազմի 1.2 մլրդ դրամ:
ՀՀ Տավուշի մարզում ֆուտբոլի դպրոցի կառուցման համար ընտրվել է Իջևան քաղաքի Արնար մարզադաշտի տարածքը (մոտ 2,1 հա): Նախնական հաշվարկով՝ ենթածրագրի արժեքը կկազմի 1.4 մլրդ դրամ:
ՀՀ վարչապետ Նիկոլ Փաշինյանը կարևորել է այն, որ Հայաստանի երեք մարզերում և Երևան քաղաքում կկառուցվեն միջազգային ստանդարտներին համապատասխանող մարզադպրոցներ, որոնք կունենան նաև մարզադաշտեր՝ տրիբունաներով: Այդ մարզադաշտերում հնարավոր կլինի անցկացնել Հայաստանի ակումբային առաջնության հանդիպումներ, ինչպես նաև խաղեր Հայաստանի պատանեկան և երիտասարդական հավաքականների մասնակցությամբ:
ՀՀ կրթության, գիտության, մշակույթի և սպորտի նախարար Ժաննա Անդրեասյանն ընդգծել է՝ այս կերպ շարունակվում է Կառավարության կարևոր քաղաքականությունը մարզական նշանակության շինությունների կառուցման և վերանորոգման ուղղությամբ.
«Ֆուտբոլի զարգացմանն ու Հայաստանի ֆուտբոլի ֆեդերացիային նմանօրինակ ծավալի պետական աջակցություն երբևէ չի եղել և սա, իսկապես, աննախադեպ է: Ակնկալվում է, որ Հայաստանի երեք մարզերում և Երևան քաղաքում կսկսեն գործել միջազգային ստանդարտներին համապատասխանող բնական կամ արհեստական խաղադաշտերով մարզադպրոցներ՝ անհրաժեշտ ենթակառուցվածքներով, կապահովվի մարզադպրոցների և խաղադաշտի հասանելիությունը ֆուտբոլով զբաղվել ցանկացող ինչպես տղա, այնպես էլ աղջիկ երեխաների համար, կստեղծվեն մանկապատանեկան ֆուտբոլի բարձրակարգ թիմեր, որոնք կմասնակցեն ՀՀ տարբեր տարիքային առաջնություններին, աշխատանքով կապահովվեն բարձր որակավորում ունեցող մեծ քանակի մարզիչներ»,- ասել է ԿԳՄՍ նախարարն ու տեղեկացրել, որ ընդհանուր ծրագրի նախնական արժեքը կազմում է 5 մլրդ դրամ, սակայն ներկայիս նախագծով որպես աջակցություն Հայաստանի ֆուտբոլի ֆեդրացիային կհատկացվի միայն 50%-ը՝ 2.5 մլրդ դրամը, իսկ մնացած գումարի մասով անհրաժեշտության և հնարավորության դեպքում անդրադարձ կկատարվի 2023 թվականին:
ՀՖՖ նախագահ Արմեն Մելիքբեկյանն էլ ընդգծել է՝ հայկական ֆուտբոլի համար սա աննախադեպ իրադարձություն է.
«Կառավարությունը Երևանում ու մարզերում ֆուտբոլի զարգացման, ենթակառուցվածքների կառուցման համար երբևէ նմանօրինակ ծավալով աջակցություն չի տրամադրել: Վերջին 2 տարվա ընթացքում ՈՒԵՖԱ-ի և սեփական միջոցներով մենք շուրջ 5 մլրդ-ի ներդրումներ ենք կատարել հատկապես մարզերում: Մարզերում 90 փոքր դաշտեր են կառուցվել, հիմնականում՝ գյուղական համայնքներում: Արդեն պատրաստ է Վանաձորի մարզադաշտը, Արմավիրի ֆուտբոլի ակադեմիան, լուսավորության համակարգեր ենք տեղադրել Գյումրիում, Աբովյանում: Ամբողջովին վերանորոգել ենք Աբովյանի մարզադաշտը: Հունվարին էլ կփորձենք Երևանում բացել Խորեն Հովհաննիսյանի անվան դպրոցը: Սա ՀՖՖ ռազմավարական նպատակների կատարումն է:
Մենք պետք է ունենանք 6-18 տարեկան 10 հազար ֆուտբոլիստ, ովքեր խաղում են Հայաստանի տարբեր տարիքային առաջնություններում: Այս պահին այդ թիվը 8 հազար է, իսկ մինչև 2025 թվականը ակադեմիաների կառուցմամբ մենք կգերակատարենք այդ տազմավարական նպատակը; Մյուս նպատակն էլ այն է, որ Հայաստանի բոլոր մարզերում պետք է ունենանք ֆուտբոլային ակադեմիաներ կամ դպրոցներ»,- աել է Արմեն Մելիքբեկյանը:
