Դիմում եմ ՀՖՖ ղեկավարությանը խնդրանքով՝ այլևս չխայտառակել իրենց. Արթուր Սողոմոնյանը պատասխանել է ՀՖՖ-ին

«Փյունիկ» ֆուտբոլային ակումբի սեփականատեր Արթուր Սողոմոնյանը ակումբի մամուլի ծառայության հետ զրույցում արձագանքել է Հայաստանի ֆուտբոլի ֆեդերացիայի հայտարարություններին իր հարցազրույցից հետո, ինչպես նաև նշել, թե որոնք են լինելու իր գործողությունները, եթե երևանյան ակումբի ներկայացուցիչը չընտրվի ՀՖՖ գործկոմի կազմում:

— Պարոն Սողոմոնյան, Հայաստանի ֆուտբոլի ֆեդերացիան արձագանքել է «Փյունիկ» ֆուտբոլային ակումբի պաշտոնական կայքում հրապարակված Ձեր հայտարարությանը: Ինչպե՞ս եք գնահատում այն:

— Կյանքի փորձից գիտեմ, որ երբ գործ ունես մասնագետների հետ, երկխոսությունը կառուցվում է կոնկրետ փաստերի կամ տրամաբանական փաստարկների վրա և, ի վերջո, կարող է հանգեցնել լուծման։ Եթե գործ ունես դիլետանտների հետ, ապա պետք է պատրաստ լինել, որ նրանք կփորձեն երկխոսությունը տեղափոխել հուզական հարթություն ՝ օգտագործելով վիրավորանքներ և սպառնալիքներ, նման վեճերը, որպես կանոն, ոչնչով չեն ավարտվում:

Ցավոք, մենք այդպես էլ չստացանք ոչ մի լուրջ փաստարկ, որը կհերքեր ՀՖՖ ղեկավարության աշխատանքի մասին բարձրացրած խնդիրներից որևէ մեկը։ Փոխարենը, լսեցինք շատ վիրավորանքներ և սպառնալիքներ:

— ՀՖՖ-ն հայտարարել է, որ Ձեր դեմ քրեական գործ կհարուցի, ինչպես նաև դատարանի միջոցով կստիպի ներողություն խնդրել։

— Եթե նրանք իսկապես ունեն փաստարկներ, որոնք հաստատում են, որ ես սխալ եմ, հաճույքով ներողություն կխնդրեմ, քանի որ նրանցից ավելի շատ եմ հետաքրքրված հայկական ֆուտբոլի զարգացմամբ և դրա մեջ իմ փողերն եմ ներդնում, այդ իսկ պատճառով դատարան պետք չէ։

Ինչ վերաբերում է քրեական գործ հարուցելու սպառնալիքներին, ապա դրան վերաբերվում եմ որպես ՀՖՖ ղեկավարության հերթական դատարկ հայտարարության՝ անձամբ ինձ վախեցնելու նպատակով: Նման արձագանքը միայն մեկ անգամ ևս հաստատում է մեր իրավացիությունը:

— Հայաստանի ֆուտբոլի ֆեդերացիան սոցիալական հարթակներում տեղադրել է նաև այս իրավիճակի վերաբերյալ երկու տեսանյութ: Հասցրե՞լ եք դիտել դրանք:

— Այո, իհարկե: Ես հույս ունեի լսել ինչ-որ կառուցողական դիտողություններ, միգուցե մենք իսկապես ինչ-որ բանում սխալ ենք կամ չգիտենք։ Այնուամենայնիվ, բացի էմոցիոնալ արտահայտություններից ու մեր ակումբի հասցեին վիրավորանքներից ոչինչ չեմ լսել, ընդ որում` շփոթմունք է առաջացնում այդ աշխատակիցների ինքնությունը, ինչո՞ւ են հենց նրանք պատասխանում մեր խոսքերին, այն էլ`  նման տարօրինակ ձևով:

— Երկու ելույթ ունեցողները անձամբ են դիմել Ձեզ, նրանց ճանաչո՞ւմ եք:

— Պարոն Մելիքբեկյանի խորհրդական Ռուբեն Նազարեթյանի հետ ծանոթ չեմ: Ինչ վերաբերում է նրա խոսքերին, կարող եմ ասել, որ դա ավելի շատ նման էր ոչ քաղաքակիրթ, փողոցային կռվի, որը լցված էր ակնհայտ ստերով ու վիրավորանքներով: Ես, իհարկե, չեմ իջնի այդքան` այդ մարդու հետ շփվելու համար:

Կարծում եմ, որ նման տեսանյութից հետո շատերին պարզ դարձավ, թե ինչ ցածր մակարդակի մարդիկ են կառավարում ՀՖՖ-ն: Ամենակարևոր բանը, որ ես հասկացա այդ ամենը դիտելուց հետո, որ ֆեդերացիայում խնդիրները շատ ավելի խորն են, քան մենք պատկերացնում ենք:

— Իսկ ի՞նչ կասեք ԲԿՄԱ-ի և Հայաստանի երիտասարդական հավաքականի գլխավոր մարզիչ Ռաֆայել Նազարյանի հայտարարությունների մասին:

— Ես միշտ հարգանքով եմ վերաբերվել այս մարզչին, բայց դիտելով այդ տեսանյութը` մեծ հիասթափություն ապրեցի։ Հաճելի չէր լսել խաբեությունը, որ պարոն Մելիքբեկյանը երբեք չի միջամտում ԲԿՄԱ-ի գործերին, ուզում եմ պարոն Նազարյանին հիշեցնել մեր վերջին խոսակցությունը, որում նա հակառակն էր պնդում։

Իմ կարծիքով, ճիշտ չէ նաև նրա կողմից գնահատական տալ «Փյունիկի» մարզչական շտաբի ընտրած աշխատելաոճին սեփական խաղացողների հետ, դա դուրս է մարզչական տարրական էթիկայի շրջանակներից։

Բայց ես ուզում եմ առանձին կանգ առնել նրա մեկ հայտարարության վրա: Այն բանից հետո, երբ պարոն Նազարյանը շատ էմոցիոնալ ասաց, որ միշտ առաջնորդվում է մարզական սկզբունքներով: Նա երկու անգամ կրկնեց, որ դիմելու է պարոն Մելիքբեկյանին` խնդրելով «Փյունիկ ՖԱ»-ի խաղացողներին չհրավիրել ԲԿՄԱ:

Այս արտահայտությամբ Ռաֆայել Նազարյանը ոչ միայն հակասում է ինքն իրեն, այլև կոնկրետ սպառնում է մեր ակումբին, ինչպես նաև ոչնչացնում է սպորտային սկզբունքները ամբողջ հայկական ֆուտբոլում։ Զարմանալի է նման սպառնալիքներ լսել Հայաստանի երիտասարդական հավաքականի մարզչից։

Ուզում եմ հիշեցնել, որ ԲԿՄԱ-ն պարոն Մելիքբեկյանի մասնավոր բիզնեսը չէ։ «Փյունիկ» ֆուտբոլային ակումբն ունի նույն իրավունքները, ինչ մյուսները, անկախ նրանից` պարոն Նազարյանին դուր են գալիս մեր բողոքները ՀՖՖ-ի աշխատանքի հարցով, թե ոչ։

— Բայց, պարոն Սողոմոնյան, ՀՖՖ-ի նախագահը լիազորություն ո՞ւնի նման որոշումներ կայացնել։ 

— Որքան գիտեմ ՝ ոչ, պետք է ֆեդերացիայի գործկոմի հավանությունը։ Իմ տեղեկություններով` ՀՖՖ այսօրվա ղեկավարության հիմնական նպատակը դեկտեմբերի 28-ին իրենց լիովին լոյալ ու իրենց կողմից ամբողջությամբ վերահսկվող ՀՖՖ-ի գործկոմի ընտրությունն է: Եթե դա տեղի ունենա, ամբողջ իշխանությունը կհայտնվի Մելիքբեկյանի և Նիկողոսյանի ձեռքում, իրենք օրենքներ կընդունեն, իրենք կվերահսկեն դրանց կատարումը: Այսինքն` իրենք իրենց կհարցնեն, չի լինի ոչ մի տարակարծություն։ Նման իրավիճակում նրանք կարող են ընդունել ցանկացած օրենք, նույնիսկ այնպիսի անհեթեթ, ինչպես օրինակ, առանձին վերցրած ակումբին ինչ-որ իրավունքներից զրկելը։ Հայկական ֆուտբոլի պատմության մեջ արդեն նման իրավիճակ է եղել, դա ոչ մի լավ բանի չի հանգեցրել։

Հիանալի պատկերացում ունենալով այդ մարդկանց մասնագիտական մակարդակի մասին և իմանալով նրանց վերաբերմունքը գործին ՝ վստահ եմ, որ առաջիկա տարիներին Հայաստանում ֆուտբոլի զարգացման մասին պետք է մոռանալ։

— Գործկոմի ընտրություններին հաշված օրեր են մնացել։ Ձեր նախորդ հարցազրույցում Դուք նշեցիք, որ մեծ հավանականություն կա, որ մեր ներկայացուցիչը չի ընտրվի` ակումբի դիրքորոշման պատճառով։ Որո՞նք են լինելու Ձեր քայլերը, եթե արդյունքում մեր ակումբը ՀՖՖ գործկոմում ներկայացուցիչ չունենա:

— Ակնհայտ է, որ այս ընտրությունների նպատակը ոչ թե երկրում ֆուտբոլի զարգացման ու կառավարման կառույցի ամրապնդումն է, այլ ՀՖՖ գործկոմի ղեկավարության համար միանգամայն լոյալ, հարմարավետ կառույցի ստեղծումն է, այդ թվում` հաջորդ տարի կայանալիք ՀՖՖ նախագահի ընտրություններին պարոն Մելիքբեկյանի ընտրությանը նախապատրաստվելու համար: Մեզ քաջ հայտնի է, որ պարոն Նիկողոսյանն ակտիվ աշխատանք է տանում, որպեսզի «Փյունիկի» ներկայացուցիչը չհայտնվի ՀՖՖ գործկոմի կազմում։

Ինձ համար դժվար է կանխատեսել, թե առաջիկա ընտրություններում ինչ դիրքորոշում կորդեգրեն ՀՖՖ-ում ձայնի իրավունք ունեցող անդամները, քանի որ շատերը չեն ցանկանում վիճել գործող ղեկավարության հետ կամ ինչ-ինչ պատճառներով կախված են նրանցից: Ուզում եմ միայն հիշեցնել, որ պարոն Մելիքբեկյանը տնօրինում է ոչ թե սեփական միջոցները, այլ այն միջոցները, որոնք իրավամբ պատկանում են Հայաստանի ֆուտբոլի ֆեդերացիայի բոլոր անդամներին։

Բայց եթե ՀՖՖ գործող ղեկավարությանը հաջողվի արգելափակել «Փյունիկի» ներկայացուցչի ընտրությունը ՀՖՖ գործկոմի կազմում, մենք, միևնույն է, կշարունակենք պայքարը հայկական ֆուտբոլում մաքրություն հաստատելու համար՝ որպես ՀՖՖ գործող անդամներ: Բացի դրանից, կաշխատենք հրապարակային դաշտում մեր դիրքորոշումը հանրությանը հասցնելու համար, որի կետերից մեկն է, որ պարոնայք Մելիքբեկյանն ու Նիկողոսյանը չեն համապատասխանում իրենց զբաղեցրած պաշտոններին և պետք է անհապաղ հրաժարական տան։

— Պարոն Սողոմոնյան, կցանկանայի՞ք ինչ-որ բան ավելացնել: 

— Հուսով եմ, որ ՀՖՖ-ի ղեկավարությունն այսուհետ ավելի կոռեկտ կգտնվի «Փյունիկ» ֆուտբոլային ակումբի նկատմամբ: Անձամբ դիմում եմ նրանց համոզիչ խնդրանքով`այլևս չխայտառակել իրենց և ամբողջ հայկական ֆուտբոլը ցածրորակ, պատվիրված տեսանյութերով: Եթե կան կոնկրետ փաստարկներ կամ փաստեր, որոնք հաստատում են մեր պնդումների սխալ լինելը, մենք պատրաստ ենք լսել դրանք կամ գրավոր մեկնաբանություններ ստանալ, բայց երկխոսություն վարել այնպիսի ձևով, որն ընտրել է ՀՖՖ-ն, կառուցողական չէ։ Պատիվը ձեռք են բերում ոչ թե պաշտոնով, այլ միմիայն գործերով. խնդրեմ թող ասեն այս 3 տարվա ընթացքում ինչ գործեր են արել ու ինչ նվաճումներ են ունեցել: