Պետական մակարդակով ուշադրությունը մարզիկների համար շատ կարևոր և պարտավորեցնող է։ Այս կարծիքն է լրագրողների հետ զրույցում հայտնել հունահռոմեական ոճի ըմբիշ, աշխարհի ու Եվրոպայի չեմպիոն, Օլիմպիական խաղերի ոսկե մեդալակիր Արթուր Ալեքսանյանը։
«Մարզիկների համար ուշադրությունը շատ կարևոր է՝ ՀՀ վարչապետի, նախարարի ու պետական մյուս այրեր կողմից։ Սա մեզ ավելի է պարտավորեցնում, նաև լրացուցիչ մոտիվացիա է, երբ զգում ես, որ երկիրը ուշադրություն է դարձնում քո նվաճումներին» ,- ասել է Արթուր Ալեքսանյանն ու ևս մեկ անգամ ընդգծել, որ 2020-ի հետ կապված իմ գլխավոր նպատակը Տոկիոյի Օլիմպիական խաղերն են։
Ավելի վաղ հայտնել էինք, որ ՀՀ կրթության, գիտության, մշակույթի և սպորտի նախարարության «Տարվա 10 լավագույն մարզիկներ» մրցույթի 2019 թվականին հաղթողներն այսօր պարգևատրվել են 5 մլն-ական դրամով․ պետական բյուջեի պահուստային ֆոնդից այդ նպատակի համար ՀՀ ԿԳՄՍ նախարարությանը հատկացվել է 50 մլն դրամ:
Իսկ ի՞նչն է ուժ տալիս Արթուր Ալեքսանյանին Օլիմպիական երկրորդ ոսկու ճանապարհին․
«Ինձ մոտիվացնում է մեր ժողովուրդը, իմ ազգը։ Ինձ նաև այն մարդիկ են մոտիվացնում, ովքեր անգամ փողոցում ինձ մոտենում են, շնորհավորում են ու լավ բան են ասում»,- խոստովանում է անվանի ըմբիշը։
ՀՀ վարչապետը նշեց, որ մինչև 2050 թվականը Օլիմպիական մեդալները պետք է դառնան 25-ը։ Իսկ դրա համար ի՞նչ է անհրաժեշտ․
«Չեմ կարող ասել, թե 2050 թվականին քանի Օլիմպիական չեմպիոն կունենանք, բայց վստահ եմ, որ երկուսը չեն լինի, ավելի շատ կլինի։ Չեմ կարող ասել, թե ինչն է պակասում։ Պակասելու բան չկա։ Մենք զգում ենք ուշադրություն մեր կառավարության , Օլիմպիական կոմիտեի և սպորտի նախարարության կողմից։ Ամենակարևորը քրտանաջն աշխատելն է։ Մարզիկներն իրենց առջև պետք է դնեն նպատակ ու հասնեն դրանց։ Այդ դեպքում կունենանք լավ արդյունքներ։
Այդ 25-ից եթե մի քանի ոսկին իմը լինի, շատ լավ կլինի»,- ասում է Արթուր Ալեքսանյանը։
Արթուր Ալեքսանյանն, ինչպես հայտնի է, ԵԱ-ում նվաճած իր ոսկե մեդալը նվիրեց մարզական մեկնաբան Կարեն Գիլոյանին։ Ասում է՝ չի ափսոսում, քանի որ խոստացել էր․
«Չէ չեմ ափսոսել։ Խոսք էի տվել, իսկ ես իմ խոսքի տերն եմ։ Խոստացել էի, որ Եվրոպայի 5-րդ ոսկին Գիլոյանին պետք է տամ, նվաճեցի և տվեցի։
Կարևորը՝ այդ ոսկին Հայաստանում է, իմ մոտ է ,թե Գիլոյանի մոտ է, այդքան էլ կարևոր չէ»,- ասում է Ալեքսանյանն ու ընգծում, որ ամեն ինչ անելու է Օլիմպիական կրկնակի չեմպիոն դառնալու մասին․
«Մրցումներից առաջ առհասարակ չեմ սիրում խոստումներ տալ։ Միշտ ասել եմ, որ կփորձեմ անել ինձնից կախված ամեն բան, որ այս տարի դառնամ Օլիմպիական կրկնակի չեմպիոն»։
Խոսելով հունահռոմեական ոճի ըմբշամարտի հավաքականի շուրջ ստեղծված իրավիճակի մասին՝ Արթուր Ալեքսանյանը նշեց, որ չի խառնվում մարզիչների որոշումներին․
«Ես չեմ քննարկում մարզիչների որոշումը, այլ կատարում եմ դրանք։ Ով ինչ գրառում է կատարել ․․․ բան չեմ կարող ասել»։
Հիշեցնենք՝ հունահռոմեական ոճի ըմբշամարտի Հայաստանի հավաքական մարզչական խորհրդի որոշմամբ 77 կգ քաշային Տոկիո-2020-ում Հայաստանը կներկայացնի Կարապետ Չալյանը։
