Այսօր մեկնարկում է Կոնֆերենցիաների լիգայի 2022-23թթ․ մրցաշրջանի խմբային փուլը։ Այս մրցաշարը նշանակությամբ երրորդն է եվրոպական ակումբային ֆուտբոլում՝ Չեմպիոնների լիգայից և Եվրոպա լիգայից հետո։
Արդեն երկրորդ տարին անընդմեջ Հայաստանը ներկայացուցիչ ունի այս մրցաշրջանի խմբային փուլում։ Նախորդ տարի «Ալաշկերտը», այս տարի՝ «Փյունիկը»։
Բացի այդ, արտերկրում հանդես եկող՝ Հայաստանի ազգային հավաքականի անդամ 2 ֆուտբոլիստներ՝ Սարգիս Ադամյանը («Քյոլն») և Տիգրան Բարսեղյանը («Սլովան» Բրատիսլավա) նույնպես խաղալու են այս մրցաշարում։ Ընդ որում, Բարսեղյանի թիմը Հայաստանի չեմպիոն «Փյունիկի» հետ ընդգրկվել է նույն խմբում։
Armsport-ը ներկայացնում է, թե ինչ կարելի է սպասել «Փյունիկից» և հայ ֆուտբոլիստներից Կոնֆերենցիաների լիգայի խմբային փուլում։
«Փյունիկն» առաջին տուրում կմրցի «Բազելի» հետ
Իհարկե, առաջինը կանդրադառնանք Հայաստանի չեմպիոն «Փյունիկին»։ Հայաստանի գործող չեմպիոնը եվրագավաթային այս մրցաշրջանի որակավորման փուլն սկսել է Չեմպիոնների լիգայում։ Նախ հաղթել է ռումինական «Կլուժին», հետո՝ Լյուքսեմբուրգը ներկայացնող «Դյուդելանժին»։ Երրորդ փուլում թիմը պարտվել է սերբական «Ցրվենա Զվեզդային» և Եվրոպա լիգայի փլեյ-օֆֆում զիջել մոլդովական «Շերիֆին»։
«Փյունիկը» Կոնֆերենցիաների լիգայում ընդգրկվել է H խմբում՝ «Սլովանի» (Սլովակիա), «Բազելի» (Շվեյցարիա) և «Ժալգիրիսի» (Լիտվա) հետ։ Մյուս խմբերին կարող եք ծանոթանալ ԱՅՍՏԵՂ։
Առաջին տուրում Եղիշե Մելիքյանի գլխավորած թիմը հյուրընկալվելու է «Բազելին»։ Շվեյցարիայի նախորդ առաջնությունում թիմը զբաղեցրել է 2-րդ տեղը՝ 14 միավորով զիջելով «Ցյուրիխին»։ Ընթացիկ մրցաշրջանում «Բազելը» լավ չի մեկնարկել։ Անցկացրած 6 խաղից հետո թիմը վաստակել է ընդամենը 6 միավոր։ Նախորդ տուրում «Փյունիկի» առաջիկա մրցակիցը հյուրընկալվելիս 1։2 հաշվով պարտվել է «Սյոնին»։
«Բազելի» տնային ստադիոնը «Սանկտ Յակոբ Պարկն» է, որը կառուցվել է 1998 թվականին, իսկ բացումը եղել է 2001 թվականի մարտի 15-ին։ Այսօր՝ հենց այս ստադիոնում «Փյունիկը» կանցկացնի ակումբի պատմության առաջին հանդիպումը եվրագավաթային մրցաշարի խմբային փուլում։ Ստադիոնն ունի 38 512 նստատեղ։
«Բազելի» կազմի տրանսֆերային արժեքը գրեթե 5 անգամ գերազանցում է «Փյունիկի» կազմին (38․8 մլն եվրո ընդդեմ 7․4 մլն եվրոյի, ըստ Transfermarkt-ի)։
Այս ակումբը եվրոպական ֆուտբոլում ճանապարհ է բացել այնպիսի աստղերի համար, ինչպիսիք են՝ դարպասապահ Յան Զոմմերը, կիսապաշտպաններ Իվան Ռակիտիչը, Գրանիտ Ջական, հարձակվողներ Բրիլ Էմբոլոն, Ջերդան Շաքիրին և իհարկե, Մոհամեդ Սալահը։
Այս ֆուտբոլիստները ժամանակին խաղացել են «Բազելում», որտեղից էլ սկսել է նրանց կարիերայի առաջընթացը։
Սպասել, որ այսպիսի ակումբի հետ խաղում «Փյունիկը» կարող է լուրջ հավակնություններ ունենալ, մեղմ ասած, շատ անհավանական է, բայց․․․
«Փյունիկ», կրկնե՞լ «Ալաշկերտի» ուղին, թե՞ նոր նշաձող սահմանել
Նախորդ մրցաշրջանում Հայաստանի չեմպիոն «Ալաշկերտը» նույնպես մասնակցել է Կոնֆերենցիաների լիգայի խմբային փուլին։ Թիմն ընդգրկվել էր A խմբում՝ ԼԱՍԿ-ի (Ավստրիա), «Մաքաբի Թել-Ավիվի» (Իսրայել) և ՀԻԿ-ի (Ֆինլանդիա) հետ։ Եթե լինենք անկեղծ՝ չկար մի խաղ, որտեղ հայ երկրպագուները կարող էին դրական արդյունքի հույս ունենալ։ Միայն վերջին տուրում, երբ ամեն ինչ պարզ էր, թիմը 1։1 հաշվով ոչ-ոքի է խաղացել «Մաքաբիի» հետ։ Ընդհանուր առմամբ «Ալաշկերտը» խփել է 4 և բաց թողել 15 գոլ։
Վերադառնանք «Փյունիկին»։ Կարծում եմ, որ այս անգամ «Փյունիկը» համեմատաբար ավելի լավ հանդես կգա։ Ամեն դեպքում, այս թիմն ավելի լավ կազմ և ռեսուրսներ ունի, քան «Ալաշկերտը»։
Եղիշե Մելիքյանն ապացուցել է, որ իր թիմը կարող է կարգապահ խաղ ցուցադրել։ Իսկ մի քանի անգամ ուժեղ մրցակիցների դեմ խաղերում հաջողության հասնելու առաջին պայմանը հենց կարգապահությունն է։ Ուժեղ թիմը կարող է անփույթ խաղով պարտվել թույլ մրցակցին։ Իսկ մակարդակով ավելի ցածր թիմը որակի պակասը կարող է լրացնել կենտրոնացվածությամբ և կարգապահությամբ։
Այնուամենայնիվ, հույս ունեմ, որ «Փյունիկը» գոնե խաղով ավելի լավ տեսք կունենա այս տարի, քան «Ալաշկերտն» էր նախորդ մրցաշրջանում։
Եզրափակելով, պետք է նշեմ, որ շատ բան կախված է առաջին հանդիպումից։ Եթե «Փյունիկի» ֆուտբոլիստները խմբի ամենաուժեղ մրցակցի դեմ խաղում ցուցադրեն, որ պատրաստ են պայքարել, ապա, կարծում եմ, որ մեզ հետաքրքիր եվրագավաթային աշուն է սպասվում։ «Փյունիկը» նորեկներ ունի, որոնց գործի մեջ դեռ լիովին չենք տեսել։ Այս հանդիպումը շատ լավ հնարավորություն է տեսնելու և գնահատելու Հայաստանի չեմպիոնի մարզավիճակը և տրամադրվածությունը։
Թե՛ Շվեյցարիայի, թե՛ Հայաստանի ներքին առաջնության խաղերը որակով, դիտարժանությամբ, պայքարի մակարդակով տարբերվում են եվրագավաթային հանդիպումներից։ Այնպես որ, անհնար է այս պահին ասել, թե թիմերն ինչ սցենարի հանդիպում կանցկացնեն։ Այո, «Բազելը» բացահայտ ֆավորիտ է, բայց շատ բան կախված է «Փյունիկից»։
«Սլովան»․ Տիգրան Բարսեղյանը կարող է քայլ առաջ կատարել
Հայաստանի ազգային հավաքականի կիսապաշտպան Տիգրան Բարսեղյանը «Սլովանի» կազմում առաջին տուրում կմրցի «Ժալգիրիսի» հետ։ «Սլովանն» ունի բոլոր շանսերը խմբում առաջին տեղը զբաղեցնելու համար։
Բնականաբար, հայ ֆուտբոլասերներին հետաքրքրում է նաև մեր հավաքականի առաջատարի կարիերան, որը կարող է էապես փոխվել, եթե ֆուտբոլիստը լավ հանդես գա եվրագավաթային այս մրցաշարում։
Տիգրանը դեռ 28 տարեկան է, և լավ մրցաշրջան անցկացնելու դեպքում կարող ենք սպասել, որ գալիք մրցաշրջանում նա կարող է հայտնվել ավելի ուժեղ առաջնությունում։
«Քյոլն»․ Ադամյանը պետք է օգտագործի շանսը
«Քյոլնը», որի կազմում հանդես է գալիս Հայաստանի ազգային հավաքականի հարձակվող Սարգիս Ադամյանը, ընդգրկվել է D խմբում՝ «Սլովացկոյի» (Սլովակիա), «Նիցցայի» (Ֆրանսիա) և «Պարտիզանի» (Սերբիա) հետ։
Ամռանն Ադամյանը 4 տարվա պայմանագիր է կնքել «Քյոլնի» հետ։ Մրցաշրջանի մեկնարկային հատվածում հայ ֆուտբոլիստն ընդգրկվում էր թիմի մեկնարկային կազմում, սակայն վերջին շրջանում հիմնականում փոխարինման է մտնում։ Դժվար է ասել, թե ինչ հավակնություններ ունի «Քյոլնը» Կոնֆերենցիաների լիգայում։ Եթե թիմի գլխավոր մարզիչ Շտեֆան Բաումգարտը ռոտացիա կիրառի, ապա Ադամյանը, անկասկած, շանս կստանա։
Թիմն առաջին տուրում մրցելու է խմբի ամենաուժեղ թիմի՝ «Նիցցայի» հետ։ Ֆրանսիական թիմը ֆավորիտ է, սակայն Ադամյանն ու թիմակիցները կարող են պայքարել և նույնիսկ անակնկալ մատուցել։
Եվ այսպես, սեպտեմբերի 8-ը եվրոպական ֆուտբոլում՝ Կոնֆերենցիաների լիգայում, թեժ է լինելու հայ ֆուտբոլասերների համար։
«Նիցցա» — «Քյոլն» խաղը կմեկնարկի 20։45-ին, իսկ «Սլովան» — «Ժալգիրիս» և «Բազել» — «Փյունիկ» հանդիպումները՝ 23։00-ին։
Միհրան Ալեքսանյան
