Խառը մենամարտերի ըմբիշ Արման Ծառուկյանը 2019 թ-ին առաջին քայլերը կատարեց UFC-ում: Արմանն իր կարիերայում 16 գոտեմարտ է անցկացրել ու տարել 14 հաղթանակ, իսկ UFC-ում անցկացրած 2 մենամարտից մեկում հաղթել է, մյուսում՝ պարտվել:
Մինչ այդ Արմանը MMA-ում 13 անընդմեջ հաղթանակ էր տոնել: Արմանը 2019թ-ի մարտին պայմանագիր կնքեց UFC-ի հետ, իսկ ապրիլին անցկացրեց առաջին մենամարտը, որտեղ միավորներով ցավալի պարտություն կրեց Իսլամ Մախաչևից: Այնուհետև հուլիսին Ծառուկյանն առաջին հաղթանակը տոնեց Կանադայում՝ մրցակցի հարկի տակ պարտության մատնելով Օլիվյե Օբեն-Մերսյեին:
Այս օրերին հայ ըմբիշը Երևանում է: Արմանը Аrmsport-ի հետ զրույցում պատասխանեց տարբեր թեմաներին վերաբերող հարցերի:
-Արման, որտե՞ղ ես ծնվել և ինչպե՞ս ստացվեց, որ սկսեցիր այս սպորտաձևով զբաղվել:
- Ծնվել եմ Ջավախքում: Մինչ 18 տարեկան հոկեյով եմ զբաղվել: Այնուհետև խնդիրներ առաջացան ու զուգահեռ ցանկություն ունեի մենամարտել, զգում էի, որ դա ինձ դուր է գալիս և սկսեցի զբաղվել իմ սիրած սպորտաձևով: 19 տարեկանում տեղափոխվեցի Ռուսաստան և շատ կարճ ժամանակահատվածում լուրջ նվաճումներ գրանցեցի. դարձա MMA-ի աշխարհի չեմպիոն, նվաճեցի նաև Ասիայի չեմպիոնի կոչումը, նաև Ռուսաստանի սպորտային ըմբշամարտի սպորտի վարպետ եմ:
-Ու՞մ գլխավորությամբ ես մարզվում:
- 8 տարի է մարզվում եմ Սերգեյ Տարասյանի գլխավորությամբ:
-Ինչո՞վ է տարբերվում ազատ ոճի ըմբշամարտը MMA-ից:
- MMA-ը շատ է տարբերվում է ազատ ոճի ըմբշամարտից: Ազատ ոճի ըմբշամարտով չես կարող 18 տարեկանից սկսած զբաղվել ու արդյունքներ գրանցել, իսկ MMA-ում կարող ես: MMA-ը հիմա աշխարհում այլ մակարդակի վրա է, և շատ-շատ են այս սպոտաձևով զբաղվել ցանկացողները:
-Պայմանագիր ունես UFC-ի հետ: Ո՞րն է այս պահին քո գլխավոր նպատակը:
- 13 հաղթանակ ունեի MMA-ում և ինչպես բոլորը, այնպես էլ ես մեծ ցանկություն ունեի հայտնվել UFC-ում: Հիմա այստեղ եմ ու գլխավոր նպատակս UFC-ի գոտին նվաճելն է:
-Կհիշե՞ս ամենաբարդ գոտեմարտը:
- Ամենաբարդ գոտեմարտը թվով 9-րդն էր, երբ գնացի Կորեա, քաշս ծանր էր և մեկ գիշերվա մեջ նիհարեցի 10 կգ. դա կհասկանան միայն մարզիկները: Լավ պատրաստ չէի, որովհետև թերագնահատել էի մրցակցիս, մտածում էի կհաղթեմ, բայց դժվարությամբ կարողացա հաղթել: Այս գոտեմարտը մինչ օրս հիշում եմ:
-Ինչպե՞ս ստացվեց, որ ներկայացնում ես Հայաստանը:
- Դա եղել է իմ կամքն ու ցանկությունը: Երբ պայմանագիր կնքեցի, հնարավորություն ունեի ընտրելու, թե որ երկիրն եմ ներկայացնելու, և ես ընտրեցի Հայաստանը: Ես Հայաստանի քաղաքացիություն չունեմ, բայց ըստ UFC-ի օրենքների կարող էի ընտրել Հայաստանը: UFC-ում Ռուսաստանը ներկայացնող 15 մարզիկ կա, իսկ Հայաստանը ներկայացուցիչ չուներ, եթե չեմ սխալվում, և այդ պատճառով ընտրեցի Հայաստանը:
— Խաբիբ, թե՞ Քոնոր:
- Խաբիբ Նուրմագոմեդով: Կցանկանայի նրա հետ մենամարտել, բայց նա արդեն կարիերայի մայրամուտին է ու օկտագոնում մեր հանդիպումը, գործնականում, հնարավոր չէ:
-Պարտությոնից հետո ինչպե՞ս ես վերականգնվում:
- Երբ պարտվում ես, հաջորդ մենամարտին դժվարություններ են առաջանում: Պետք է ապացուցես, որ դու ուժեղ ես և նախորդ պարտությունը պատահական էր: Դժվար կլինի, եթե երկրորդ անընդմեջ պարտությունը կրես:
-Ի՞նչ մենամարտեր կան մոտ ապագայում:
- Հաջորդ մենամարտս կանցկացնեմ ապրիլի 11-ին՝ ԱՄՆ-ում: Մրցակցի մասին տեղեկություն կլինի այն ժամանակ , երբ նոր պայմանագիր կնքեմ UFC-ի հետ, բայց այն, որ այդ օրը մենամարտելու եմ, հստակ է:
Արմեն Գարամյան
