Չեմպիոնների լիգայի որակավորման 3-րդ փուլի «Ցրվենա Զվեզդա» — «Փյունիկ» խաղից հետո կայացավ երևանյան թիմի գլխավոր մարզիչ Եղիշե Մելիքյանի մամուլի ասուլիսը:
«Շնորհավորում եմ մրցակցին, արժանի հաղթանակ էր: Մեզ համար հաճելի հաշիվ չէր: Այո, հաշիվը ինչ-որ տեղ համապատասխանում էր խաղին, քանի որ մրցակցի որակը շատ բարձր էր: Կարծում եմ, որ մեր մարտավարությունը ճիշտ էր, քանի որ կարողանում էինք որոշ դեպքերում փակել մրցակցին ու ունենալ հակագրոհներ: Խաղը ցույց տվեց, որ ժամանակակից ֆուտբոլում մեծ դեր է խաղում արագությունը, ու իրենց հակագրոհների ժամանակ արագությամբ զիջում էինք: Կաշխատենք վերլուծել խաղն ու պատասխան խաղին ավելի պատրաստված լինենք: Սա Չեմպիոնների լիգայի 3-րդ փուլն է և այստեղ դուխի շնորհիվ չես կարող հաջողության հասնել: Պետք են անհատական բարձր որակներ ունեցող ֆուտբոլիստներ, որոնք կարող են հարցեր լուծել: Շատ բաներ՝ ինչ ծրագրել էինք ստացվել է ու շատ բաներ եղան մրցակցի անհատական մեծ վարպետություն ունեցող ֆուտբոլիստների շնորհիվ»,-ասաց Մելիքյանը:
Անդրադարձավ նաև Հովհաննես Հարությունյանի փոփոխությանը.
«Այո, Հովհաննես Հարությունյանը շատ լավ խաղաց՝ հատկապես երկրորդ խաղակեսում: Նա խնդրեց, որ փոխարինում անենք, քանի որ ոտքի շրջանում անհարմարություններ էր զգում»,-ասաց Մելիքյանը:
Թիմերի պատասխան հանդիպումը կկայանա օգոստոսի 9-ին Երևանում: