Կարծում եմ՝ շանսերը հավասար են․ Կարեն Մուրադյանը՝ Պայդեի դեմ խաղի մասին

«Երկրպագուները շատ լավ մթնոլորտ էին ստեղծել Ավանի ակադեմիայի մարզադաշտում, շատ հաճելի էր»,- ասում է «Արարատ-Արմենիայի» կիսապաշտպան Կարեն Մուրադյանը՝ խոսելով Կոնֆերենցիաների լիգայի 2-րդ որակավորման փուլի «Պայդեի» դեմ կայացած խաղի մասին (0-0) ու շարունակում․ «Շնորհակալ ենք այդպիսի աջակցության համար, ափսոսում ենք, որ չհաղթեցինք, բայց ամեն ինչ կանենք, որ ուրախացնենք իրենց պատասխան խաղից հետո»։

Իսկ պատասխան խաղն արդեն վաղն է․ մեր թիմը Երևանի ժամանակով 20:00-ին կհյուրընկալվի էստոնական թիմին՝ վիճարկելու հաջորդ փուլի ուղեգիրը։ Մինչ խաղի մեկնարկը Հայաստանի փոխչեմպիոնի ավագի հետ զրուցել ենք այս դիմակայության մասին։

-Կարե՛ն, նախ, ինչպե՞ս կմեկնաբանես «Պայդեի» դեմ Երևանում կայացած խաղը։

-Ուսումնասիրել էինք «Պայդեի» խաղը։ Այն, ինչ պատկերացնում էինք, դա էլ տեսանք դաշտում․ ամուր թիմ էր, դժվար խաղ ստացվեց։ Շատ փակ, կարգապահ պաշտպանվում էին՝ գումարած շատ ուժեղ քամին․ դժվար էր պահեր ստեղծելը, այդ պատճառով, կարծում եմ, որ 0-0-ն տրամաբանական հաշիվ էր այդ խաղում։

-Այսինքն, ամբողջովին ձեր պատկերացրած թիմն էր նաև գործի՞ մեջ, թե՞, ամեն դեպքում, ինչ-որ բանով զարմացրին։

-Կարծում եմ՝ ոչ, ինչ-որ նորություն դաշտում չտեսանք, բայց տեսանք, որ լավ թիմ է, որի արգելքը հաղթահարելու համար պիտի ավելի լավ ու արագ գործենք պատասխան խաղում։

-Վստահ եմ՝ պլաններ մշակել էիք՝ ինչպես գրավել այդ թիմի դարպասը, ինչո՞ւ չստացվեց անել դա։

-Առաջին պաշտոնական խաղն էր, ժամանակ էր պետք խաղի մեջ մտնելու համար՝ իրար լավ զգալու առումով։ Կարծում եմ՝ խաղի ընթացքում աստիճանաբար մոտենում էինք գոլ խփելուն, բայց մրցակիցը լավ էր պաշտպանվում։ Նշեմ նաև, որ քամին շատ էր խանգարում, ճիշտ է, երկու թիմին էր խանգարում, բայց ստեղծագործելու համար ավելի բարդ էր։

-Իսկ կոնկրետ ի՞նչ է պետք փոխել, ի՞նչ քայլեր անել պատասխան խաղում հաջողության հասնելու համար։

-Իմ կարծիքով՝ ավելի արագ գործել հարձակման ժամանակ, որ գոլ խփելու լավ հնարավորություններ ունենանք։ Եվ չմոռանալ, որ «Պայդեն» ունի լավ հակագրոհներ, պետք է զգոն լինել պաշտպանությունում։

-Թիմը ֆիզիկապես և մոտիվացիոն տեսանկյունից ի՞նչ վիճակում է։

-Ֆիզիկական առումով նորմալ վիճակում է, իսկ ինչ վերաբերում է մոտիվացիային, բոլորս տրամադրված ենք ամեն ինչ անելու, որ դուրս գանք հաջորդ փուլ։

-Առաջին խաղից հետո մրցակցի մարզիչն ասել էր, որ հաշիվն ի օգուտ իրենց է, դու այդպե՞ս ես կարծում։

-Միգուցե կարծում են, որ իրենց մոտ առավելություն կունենան, բայց իմ կարծիքով շանսերը հավասար են։

Ստելլա Բաբլոյան