Չեմպիոնների Լիգայի որակավորման 2-րդ փուլի՝ «Ֆ91 Դյուդելանժ»-«Փյունիկ» պատասխան խաղից առաջ երևանյան թիմի գլխավոր մարզիչ Եղիշե Մելիքյանը նախախաղային ասուլիս է տվել՝ պատասխանելով լրագրողների հարցերին.
«Տնային խաղում անհաջող ենք հանդես եկել: Շատ հիասթափված էինք: Ես տրիբունաներում էի՝ երկրպագուների հետ: Զգացինք, որ շատ տխրեցրինք երկրպագուներին: Դա ինձ վրա շատ է ազդել: Ավելի լուրջ ենք տրամադրված: Իրավունք չունենք հիասթափեցնելու մեր ժողովրդին, երկրպագուներին, ովքեր մեր կողքին են:
Մենք շատ լավ պատրաստված ու շատ պատասխանատու՝ եկել ենք մեր արդյունքի հետևից: Ավելի լավ ենք ճանաչում հիմա մեր մրցակցին: Լավ գիտենք, թե վաղվա խաղում ինչպես պետք է խաղանք: Ամենակարևորն այն է, որ մենք ունենք ոչ թե մեկ պլան, այլ 3: Հուսով եմ՝ դրանցից մեկը կաշխատի ու մենք կհասնենք հաջողության»,- ասել է երևանյան թիմի գլխավոր մարզիչը:
Եղիշե Մելիքյանն ասել է՝ երկու թիմերն էլ ունեն կարգապահություն, խաղային ձեռագիր. «Մենք տեսանք, որ մրցակիցն էլ մեզ համար խնդիրներ ստեղծեց: Բայց մենք ևս խնդիրներ ստեղծեցինք նրանց համար, թեև հաջողությունը նրանց կողմն էր տնային խաղում: Հուսով եմ՝ պատասխան խաղում հաջողությունը մեր կողմը կլինի:
Մեր հարձակվողները խոսք ունեն ասելու: Հուսով եմ՝ այդ խոսքը կլինի հենց այս խաղին: Մենք մոտիվացիայի խնդիր չունենք: Ասել եմ, որ մեր խաղացողները միայն հաղթանակով պետք է դուրս գան այս մարզադաշտից: Պարտավոր ենք գոլ խփել, և մենք դա կանենք վաղը: Միայն մեկ նպատակ ունենք և դա հաղթանակն է: Ջղային ենք, որ պարտվել ենք տնային խաղում:
Մենք թիմ ենք, որը ունի բնավորություն, իսկ դա միշտ հաղթում է խնդիրներին: Անհամբեր սպասում ենք վաղվա խաղին»:
Հիշեցնենք՝ թիմերի միջև Երևանում կայացած առաջին խաղում «Ֆ91 Դյուդելանժը» նվազագույն հաշվով հաղթանակ է տարել: Պատասխան խաղը կկայանա այսօր և կմեկնարկի ժամը 21:30-ին:
