Գեղարվեստական մարմնամարզության աշխարհի քառակի չեմպիոն Ալեքսանդրա Սոլդատովան ինքնասպանության փորձի արդյունքում տեղափոխվել է Մոսկվայի հիվանդանոցներից մեկը: Այդ մասին հաղորդել է «Մոսկվա» քաղաքային լրատվական գործակալությունը՝ հղում կատարելով օպերատիվ ծառայություններին։
«Փետրվարի 5-ին, 21-ամյա Ա. Սոլդատովան մարմնական վնասվածքներով տեղափոխվել է մայրաքաղաքի հիվանդանոց` ինքնասպանության փորձի կապակցությամբ: Նրա մոտ նաև ախտորոշել են բուլիմիա», — հայտնում են օպերատիվ ծառայությունից:
Ըստ աղբյուրի, Սոլդատովան չի հաղորդել վնասվածքների հանգամանքների մասին: Քննիչները ստուգում են այս փաստը:
Գեղարվեստական մարմնամարզության Համառուսաստանյան միության մամուլի ծառայությունից հայտնել են, որ իրենք տեղեկություններ չունեն այս թեմայի վերաբերյալ:
Սոլդատովան չի միացել Ռուսաստանի հավաքականին Գրան պրիի փուլում, որը տեղի է ունենալու Մոսկվայում փետրվարի 7-9-ը: Նախկինում նա բաց էր թողել Աշխարհի գավաթը 2019 թվականին: Պորտուգալիայում անցկացվող Challenge Cup-ի մրցաշարում 21-ամյա մարմնամարզուհին կորցրել էր գիտակցությունը:
Անցյալ շաբաթ միության նախագահ Իրինա Վիներ-Ուսմանովան հայտարարել էր, որ Սոլդատովան որոշակի ԴՆԹ-ի մակարդակով ժառանգական խնդիրներ ունի: «Դա զգացնել է տվել հասունացման տարիքում։ Հիմա մենք աշխատում ենք նրա հետ, մենք բուժման կուրսեր ենք անկացնում: Բայց մինչ այժմ նա չի վերականգնվել», — մեջբերում է «Ռ-Սպորտը» Վիներ-Ուսմանովային:
Սոլդատովան ժապավենով վարժություններ ծրագրում նվաճել է Աշխարհի 2018 թվականի գավաթը և թիմային մրցումներում նվաճել երեք ոսկե մեդալ: Բացի այդ, նա Եվրոպայի եռակի չեմպիոն է:
