Աշխարհի առաջին ռակետ, սերբ Նովակ Ջոկովիչը հանդես է եկել հայտարարությամբ և խոստովանել, որ դեկտեմբերի 18-ին մասնակցել է L’Equipe-ի ֆոտոշարքին և հարցազրույց տվել ֆրանսիական պարբերականին՝ չնայած արդեն գիտեր, որ կորոնավիրուսի իր թեստը դրական պատասխան է տվել:
L’Equipe-ի ներկայացուցիչները հայտնել են, որ հարցազրույցի ժամանակ Ջոկովիչը դիմակ է կրել և հրաժարվել է այն հանել, երբ իրեն խնդրել են լուսանկարել, բայց հետո՝ ֆոտոշարքի ժամանակ, նա արդեն առանց դիմակ է եղել և պարբերականի ներկայացուցիչներին տեղյակ չի էլ պահել, որ վարակված է կորոնավիրուսով:
Լրագրողների հետ հանդիպումը տեղի է ունեցել Բելգրադում: Հատկանշական է, որ Սերբիայում հակահամաճարակային կանոնները խախտելու համար սահմանված է պատիժ՝ տուգանք կամ 3 տարվա ազատազրկում:
34-ամյա սերբ թենիսիստն Instagram-ի իր էջում տարածած հայտարարության մեջ մասնավորապես ասում է.
«Ցանկանում եմ ուշադրություն հրավիրել իմ գործունեության և դեկտեմբերին միջոցառումների ներկա գտնվելու վերաբերյալ շարունակական ապատեղեկատվությանը: Դրան պետք է վերջ տալ:
Ցանկանում եմ ընդգծել, որ ես փորձել եմ ապահովել բոլորի անվտանգությունն ու ժամանակին թեստավորվել եմ: Դեկտեմբերի 14-ին Բելգրադում ներկա եմ գտնվել բասկետբոլային խաղի, ինչից հետո հայտնի դարձավ, որ մի շարք մարդկանց մոտ COVID-19 է հայտնաբերվել: Չնայած ախտանշանների բացակայությանը՝ դեկտեմբերի 16-ին ես հակամարմինների էքսպրես-թեստավորում անցա, որի պատասխանը բացասական էր: Անվտանգության նկատառումներից ելնելով՝ նույն օրը նաև ՊՇՌ թեստավորում անցա:
Հաջորդ օրը Բելգրադում թենիսի միջոցառման ներկա գտնվեցի, որպեսզի մրցանակներ հանձնեմ երեխաներին և միջոցառմանն ուղևորվելուց առաջ նորից հակամարմինների էքսպրես-թեստավորում անցա. այն նորից բացասական էր: Ոչ մի ախտանշան չունեի ու ինձ շատ լավ էի զգում. այդ միջոցառումից հետո միայն թեստիս պատասխանը դրական եղավ:
Հաջորդ օրը՝ դեկտեմբերի 18-ին, Բելգրադի իմ թենիսի կենտրոնում էի, որպեսզի մասնակցեմ L’Equipe-ին վաղուց խոստացածս ֆոտոշարքին և հարցազրույց տամ: Բոլոր մնացած միջոցառումները չեղարկել էի, բացի L’Equipe-ի հարցազրույցից: Պարտավորվածություն էի զգում հարցազրույց տալու, քանի որ չէի ցանկանում վատ իրավիճակում դնել լրագրողին, բայց հոգ տարա, որ պահպանվի սոցիալական հեռավորությունն ու դիմակի կրումը՝ բացի այն դեպքերից, երբ ինձ լուսանկարում էին: Երբ հարցազրույցից հետո գնացի տուն, որպեսզի մեկուսանամ, հասկացա, որ հարցազրույց տալու գաղափարը սխալ էր ու ես համաձայն եմ՝ այդ միջոցառումը ևս պետք է չեղարկեի»:
View this post on Instagram
Նշենք՝ Մելբուրնի դաշնային դատարանին տված գրավոր ցուցմունքներում սերբ թենիսիստը նշել է, որ դեկտեմբերի 16-ին նա թեստավորվել է և պարզել, որ իր մոտ կորոնավիրուս է ախտորոշվել: Դեկտեմբերի 17-ին և 18-ին Ջոկովիչը մասնակցել է տարատեսակ միջոցառումների՝ մրցանակներ է հանձնել երեխաներին և լուսանկարվել L’Equipe-ի համար: Դեկտեմբերի 22-ին նրա թեստի պատասխանը բացասական է եղել:
Ավելի վաղ հայտնել էինք՝ Ջոկովիչն Ավստրալիա մեկնելիս կեղծ տեղեկատվություն է տրամադրել, ինչի համար կարող է ազատազրկվել մինչև 12 ամիս ժամկետով: Սերբ թենիսիստը տեղեկացրել է, թե վերջին 14 օրվա ընթացքում ինքն այլ երկրներում չի եղել, ինչն իրականությանը չի համապատասխանում: Այդ շրջանում նա Սերբիայից մեկնել է Իսպանիա: Սահմանային զննման ժամանակ էլ Ջոկովիչն ասել է, թե փաստաթղթերը ոչ թե ինքն է լրացրել, այլ Tennis Australia-ն: