Տրանսֆերային պատուհանը դեռևս չէր բացվել, բայց «Լիվերպուլը» արդեն կատարեց ամենակարևոր տրանսֆերներից մեկը։ Անգլիական ակումբը ծիծաղելի գումարով (մոտ 8մլն եվրո) ձեռք բերեց ճապոնացի Տակումի Մինամինոյին։
«Լիվերպուլը» 14 տարի անց վերջապես կարողացավ նվաճել Չեմպիոնների լիգայի գավաթը և ամենակարևորը ապացուցեց, որ այս թիմը ունակ է ոչ միայն Rock and Roll-ի հնչունների տակ «Էնֆիլդում» գեղեցիկ ֆուտբոլ ցուցադրել, այլև ի զորու է պայքարել ամենակարևոր տիտղոսների համար։
Գերմանացի մասնագետից 4 տարի պահանջվեց , որպեսզի թիմը հասնի ներկայիս խաղամակարդակին։ Եթե նախորդ մրցաշրջանից առաջ շատերը ֆավորիտ էին համարում «Սիամական երկվորյակներին»` «Ռեալին» և «Բարսելոնային», ապա հիմա շատերը նշում են մեկ անուն՝ «Լիվերպուլ»։
Իհարկե, անգլիական ակումբի ղեկավարությունը և մարզիչները շատ լավ հասկանում են՝ անհրաժեշտ է թարմացնել կազմը, այլապես նրանք կարող են կրկնել Մադրիդի «Ռեալի» սխալները: 3 տարի անընդմեջ Չեմպիոնների լիգան հաղթելուց հետո, մադրիդյան ակումբը «նոր արյան» կարիք էր զգում, ինչը տեղի չունեցավ ՝ իր հետ բերելով մի շարք խնդիրներ։
Հիմա փորձենք հասկանալ, թե ինչու՞ Յուրգեն Կլոպը «սլաքներն ուղղեց» «ՌԲ Զալցբուրգի» նախկին ֆուտբոլիստի կողմը։
Ունիվերսալություն
Չեմպիոնների Լիգայի այս խաղարկությունում «Լիվերպուլը» և «Զալցբուրգը» ընդգրկված էին միևնույն խմբում։ Հենց «Էնֆիլդում» կայացած հանդիպման ժամանակ Մինամինոն կարողացավ վաճառել իր տրանսֆերը։ Ճապոնացին կարողացավ իր ֆանտաստիկ խաղի շնորհիվ ձեռնունայն թողել Ֆաբինիոյին, ով այս մրցաշրջանում «Լիվերպուլի» առանցքային ֆուտբոլիստներից է։
Ինչու՞ սկաուտական խմբերին սփռել աշխարհով մեկ և փորձել գտնել քո խաղաոճին համապատասխան կատարող, եթե այդ ֆուտբոլիստը ճակատագրի հեգնանքով հայտնվել է քո «շքամուտքում»։
Մինամինոն իր համապարփակ խաղաոճով օգտակար կլինի հարձակման գծի տարբեր դիրքերում։ «ՌԲ Զալցբուրգի» կազմում Տակումին 22 խաղում դարձել է 9 գոլի և 11 գոլային փոխանցման հեղինակ: Նա կարող է դառնալ Կլոպի իսկական հաղթաթուղթը՝ փոխարինելով Մանե֊Սալահ֊Ֆիրմինո եռյակին։
Գերմանացի մասնագետը նույնիսկ հնարավորություն ունի փոխելու իր համար այդքան սիրելի և ընդունելի 4֊3֊3 մարտավարությունը և խաղալ 4֊2֊1֊3 կամ 4֊3֊1֊2 տակտիկական սխեմայով։ Ասիացի ֆուտբոլիստը կարող է դառնալ այն խաղարկողը, ում այսքան ժամանակ սպասում էր Herr Jurgen-ը, հատկապես՝ Կոուտինյոյի հեռանալուց հետո։
Բացի այդ, Կլոպը ճապոնացի ֆուտբոլիստների հետ աշխատելու դրական փորձ ունի: Հիշենք, թե գերմանացի մասնագետի գլխավորությամբ ինչպիսի հրաշալի խաղ էր ցուցադրում Սինձի Կագավան: Նա Դորտմունդի «Բորուսիայի» առաջատարներից մեկն էր: Ի դեպ, թե՛ Մինամինոն, թե՛ Կագավան իրենց կարիերան սկսել են ճապոնական «Սերեսո Օսակա» ակումբում:
Սակայն, տակտիկական հնարքները թողնենք գերմանացի մարզչին և շարժվենք առաջ։
Մարքետինգային գրավչություն
Մինամինոյի տրանսֆերը «Լիվերպուլին» ասիական շուկա մուտք գործելու ևս մեկ հնարավորություն է տալիս ՝ ավելացնելով անգլիական ակումբի երկրպագուների թիվը։ Մեր օրերում սոցիալական ցանցերի կարևորությունը դժվար է թերագնահատել: Մինամինոյի տեղափոխությունը վերածվեց մի իրական «կիբեր սելաֆի»։
Լիվերպուլյան ակումբի պաշտոնական էջը ողողվեց կատարսիսի հասած ճապոնացիներով: Twitter-ի հետևորդների թիվը մեկ օրում ավելացավ 15000֊ով։
Չափազանցություն չի լինի, եթե ասեմ ՝ ասիական շուկան կարևորներից մեկն է Պրեմիեր լիգայի ակումբների համար: Նրանց գոհացնելու նպատակով նույնիսկ փոխվում են հանդիպումների ժամերը: Անգլիական ակումբները ահռելի գումարներ են վաստակում ասիացի ֆաների շնորհիվ: Ֆուտբոլը վաղուց արդեն չի սահմանափակվում խաղադաշտի մակերեսով: Այն դարձել է ազդեցության միջոց: Մարքեթինգային այս բումը ևս կարևոր ցուցիչ է, որ սա շահավետ տրանսֆեր է:
Յուրգենը կարող է հանգիստ քնել
Տպավորություն է ստեղծվում, որ Լիվերպուլի դոնոր ակումբի դերը իր վրա վերցրել է «ՌԲ Զալցբուրգը»։ Նախկինում այս ակումբում են խաղացել՝ Նաբի Կեյտան, Սադիո Մանեն և հիմա արդեն՝ Տակումի Մինամինոն։
Այս տեղափոխությունից հետո Կլոպը կարող է շունչ քաշել, որովհետև մրցաշրջանի ամենակարևոր հատվածում կազմի ռոտացիան նպաստում է թիմի կայունությանը։ Սա այն է, ինչն այդքան պակասում էր նրա թիմին նախորդ մրցաշրջաններում:
Իհարկե, առանց ճապոնացու էլ «Լիվերպուլը» այս տարի կնվաճեր բոլոր հնարավոր և անհանր տիտղոսները, քանի որ այս թիմում առկա վստահությունը սահմաններ չի ճանաչում:
Սակայն, ինչպես ասում են հին հունական ասույթում ՝ օտար տափաստաններում հաղթելը բավարար չէ, պետք է չպարտվել սեփական հյուղակում:
Տակումի Մինամինոն այն անվտանգության բարձիկն է, որը Կլոպին թույլ կտա ամրացնել իր ստեղծած «հյուղակի» հիմքերը:
