Եվրոպա լիգայի որակավորման 3–րդ փուլում Հայաստանի չեմպիոն Երևանի «Ալաշկերտը» կմրցի Ղազախստանի չեմպիոն «Կայրաթի» հետ։
Երկու թիմերն էլ դուրս են մնացել Չեմպիոնների լիգայի որակավորման երկրորդ փուլից և հայտնվել ԵԼ որակավորման 3–րդ փուլ։
«Կայրաթ»
ՈւԵՖԱ–ի վարկանիշային աղյուսակում «Կայրաթը» զբաղեցնում է 214–րդ տեղը։
Ակումբը 67 տարվա պատմություն ունի: Հիմնադրման օրվանից այն կրել է «Լոկոմոտիվ» անվանումը, սակայն երկու տարի անց անվանափոխվել է: Իր պատմության ընթացքում թիմը մինչև այս 2 անգամ է դարձել Ղազախստանի չեմպիոն՝ 1992 և 2004 թթ.: 5 անգամ դարձել է արծաթե, 5 անգամ՝ բրոնզե մեդալակիր: Կարելի է ասել, որ «Կայրաթը» գավաթային թիմ է, ինչպես՝ «Նոան»: Ղազախական թիմը ռեկորդային՝ 9 անգամ նվաճել է Ղազախստանի գավաթը, իսկ 2 անգամ նվաճել է երկրի Սուպերգավաթը:
«Կայրաթը» 9-րդ անգամ անընդմեջ կմասնակցի Եվրոպա լիգայի խաղարկությանը:
Եվրոպական ասպարեզում Ալմաթիի ամենամեծ հաջողությունը գրանցվել է 2015/16 մրցաշրջանում: Այդ մրցաշրջանում թիմը հասավ Եվրոպա լիգայի որակավորման փլեյ-օֆֆ, որտեղ ֆրանսիական «Բորդոյի» հետ դիմակայությունն ավարտվեց 2։2 հաշվով, սակայն մրցակցի հարկի տակ խփած գոլի շնորհիվ «Բորդոն» շարժվեց առաջ:
Մարզադաշտը.
Թիմը խաղում է Ալմաթիի «Կենտրոնական» ստադիոնում, որը տեղավորում է 26242 ֆուտբոլասեր:
Թիմերի անցած ճանապարհը եվրագավաթային ընթացիկ մրցաշրջանում
«ԿԱՅՐԱԹ»․ ՂԱԶԱԽՍՏԱՆ
Ինչպես «Ալաշկերտը», այնպես էլ «Կայրաթը», պայքարը սկսել են որակավորման առաջին փուլից։ Ղազախական թիմն առաջին փուլում պայքաքրից դուրս է թողել Իսրայելի չեմպիոն «Մաքքաբի Հայֆային»։ Դիմակայության առաջին խաղում թիմերը մեկական գնդակ են փոխանակել, իսկ պատասխան խաղում ղազախական թիմը սեփական հարկի տակ հաղթել է 2։0 հաշվով։ Հաջորդ փուլում «Կայրաթի» մրցակիցը Սերբիայի չեմպիոն «Ցրվենա Զվեզդան» էր։ Առաջին խաղում ղազախական թիմը տանը հաղթեց 2։1 հաշվով, իսկ պատասխան խաղում Սերբիայի չեմպիոնը 5 անպատասխան գնդակ ուղարկեց մրցակցի դարպասը։
«ԱԼԱՇԿԵՐՏ»․ ՀԱՅԱՍՏԱՆ
«Ալաշկերտը» որակավորման առաջին փուլում պայքարից դուրս թողեց Ուելսի չեմպիոն «Կոնաս Կի Նոմադսին»։ Ալեքսանդր Գրիգորյանի թիմն առաջին խաղում 2։2 հաշվով ավարտեց հանդիպումը մրցակցի հարկի տակ, իսկ պատասխան խաղում միայն լրացուցիչ ժամանակում կարողացավ կոտրել հյուրերի համառ դիմադրությունն ու դուրս գալ հաջորդ փուլ։ Հաջորդ փուլում երևանյան թիմը հանդիպեց Մոլդովայի չեմպիոն «Շերիֆին»։ Առաջին խաղում նվազագույն հաշվով պարտվելուց հետո փոքր հույս կար ինչ–որ բան հետ բերելու, սակայն պատասխան խաղում Մոլդովայի չեմպինը առավելության հասավ 3։1 հաշվով ու «Ալաշկերտին» «ուղարկեց» Եվրոպա լիգա։
Թիմերի դիմակայությունը
«Ալաշկերտն» ու «Կայրաթը» պատմության մեջ հանդիպել են 2 անգամ՝ ոչ հեռավոր անցյալում։ Եվրոպա լիգայի որակավորման 2–րդ փուլում թիմերի ճանապարհները հատվել են նաեւ 2015 թվականին։ Առաջին խաղում ղազախական թիմը սեփական հարկի տակ հաղթեց 3։0 հաշվով։ Պատասխան խաղում Աբրահամ Խաշմանյանի գլխավորած թիմը Երևանում հաղթեց 2։1 հաշվով։ Հաղթական գոլը «Ալաշկերտի» կազմում խփեց Հեբերը։ Բացի այս, «Կայրաթը» հայկական թիմի դեմ խաղացել է նաեւ նախորդ տարի: ԵԼ որակավորման երկրորդ փուլում ղազախական թիմը պայքարից դուրս թողեց Հայաստանի գավաթակիր «Նոային»՝ սեփական հարկի տակ հաղթելով 4:1, իսկ Երևանում պարտվելով 2:1 հաշվով:
«Կայրաթ»-«Ալաշկերտ» հանդիպումը կմեկնարկի Երևանի ժամանակով 18:00-ին: Հիշեցնենք, որ «Կայրաթում» է հանդես գալիս Հայաստանի ազգային հավաքականի կիսապաշտպան Կամո Հովհաննիսյանը:
