Ճապոնիայի մայրաքաղաք Տոկիոյում այսօր պաշտոնապես մեկնարկեցին ամառային 32-րդ ամառային Օլիմպիական խաղերը։
Գևորգ Ղազարյանը ArmSport-ի համար հենց Ճապոնիայի մայրաքաղաքից պատմում է Տոկիո-2020-ից ստացած առաջին տպավորությունների մասին․
«Տոկիոն մեզ դիմավորում է՝ ինչպես հարկն է։ Դիմավորում են այստեղ այնպես, ինչպես կարելի է պատկերացնել Ճապոնիա պետության մասին վավերագրական ֆիլմերում։ Նախապատրաստական աշխատանքները մինչև Օլիմպիական խաղեր լուսաբանելը չափից դուրս շատ են ու հատկապես շատ էին հենց այս անգամ, քանի որ քովիդային սահմանափակումներով պայմանավորված, Ճապոնիան գրեթե ամբողջությամբ lockdown-ի մեջ է գտնվում, ու արտասովոր է տեսնել աշխարհի ամենախոշոր քաղաքներից մեկը կիսադատարկ։ Մարդկանց շարժ և հոսք կա, բայց բոլորին հասկանալի է, որ դա պետք է լիներ մի քանի անգամ ավելի շատ։
Մեծ խանդավառություն Օլիմպիական խաղերի շուրջ այստեղ չկա։ Թերևս միակ դրականը կամավորներն են, ովքեր փորձում են ամեն կերպ տրամադրություն բարձրացնել։ Ի դեպ, նախկինում երբեք ես չէի տեսել այս քանակի տարեց կամավորների։ Միակ կարծիքս այդ հարցի շուրջ թերևս այն է, որ անգամ տարեց մարդիկ փորձում են ճողոպրել տնային ծանր ու սահմանափակ իրականությունից ու փորձել «նոր ու տարբերվող» աշխարհի հետ շփվել։ Իսկ շփվելու փորձեր նրանք իրապես անում են, չնայած այդքան էլ լավ չի ստացվում, քանի որ կամավորների ավելի քան 90 տոկոսը դժվարությամբ է խոսում անգլերեն։ Նրանք պարզապես ամեն քայլափոխին կանգնած են քեզ ժպտալու, անհաշվելի քանակությամբ ասելու «կոնիշուա» և «արիգատո», sorry, please, welcome ու good luck:
Անհաշվելի քանակությամբ ստուգումներ անցնելուց հետո Հայաստանից Մոսկվայով օլիմպիական խաղերի մայրաքաղաք ժամանած լրագրողներս վերջապես կարողացանք հուլիսի 23-ի ընթացքում հասկանալ, թե ինչպես ու ինչ տրամաբանությամբ ենք առաջնորդվելու վաղը։ Իսկ հուլիսի 24-ը կարևոր օր է, քանի որ մեր առաջին մասնակիցն է սկսելու պայքարը։ Սպորտային մարմնամարզությունում՝ հենացատկում Հայաստանը կներկայացնի Արթուր Դավթյանը։
Հայաստանի պես փոքր պետության համեմատությամբ ռուս մարզիկներից սպասելիքները հատկապես շատ են։ Շատ են սպասելիքները նաև մեդալային առումով, եթե հաշվի առնենք, որ ռուս մարզիկները շարունակում են մնալ պատժամիջոցների տակ ու չեն կարող ներկայանալ իրենց պետական դրոշի ներքո։ Նրանց հայտարարություններում կարելի է զգալ վճռականություն, որ ի հեճուկս բոլոր դժվարությունների, հենց իրենք պետք է լինեն մեդալաբեր հավաքականների թոփերում։ Սպասելիքներ կան նաև լողի հավաքականից, որը նաև կորուստ ունի։ Ռուսաստանի կազմում առաջին մարզիկն, ում մոտ դրական թեստ է արձանագրվել, եղել է 400 մետր ազատ ոճում հավաքականի առաջատար Իլյա Բորոդինը։ Եվրոպայի գործող չեմպիոնի կորուստը գրեթե անփոխարինելի է Ռուսաստանի պես ընտրանու համար։ Սակայն նրա փոխարեն մեզ հետ նույն չվերթով Մոսկվայից Տոկիո ժամանեց երիտասարդ Մաքսիմ Ստուպինը, ով գրանցել է միայն երկրորդ արդյունքը Ռուսաստանի վերջին առաջնությունում։
Ինքնաթիռում մասնագիտական զրույցի ցանկություն նա այդքան էլ չուներ, քանի որ հավաքականից առանձին էր մեկնում ու կարծես թե տրամադրություն չուներ։ Հայաստանի մասին միայն դրական երանգներով էր խոսում, քանի որ լողի Ռուսաստանի հավաքականը «ամենախորը լողավազանային» կապերով կապված է Ծաղկաձորի մարզաբազայի հետ։
Պետք է ընդգծել, որ Ռուսաստանի լողի հավաքականի գրեթե կեսը Օլիմպիական խաղերի նախապատրաստական փուլի երկու կարևոր հավաքներ անցկացրել է հենց Հայաստանում, որոնցից առաջինն ընթացիկ տարվա ապրիլ ամսին էր»։
Հիշեցնենք՝ Ճապոնիայի մայրաքաղաք Տոկիոյում այսօր տեղի է ունեցել 32-րդ ամառային Օլիմպիական խաղերի բացման արարողությունը: Հայաստանի դրոշակակիրներն են եղել լողորդ Վարսենիկ Մանուչարյանը և բռնցքամարտիկ Հովհաննես Բաչկովը:
Մարզաշխարհի գլխավոր ստուգատեսում Հայաստանը ներկայացնելու է 17 մարզիկ, որոնք մեդալների համար կպայքարեն 8 մարզաձևում՝ ըմբշամարտ, բռնցքամարտ, ծանրամարտ, ձյուդո, լող, աթլետիկա, սպորտային մարմնամարզություն, հրաձգություն:
Հայաստանի օլիմպիական հավաքականից առաջինը պայքարի դուրս կգա սպորտային մարմնամարզիկ Արթուր Դավթյանը, որը հանդես է գալու հենացատկ և նժույգթափեր մրցաձևերում: Հուլիսի 24-ին` 05:00-ից, կմեկնարկի սպորտային մարմնամարզության որակավորման փուլը, Դավթյանը պայքարի դուրս կգա 09:30-ից:
Գևորգ Ղազարյան՝ Տոկիոյից հատուկ ArmSport-ի համար
Տոկիո-2020. Հայ մարզիկների ելույթների ժամանակացույցը
