Կոնֆերենցիների գավաթի նախապատրաստության շրջանակում «Ուրարտուն» ու «Նոան» ընկերական հանդիպում են անցկացրել: Հանդիպումը կայացել է «Ուրարտուի» մարզաբազայում և ավարտվել տանտերերի՝ 6-1 հաշվով ջախջախիչ հաղթանակով:
«Ուրարտուի» կազմում հեթ-տրիկ է ձևակերպել Արթուր Միրանյանը, մեկական գոլ էլ իրենց ակտիվում գրանցել են Նանա Անտվին, ով իր առաջին գոլն է խփել երևանյան թիմի կազմում, Ուգոչուկվու Իվուն և Գևորգ Տարախչյանը:
«Նոայի» կազմում մեկ գնդակ հետ է բերել գանացի հարձակվող Ռայմոնդ Գյասին:
Հիշեցնենք՝ «Նոան» վերջերս հայտարարեց, որ փոխում է զարգացման վեկտորը՝ շեշտը դնելով հայ երիտասարդ խաղացողների և հետագայում արդեն ակադեմիայի սաների վրա:
«Սա նշանակում է, որ մոտ ապագայում բոլոր մրցաշարային նպատակները հետին պլան կմղվեն: Մենք կվերադառնանք տիտղոսների, եվրագավաթների մասնակցության համար պայքարին, երբ դաստիարակենք նոր սերնդի տաղանդավոր տղաներ: Այս մասին մենք կտեղեկացնենք լրացուցիչ: Վստահ ենք, որ դա տեղի կունենա ավելի վաղ, քան կարող եք ակնկալել»,- ասվում էր ակումբի տարածած հաղորդագրության մեջ: