Չեմպիոնների լիգայի գործող գավաթակիր ՊՍԺ-ն լիգայի փուլի երրորդ տուրի շրջանակում հոկտեմբերի 20-ին (Երևանի ժամանակով՝ 23:00-ին) Փարիզում սեփական հարկի տակ կընդունի կատալոնական «Բարսելոնային»:
Հանդիպմանը նախորդած մամուլի ասուլիսի ժամանակ փարիզյան գրանդի գլխավոր մարզիչ Լուիս Էնրիկեն խոսել է կատալոնացիների աստղային հարձակվող Լամին Յամալի մասին։
«Յամալը հիանալի է նրանով, որ ձգտում է լինել հենց Յամալ։ Նա կատարելագործում է իր խաղի տարբեր ասպեկտները։ Որևէ մեկին Մեսսիի՝ բոլոր ժամանակների մեծագույն ֆուտբոլիստի հետ համեմատելը կանխավ պարտվողական գործ է։ Ոչ ոք չի կարող համեմատվել նրա հետ։ Լամինը ցանկանում է դառնալ իր լավագույն տարբերակը, իսկ իրեն ուրիշների հետ համեմատելը լավագույն միտքը չէ»,- Էնրիկեի խոսքերն է մեջբերում AS-ը։
Անդրադառնալով իսպանացի տաղանդին վնասազերծելու մարտավարությանն ու թիմի հիմնական ձախ պաշտպան Նունու Մենդեշի վնասվածքի պատճառով բացակայությանը՝ իսպանացի մասնագետը հավելել է.
«Յամալի պես ֆուտբոլիստին զսպելու լավագույն միջոցը գնդակին տիրելն է։ Իդեալական կլինի վերահսկել գնդակն ամբողջ հանդիպման ընթացքում։ Մենք գիտենք, թե որքան բարդ է խաղալ «Բարսելոնայի» և հատկապես Յամալի դեմ։ Մենք կենտրոնացած ենք այն բաների վրա, որոնց վրա կարող ենք ազդել։ Պետք է պահպանել կենտրոնացվածությունը և Մենդեշի բացակայությունը փոխհատուցել թիմային գործողություններով»։
Հիշեցնենք, որ 2026/27 մրցաշրջանում Լամին Յամալն արդեն հասցրել է անցկացնել 11 հանդիպում, որոնցում դարձել է 9 գոլի և 10 արդյունավետ փոխանցման հեղինակ։
