Երեկ կեսգիշերն անց պաշտոնապես հաստատվեց, որ Հայաստանի ազգային հավաքականի ֆուտբոլիստ Նորբերտո Բրիասկո Բալեկյանը կարիերան կշարունակի արգենտինական «Բոկա Խունիորսում», ուր տեղափոխվեց արգենտինական մեկ այլ ակումբից՝ «Ատլետիկո Ուրականից»։
Ով է արգենտինաբնակ այս երիտասարդը, որ հայկական ծագում ունի։ Եկեք միասին վերհիշենք մեր ազգային թիմի ֆուտբոլիստի անցած ուղին։
Նորբերտո Ալեխանդրո Բրիասկո Բալեկյանը ծնվել է 1996 թվականի փետրվարի 29-ին Արգենտինայի մայրաքաղաք Բուենոս Այրեսի արվարձան Մարկոս Պասում։ Նորբերտոյի մայրը, որից էլ ֆուտբոլիստը ստացել է Բալեկյան ազգանունը, հայ է։ Հենց մորական պապիկի միջոցով էլ Արգենտինայում ծնված տղան ինչ-որ չափով սովորեց հայերեն խոսել․ «Բավականին դժվար է, բայց կարևոր բաները գրի եմ առնում, որ սովորեմ լեզուն։ Ինքնաթիռում կկրկնեմ դրանք Հայաստան մեկնելիս»,- ասել էր ֆուտբոլիստը Հայաստանի ազգային հավաքականից հրավեր ստանալուց հետո։ Իսկ դա 2018 թվականն էր, երբ հավաքականի այն ժամանակվա գլխավոր մարզիչ Արթուր Պետրոսյանի հրապարակած հայտացուցակում աչքի ընկավ Նորբերտո Բրիասկո Բալեկյան անունը։
2018-ի մարտի 19-ի առավոտյան էլ Նորբերտոն ժամանեց Հայաստան, ու այդ օրվանից ի վեր հայ երկրպագուները սկսեցին ուշադիր հետևել երկրագնդի մեկ այլ մայրցամաքում ակումբային կարիերա հարթող երիտասարդ հայրենակցին։
Բալեկյանն այդ ժամանակ հանդես էր գալիս արգենտինական «Ատլետիկո Ուրական» ակումբի գլխավոր թիմում, որտեղ հայտնվել էր 2016 թվականին՝ անցնելով ակումբի բոլոր տարիքային թիմերը։
Նորբին Արգենտինայում հայտնի է իր համեստ բնավորությամբ․ դեռ 2017 թվականին նրան հարցրել էին՝ արդյոք Սուպերլիգա տեղափոխվելուց հետո պատրաստվո՞ւմ է ավտոմեքենա գնել, թե՞ շարունակելու է հասարակական տրանսպորտով գնալ մարզումների։ Ֆուտբոլիստը պատասխանել էր, որ դեռ չի մտածում այդ մասին, քանի որ առաջնայինը ծնողներին օգնելն է։
Այս համեստ տղան, որի խաղով հիացել էր նույնիսկ լեգենդար Դիեգո Մարադոնան («Նա գազան է»,- ասել էր Մարադոնան՝ ArmSport), այսօր հրաժեշտ է տվել հարազատ «Ուրականին»․
Посмотреть эту публикацию в Instagram
«Պետք է հրաժեշտ տամ մի ակումբի, որն ինձ ամեն ինչ է տվել, մարզել է ինձ որպես ֆուտբոլիստ և առավելապես՝ որպես մարդ, այս ակումբում եմ կարողացել իրականացնել իմ երազանքը․․․»,- ասել է Բալեկյանը, որին այսուհետ կտեսնենք «Բոկա Խունիորսի» գույներով։
Իսկ երազանքը «Բոկայի» մարզաշապիկը հագնելն էր։ Այս մասին ակումբի մամուլի ծառայության հետ զրույցում պատմել է անձամբ ֆուտբոլիստը՝ պայմանագիրը կնքելուց հետո։
«Օրերն անցնում էին, իսկ սա տեղի չէր ունենում։ Շատ էի նյարդայնանում»,- այս օրերի իր ապրումների մասին պատմել է Բալեկյանը, որի՝ «Բոկա» տեղափոխության մասին խոսվում էր արդեն ավելի քան մեկ ամիս։ Այս ընթացքում նույնիսկ հայ ֆուտբոլիստի անունը կապվում էր ԱՊԼ-ն ներկայացնող «Նորվիչի» հետ։ Մասնավորապես, The Sun-ը գրում էր, որ «Նորվիչը» կապ է հաստատել Հայաստանի ազգային հավաքականի ֆուտբոլիստի հետ ու նրա համար պատրաստ է 3,2 մլն եվրո վճարել։
Բայց, արդյունքում, հայ ֆուտբոլիստը գնաց իր երազանքի հետևից։
«Ամեն ինչ անում էի «Բոկայում» խաղալու համար ու, փառք Աստծո, դա հնարավոր եղավ։ Շատ երջանիկ եմ ու հույս ունեմ՝ հնարավորինս շուտ վայելել այս ակումբը»,- եզրափակել է իր խոսքը Բրիասկո Բալեկյանը։
Ստելլա Բաբլոյան
