ԿԳՄՍ փոխնախարար Կարեն Գիլոյանն այսօր ամփոփեց իր 5-ամսյա պաշտոնավարման ընթացքում ունեցած ձեռքբերումներն ու հետագա անելիքները: Գիլոյանն անդրադարձավ սպորտային դեղորայքի, սպորտային բժշկության կենտրոնի, մարզադպրոցների, միջազգային համագործակցության, անվանական թոշակների, սպորտային վաշտի, վարպետության դպրոցի վերաբացման, Արտաշատի՝ աթլետիկայի դպրոցի վերանորոգման և այլ հարցերի:
Գիլոյանն իր խոսքում նշեց, որ շատ կարևոր է, որ Հայաստանը կրկին դառնա սպորտային հավաքատեղի, քանի որ այս պահին մենք հեռու ենք սպորտային աշխարհից:
Այդ կապակցությամբ ԿԳՄՍ փոխնախարարը կարևորեց միջազգային իր տարբեր հանդիպումները, այդ թվում Ռուսաստանի սպորտի փոխնախարար Քսենիա Մաչկովայի հետ վերջերս ունեցած հանդիպումը: Քննարկվել են տարբեր հարցեր, իսկ գլխավորը համագործակցությունն է տարբեր սպորտաձևերի հավաքականների միջև: Նախանշվել է համագործակցության 6 ուղղություն.հակադոպինգային համագործակցություն, համատեղ ուսումնամարզական հավաքներ, մարզչական, մրցավարական, տեխնիական հանձնաժողովների սեմինարներ: Մեր մասնագետները կգնան դասընթացների՝ որակավորման բարձրացման: Գիլոյանը նշում է՝ ծանրամարտի Ռուսաստանի ֆեդերացիան արդեն դիմել է Ծաղկաձորի մարզաբազային՝ պայմաններին ծանոթանալու համար: Վերջերս հայ ծանրորդներին ընդունելու ժամանակ ՀՀ վարչապետի պաշտոնակատար Նիկոլ Փաշինյանը մարզագույք է խոստացել՝ ծանրաձողերի նոր հավաքածուով: Ծաղկաձորի մարզաբազայի տնօրինությունը ևս խոստացել է թարմացնել մարզական գույքը, վստահեցնում է Գիլոյանը:
Գիլոյանը հանդիպումներ է ունեցել Լիբանանի մարմնակրթության և երիտասարդության նախարարի պաշտոնակատարի հետ, ում հետ ԿԳՄՍ նախարար Վահրամ Դումանյանը համագործակցություն հուշագիր է ստորագրել: Հանդիպում է եղել նաև ըմբշամարտի միջազգային ֆեդերացիայի նախագահ Նենադ Լալովիչի հետ, ում հետ ևս քննարկվել են համագործակցության մի շարք նախագծեր:
Ամռանը Երևանում կանցկացվեն կանանց բասկետբոլի Մ-20 տարեկանների Եվրոպայի առաջնության խմբային փուլի B խմբի հանդիպումները. կմասնակցեն Հունգարիան, Լեհաստանը, Իսրայելը և Ուկրանիան:
Նաև ամիսներ անց Հայաստանում կանցկացվի բոդիբիլդինգի՝ ՊՌՈ կարգի մրցաշար: Մրցաշարին կմասնակցի մոտ 500-600 մարզիկ՝ աշխարհի 40-50 երկրից: Տղաների ու աղջիկների պայքարում կխաղարկվի 3-ական ուղեգիր՝ միսիս կամ միստեր օլիմպիա մրցման համար
Սեպտեմբերին Երևանում կանցկացվի ձիասպորտի աշխարհի գավաթի խաղարկության փուլերից մեկը: Միջազգային ֆեդերացիան առաջիկայում թույլտվություն կտրամադրի, կլինի նաև պետական աջակցություն, քանի որ պետք է ձիերին ու մարզիկներին տեղափոխել մրցավայր, կազմակերպել մրցումը, իսկ այդ ամբողջը մեծ գումարի հետ է կապված, քանի որ ձրասպորտը թանկ մարզաձև է:
Գիլոյանը շեշտում է, որ այս մրցաշարերը Հայաստանում կնպաստեն սպորտի մասսայականացմանը, ինչպես նաև տուրիզմի զարգացմանը: