Արդեն այսօր Ֆուտբոլի Հայաստանի Գավաթի խաղարկության եզրափակչում 2020/21 մրցաշրջանի հաղթողին կպարզեն Երևանի «Արարատն» ու Երևանի «Ալաշկերտը»:
Այնպես է ստացվել, որ այս թիմերը 2 ճակատով են պայքար մղում. թիմերը մրցակիցներ են նաև Հայաստանի չեմպիոնի կոչման համար պայքարում: Առաջնության ավարտից մի քանի տուր առաջ այս թիմերը զբաղեցնում են 2-րդ ու 3-րդ հորիզոնականները, իսկ նրանց բաժանում է միայն մեկ միավոր:
Գավաթային պատմություն
13 տարի անց Լեգենդար «Արարատը» կրկին եզրափակչում է: Հեռավոր 2008 թ-ին վերջին անգամ Վարուժան Սուքիասյանի «Արարատը» եզրափակչում 2-1 հաշվով հաղթեց «Բանանցին»: Այդ հիշարժան օրվանից ի վեր «Արարատը» նույնիսկ եզրափակիչ դուրս չի եկել: Մինչ այդ «Արարատը» 4 անգամ էր դարձել գավաթակիր. 4-ն էլ 20-րդ դարում: 1993-1995 թթ-ին Հայաստանը միայն մեկ գավաթակիր ուներ. «Արարատը» իրար հետևից 2 անգամ հաղթեց «Շիրակին», մեկ անգամ՝ «Կոտայքին»: 20-րդ դարի վերջին գավաթը «Արարատը» նվաճեց 1997 թ-ին՝ պարտության մատնելով «Փյունիկին»:
21-րդ դարում «Արարատը» 2 անգամ եզրափակչում պարտվել է. 2001-ին՝ «Միկային», 2007-ին՝ «Բանանցին»:
Ինչ վերաբերում է «Ալաշկերտին», ապա այս թիմի համար սա գավաթային 3-րդ եզրափակիչն է: 2017/18 մրցաշրջանում երևանյան թիմը հետխաղյա 11 մետրանոց հարվածաշարի արդյունքում պարտվեց «Գանձասար-Կապանին», սակայն հաջորդ տարի Խաշմանյանի գլխավորությամբ «Ալաշկերտը» 1-0 հաշվով պարտության մատնեց «Լոռիին»՝ պատմության ընթացքում առաջին անգամ տիրանալով Հայաստանի գավաթին:
Դիմակայություն՝ գավաթի խաղարկություններում
Գավաթի խաղարկությունների եզրափակիչներում այս թիմերը կմրցեն առաջին անգամ: Սակայն այլ փուլերում «Ալաշկերտի» ու «Արարատի» շահերը բախվել են: 2014/15 մրցաշրջանում այս թիմերը հանդիպել են քառորդ եզրափակիչ փուլում: 2 խաղում էլ հաջողությունն ուղեկցել է «Ալաշկերտին». առաջին խաղում ՝ 2-0, իսկ երկրորդ խաղում՝ 4-3 հաշվով:
Հաջորդ խաղարկությունում այս թիմերի ճանապարհները խաչվեցին կրկին քառորդ եզրափակչում: Այս անգամ էլ 2 խաղում հաղթեց «Ալաշկերտը»՝ 1-0, 4-0 հաշիվներով:
Անցած ճանապարհ
«Ալաշկերտը» գավաթի այս խաղարկությունում դեռ չի ճաշակել պարտության դառնությունը: Ավելին, 2021 թ-ին Խաշմանյանի թիմը միայն մեկ պարտություն է կրել: «Ալաշկերտը» 1/8 եզրափակչում ընդհանուր 3-0 հաշվով հաղթելով, պայքարից դուրս է թողել «Շիրակին»: 1/4 եզրափակչում 1-6 հաշվով պարտվեց ու ճանապարհը «Ալաշկերտին» զիջեց ԲԿՄԱ-ն: Կիսաեզրափակչում Խաշմանյանի թիմը դիմակայությունում 4-1 հաշվով հաղթեց «Նոային» ու նվաճեց գլխավոր խաղի ուղեգիր:
«Արարատը» դժվարությունների հանդիպեց եզրափակչի ճանապարհին: 1/8 եզրափակչում ընդհանուր 6-1 հաշվով հաղթանակ «Սևանի» նկատմամբ, իսկ քառորդ եզրափակչի առաջին խաղում 0-2 հաշվով անակնկալ պարտություն «Վեստ Արմենիայից»: Պատասխան խաղում, «Արարատը, այնուամենայնիվ, հաղթեց 5-1 հաշվով ու մտավ լավագույն քառյակ:
Կիսաեզրափակչում կայացավ Արարատյան դերբին: Բիչախչյանի թիմը հանդիպեց նախորդ խաղարկության եզրափակչի մասնակից, Հայաստանի գործող չեմպիոն «Արարատ-Արմենիային», որը, մեղմ ասած, լավ օրեր չի ապրում: Առաջին խաղում «Արարատն» անթերի գործեց ու հաղթեց 2-0 հաշվով: Պատասխան խաղում Բայդաչնիի «Արարատ-Արմենիան» հաղթեց 2-1 հաշվով, բայց դա բավարար չէր եզրափակիչ դուրս գալու համար:
Կորուստներ
«Ալաշկերտից» խաղը բաց կթողնի Վանգու Գոմեն, ով թիմի կիսապաշտպանության շարժիչ ուժն է, իսկ «Արարատը» շատ լուրջ կորուստ ունի պաշտպանության կենտրոնում՝ ի դեմս Հրայր Մկոյանի:
Խաղարկության ռմբարկուների ցանկը 4-ական գոլով գլխավորում են Մորի Կոնեն ու Ալեքսանդր Գլիշիչը: Ինչ վերաբերում է մարզիչներին, ապա Բիչախչյանի համար սա 4-րդ, իսկ Խաշմանյանի համար՝ 2-րդ գավաթային եզրափակիչն է: Բիչախչյանը «Շիրակի» հետ 2 անգամ դարձել է գավաթակիր, մեկ անգամ էլ պարտվել է եզրափակչում, իսկ Խաշմանյանը մեկ անգամ «Ալաշկերտին» դարձրել է գավաթակիր:
Մրցավարները՝ Ֆրանսիայից
Հանդիպումը կսպասարկի ֆրանսիական մրցավարական բրիգադը՝ Բենուա Միյոյի գլխավորությամբ։ Եզրերում նրան կօգնեն Օրելյան Դրուեն և Բրիս Ֆրանսուա Լե Տելյեն։ Հանդիպման չորրորդ պաշտոնյան կլինի Աշոտ Ղալթախչյանը: Հիշեցնենք, որ մինչ այժմ գավաթային եզրափակիչ հանդիպումները արտերկրից ժամանած մրցավարները սպասարկել են 4 անգամ․ 2011 թվականին «Շիրակի» և «Միկայի» միջև կայացած խաղը սպասարկեց Իսպանիայից ժամանած Դավիդ Ֆերնանդես Բորբալանը, 2012 թվականին «Շիրակի» և «Իմպուլսի» մրցավեճը դատում էր Անդրեա դե Մարկոն՝ Իտալիայից, 2015 թվականին «Փյունիկն» ու «Միկան» խաղացին իտալացի մեկ այլ մրցավար Ջանլուկա Ռոկիի, իսկ 2019-ին «Ալաշկերտն» ու «Լոռին»՝ իսպանացի Ալբերտո Ունդիանո Մալյենկոյի մրցավարությամբ։
«Ալաշկերտ» – «Արարատ» հանդիպումը կկայանա այսօր՝ մայիսի 15-ին, ժամը 19։00-ին՝ Վ․ Սարգսյանի անվան «Հանրապետական» մարզադաշտում։
Արմեն Գարամյան