«Ռոմայի» եւ Հայաստանի ազգային հավաքականի կիսապաշտպան Հենրիխ Մխիթարյանը կարող է անվճար հեռանալ «Ռոմայից»: Խոսակցությունն այն մասին, թե որտեղ է գտնվելու Մխիթարյանը նոր մրցաշրջանում, շարունակվում է արդեն 3 ամիս, գրում է լրագրող Արարատ Մամբրեյանն իր տելեգրամյան ալիքում։
Ըստ աղբյուրի՝ Հենրիխն առաջարկներ ունի ինչպես ներկայիս ակումբից, այնպես էլ «Յուվենտուսից», և, անկասկած, կհետաքրքրի ռուսական ակումբներին ՝ ի դեմս «Զենիթի» և Մոսկվայի «Սպարտակի»:
Ամենահավանական տարբերակը «Յուվենտուս» տեղափոխվելն է, որը վաղուց հետաքրքրված է հայ կիսապաշտպանի ծառայություններով: «Յուվեի» ղեկավարները ակնկալում են համաձայնության գալ Մինա Ռայոլայի հետ, ով վաղուց ընկերական հարաբերությունների մեջ է Պավել Նեդվեդի հետ (թուրինյան ակումբի մարզական տնօրեն):
Աղբուրը նշում է, որ Հենրիխն ինքը դեմ չէ Հռոմում կարիերան շարունակելուն: Նա իրեն հիանալի է զգում Իտալիայի մայրաքաղաքում, որտեղ բնակություն է հաստատել ընտանիքի հետ: Շատ բան կախված է նրանից, թե ով կգլխավորի «Ռոման»(Պաուլո Ֆոնսեկան, ամենայն հավանականությամբ, կհեռանա մրցաշրջանի ավարտին) և որ տեղը կզբաղեցնի թիմն Ա Սերիայում:
Եթե հռոմեացիները հայտնվեն եվրագավաթային գոտուց դուրս, ապա «Ռոման» չի կարողանա պահել Մխիթարյանին, ով ակումբի ամենաբարձր վարձատրվող խաղացողներից մեկն է:
Հիշեցնենք, որ երեկ հայտնի էր դարձել, որ «Յուվենտուսի» ներկայացուցիչները սկսել են բանակցել Մխիթարյանի հետ։ Մանրամասներն՝ այստեղ։