ՈւԵՖԱ-ի ղեկավար Ալեքսանդր Չեֆերինը և «Յուվենտուսի» նախագահ Անդրեա Անյելին, ով ստանձնել է Եվրոպայի Սուպերլիգայի փոխնախագահի պաշտոնը, համատեղ հայտարարություն էին պատրաստել, որը հերքելու է առաջիկա մրցաշարի մասին լուրերը, հաղորդում է Football Italia- ն՝ հղում անելով The New York Times-ին:
Մրցաշարի մասին հայտարարությունից առաջ վերջին օրերին Չեֆերինը բազմիցս հարցրել այս մասին Անյելիին, որն այդ ժամանակ Եվրոպական ֆուտբոլային ասոցիացիայի նախագահն էր, բայց նա հավաստիացրել էր, որ Սուպերլիգայի նախագիծը «պարզապես ասեկոսեներ» էր:
Չեֆերինը զգացել է, որ պետք է ցրել լուրերը, և Սուպերլիգայի ստեղծման մասին հայտարարվելուց անմիջապես առաջ նա մեկնել էր Սլովենիայից Շվեյցարիայի իր գրասենյակ: Միևնույն ժամանակ, նա փորձել է հեռախոսով կապ հաստատել Անյելիի հետ, որը սկզբում երկար ժամանակ չէր պատասխանում, իսկ հետո նորից հավաստիցարել է Չեֆերինին, որ ամեն ինչ կարգին է:
Նշվում է, որ Անյելիի հետ կապ հաստատելու համար Չեֆերինը, ով Յուվեի նախագահի դուստրերից մեկի կնքահայրն է, ստիպված է եղել կապվել իտալացու կնոջ հետ:
Այնուամենայնիվ, Չեֆերինը առաջարկել է Անյելիին հանդես գալ համատեղ հայտարարությամբ, որը վերջ կտար այս լուրերին: Անյելին համաձայնվել է Չեֆերինի հետ, ով մեքենայում հայտարարություն է կազմել և ուղարկել Անյելիին: Մի քանի ժամ անց «Յուվեի» նախագահը հետ է զանգել և ասել, որ իրեն անհրաժեշտ է ևս 30 րոպե և անջատել է հեռախոսը։
Կիրակի երեկոյան Սուպերլիգայի ստեղծման պաշտոնական հայտարարությունը միաժամանակ հրապարակվեց 12 թիմերի պաշտոնական կայքերում, և ՈւԵՖԱ-ից ոչ մի հերքում չհաջորդեց: