Երբևէ հետաքրքրվե՞լ եք՝ ովքեր են Հայաստանի առաջնությունում հանդես եկող ամենաթանկարժեք ֆուտբոլիստները։ Իսկ նրանց ցուցադրած խաղից կռահե՞լ եք։
Ներկայացնում ենք VBET Հայաստանի Պրեմիեր լիգայում հանդես եկող ամենաթանկարժեք ֆուտբոլիստների թոփ-10-ը՝ ըստ հեղինակավոր Transfermarkt պորտալի։
Այսպիսով, լավագույն եռյակը ներկայացնում է երկրի գործող չեմպիոն «Արարատ-Արմենիան»։
Մեր առաջնության ամենաթանկարժեք ֆուտբոլիստը թիմի կենտրոնական պաշտպան Ջունիոր Ջուլիոն է։ Կոլումբացի 24-ամյա ֆուտբոլիստի տրանսֆերային արժեքը գնահատվում է 500 հազար եվրո։ Ընդ որում, նախկին 200 հազարի փոխարեն։
Երկրորդ տեղում չեմպիոնների մեկ այլ կենտրոնական պաշտպան է․ Սերգիյ Վակուլենկոն։ 27-ամյա ուկրաինացու արժեքը վերջին ժամանակներս ստաբիլ է և գնահատվում է 400 հազար եվրո։
Իսկ լավագույն եռյակը եզրափակող դարպասապահ Նիկոլա Պետրիչի տրանսֆերային արժեքը նվազել է։ 29-ամյա սերբ ֆուտբոլիստը նախկինում գնահատվում էր 500 հազար եվրո, հիմա՝ 100 հազարով պակաս։
4-րդ տեղում «Ուրարտուի» 24-ամյա կենտրոնական հարձակվող Ջոնել Դեսիրեն է։ Հայիթին ներկայացնող ֆուտբոլիստի տրանսֆերային արժեքը գնահատվում է կրկին 400 հազար եվրո, սակայն այս դեպքում նա բարելավել է իր դիրքերը՝ նախկին 300 հազարի փոխարեն։
5-րդ տեղում «Ալաշկերտի» ֆրանսիացի հարձակվողական ոճի կիսապաշտպան Վինսեն Բեզեկուրն է։ 27-ամյա ֆուտբոլիստի տրանսֆերային արժեքը նույնպես 400 հազար եվրո է, ինչը նշանակում է, որ այն նվազել է 100 հազարով։
6-րդ տեղում հայտնված Մորի Կոնեն, որն արդեն հանդես է գալիս Երևանի «Արարատում», նույնպես գնահատվում է 400 հազար եվրո, բայց սա 25-ամյա կոտդիվուարցու համար բարելավում է․ նախկինում նրա տրանսֆերային արժեքը 350 հազար եվրո էր։
7-րդ տեղում հայտնվել է «Փյունիկի» կենտրոնական պաշտպան Անտոն Բրատկովը։ 27-ամյա ուկրաինացի ֆուտբոլիստի տրանսֆերային արժեքը նվազել է՝ 400 հազար եվրոյից հասնելով 350 հազարի։
8-րդ տեղում կրկին «Արարատ-Արմենիայի» ներկայացուցիչ է։ Եվ կրկին կենտրոնական պաշտպան։ Նա իսպանացի 24-ամյա Դավիդ Հումանեսն է, որի տրանսֆերային արժեքը վերջին ժամանակներս ստաբիլ կերպով գնահատվում է 350 հազար եվրո։
9-րդ տեղում «Ալաշկերտի» բրազիլացի աջ պաշտպան Տիագո Կամետան է։ 28-ամյա ֆուտբոլիստը ևս ստաբիլ գնահատվում է 350 հազար եվրո։
Իսկ լավագույն տասնյակը եզրափակում է «Փյունիկի» աջ պաշտպան Մագոմեդ Մուսալովը։ 27-ամյա ռուս ֆուտբոլիստի արժեքը գնահատվում է 350 հազար եվրո՝ նախկին 500 հազարի փոխարեն։
Ինչպես տեսաք՝ Հայաստանի առաջնության ամենաթանկարժեք ֆուտբոլիստների տասնյակում հայ ֆուտբոլիստների անունները բացակայում են։ Իսկ թե ովքեր են մեր առաջնության ամենաթանկարժեք հայ ֆուտբոլիստները, ծանոթացեք ստորև․
1․Ալեքսանդր Կարապետյան «Արարատ-Արմենիա»-300 հազար եվրո
2.ժորդի Արարատ «Նոա»-300 հազար եվրո
3․Ալիկ Առաքելյան «Փյունիկ»- 300 հազար եվրո
4․Տարոն Ոսկանյան «Ալաշկերտ»-300 հազար եվրո
5․Պետրոս Ավետիսյան «Նոա»-300 հազար եվրո
6․Դավիդ Դավիդյան «Ալաշկերտ»-300 հազար եվրո
7․Ռումյան Հովսեփյան «Ալաշկերտ» -250 հազար եվրո
8․Արմեն Համբարձումյան «Արարատ-Արմենիա»-250 հազար եվրո
9․Հակոբ Հակոբյան «Ուրարտու»-250 հազար եվրո
10.Կարեն Մուրադյան «Արարատ»-225 հազար եվրո