ՀՖՖ նախագահ Արմեն Մելիքբեկյանը Առաջին Ալիքի եթերում Պետրոս Ղազարյանին տված հարցազրույցի ժամանակ անդրադարձել է «Լոռիի» սեփականատեր Թովմաս Գրիգորյանի՝ ArmSport-ի հետ զրույցում հնչեցրած այն մտքին, որ ՀՖՖ-ն գաղտնի 100 միլիոն դրամ է տվել «Ալաշկերտին»։
««Լոռիի» սեփականատերն ասել է, որ ֆեդերացիան 100 միլիոն դրամ աջակցություն է տվել ակումբներից մեկին և հիմա պաշտպանում է այդ ակումբին։ Բացարձակապես անհեթեթ բան է, որովհետև «Լոռիի» սեփականատերը դեռ օգոստոսին ինձ դիմել էր փոխառնության խնդրանքով և մյուս ակումբի՝ «Ալաշկերտի» սեփականատերն էլ։ Երկուսն էլ գիտեին, որ փոխառության համար, քանի որ «Լոռիի» սեփականատերն ասել էր, որ հայաստանյան բիզնեսներ են, որոնք քովիդի պատճառով տուժում են, հետո եկավ պատերազմը, եկավ «Ալաշկերտից» նամակ․ մենք հնարավորություն չունեինք պատերազմի ընթացքում փոխառություն տալու երկու ակումբներին, որովհետև ինքներս էլ խնդիրներ ունեինք ֆինանսական․ մենք խաղում էինք դրսում, սեփական հարկի տակ խաղեր չկային։ Հետագայում արդեն այդ փոխառության գումարի համար եկավ «Ալաշկերտը», իսկ «Լոռին» այլևս չեկավ, չնայած մեր տնօրենն առաջարկել էր «Լոռիին», որ իրենց սեփականատերը զանգի ինձ ու վերջնական խոսի փոխառության պայմանների մասին։ Եվ ասեմ, որ փոխառությունն «Ալաշկերտին» տրվեց, ինչպես բազմիցս եղել է Հայաստանի ֆուտբոլի ֆեդերացիայի պատմության մեջ»,- ասել է ՀՖՖ նախագահը։
-Այսինքն, դուք պատրաստ էիք նաև «Լոռիի՞ն» տալ։
-Ոչ թե պատրաստ էինք, այլ «Լոռիի» հետ այդ խոսակցությունն առարկայական եղել է, անձամբ ես խոսել եմ։ Մենք որոշեցինք, որ ՀՖՖ-ն չի կարող ռիսկի գնալ ու ուղղակի փոխառություն տալ ակումբին նման պայմաններում և անձնական գույքի պատասխանատվությամբ «Ալաշկերտի» նախագահը պայմանագիր ստորագրեց և եթե ֆեդերացիան այդ գումարը հետ չստանա, իրավունք կունենա տնօրինելու «Նաիրի» ստադիոնը։ Այսինքն, շատ պարզ է։
Ինչ վերաբերում է այն մանիպուլիացիաներին, թե ֆեդերացիայի նախագահը թաքուն է դա արել, նման բան չի եղել, «Լոռիի» սեփականատերն իմացել է այդ զրույցների մասին, փոխառության զրույցների մասին, որովհետև ինքն էլ է խոսել, իմացել է, որ «Ալաշկերտն» էլ է խոսել։ Եվ բացի այդ, ամեն ինչ արվել է ըստ կանոնադրության, համաձայն որի, ֆեդերացիայի նախագահը բացառիկ իրավունք ունի գործարքներ կատարել այդ գումարի չափով և ավելի գումարի չափով։ Այսինքն, սա ուղղակի աջակցություն է թիմերին և այդ աջակցությունը բոլոր թիմերին տարբեր ձևերով տրվում է և տրվել է ֆուտբոլի ֆեդերացիայի կողմից։