Շնորհակալություն տղաներ, դուք հիասքանչ էիք

Հայաստանի հավաքականն ԱԱ-2022-ի որակավորման փուլը պարզապես ֆանտաստիկ է սկսել՝ 3 խաղից հետո ցուցադրելով 100 տոկոսանոց արդյունք և 9 միավորով գլխավորելով J խմբի մրցաշարային աղյուսակը՝ իր հետևում թողնելով Հյուսիսային Մակեդոնիայի, Գերմանիայի, Ռումինիայի, Իսլանդիայի և Լիխտենշտեյնի հավաքականներին:

Ֆանտաստիկ Կապառոսն ու նրա հաղթական շարքը

Իսպանացի մասնագետն արդեն մեկ տարուց փոքր-ինչ ավելի է գլխավորում մեր ընտրանին: Նրա գլխավորությամբ Հայաստանի հավաքականը 9 հանդիպում է անցկացրել և պարտվել է միայն մեկում՝ Մակեդոնիային (1-2)՝ մարզչի նորամուտի խաղում: Դրանից հետո Հայաստանի հավաքականն արդեն 8 խաղ է՝ չի պարտվում, իսկ վերջին 5-ում առհասարակ հաղթանակներ է տարել: Այս ընթացքում, ինչպես հիշում եք, Հայաստանի հավաքականը հաղթեց Ազգերի լիգայի իր խմբում՝ սկիզբ դնելով մի նոր փառահեղ ժամանակաշրջանի:

Հավաքականի ֆուտբոլիստները բազմիցս նշել են, որ Խոակին Կապառոսի հետ իրենք ավելի շատ են սկսել հավատալ սեփական ուժերին, և դա իսկապես ակնհայտ է: Տղաները պայքարում են ամեն միլիմետրի, ամեն գնդակի համար՝ մինչև վերջ, հավատում են, որ իրենք չեն զիջում որևէ մեկին և դեռ կարող են ավելին:

Հավաքականի ղեկը ստանձնելով պանդեմիայի օրերին՝ Խոակին Կապառոսը մի շարք խնդիրների բախվեց, քանի որ նախատեսված ընկերական խաղերը հետաձգվեցին, իսպանացի մասնագետի նորամուտը հետաձգվեց ու նա, ամիսներ շարունակ հանդիսանալով հավաքականի գլխավոր մարզիչը, հնարավորություն չուներ գոնե մեկ խաղ անցկացնելու ու ֆուտբոլիստների հետ ծանոթանալու: Ավելին, Կապառոսի առջև նաև հավաքականի հեղինակությունը վերականգնելու խնդիր էր դրված, քանի որ նրա օրոք թիմն առաջին խաղը պետք է անցկացներ Իտալիայից կրած 1-9 հաշվով խայտառակ պարտությունից հետո:

Այսպիսով, Կապառոսը լծվեց հավաքականի վերակազմավորման գործին. այդ հարցում մեծ դեր խաղաց նոր օրենքը, ըստ որի ՌՊԼ-ում ազգությամբ հայ ֆուտբոլիստներն այլևս չեն համարվում լեգիոներներ: Այդպես, հավաքականն իր կողմը գրավեց Խորեն Բայրամյանին, Արշակ Կորյանին, Էդուարդ Սպերցյանին և դարպասապահ Դավիդ Յուրչենկոյին:

Այս ընթացքում մենք ականատես եղանք նաև ֆուտբոլիստների նատուրալիզացման. հավաքական հրավիրվեցին կոլումբացի Վբեյմար Անգուլոն և նիգերիացի Սոլոմոն Ուդոն: Շրջանառվեց նաև հայկական արմատներով արգենտինացի հարձակվող Լուկաս Զելարայանի անունը:

Առաջատար Բարսեղյանն ու Յուրչենկոյի տպավորիչ ռեկորդները

Հայաստանի ազգային հավաքականում խաղից խաղ իր բարձր որակներն է դրսևորում կիսապաշտպան Տիգրան Բարսեղյանը, որին արդեն անկասկած կարելի է համարել մեր ընտրանու առաջատարներից մեկը: Տիգրանը խաղից խաղ ավելի վստահ ելույթներ է ունենում ու կարողանում է եղանակ ստեղծել դաշտում:

Հավաքականի նշանակալի ձեռքբերումներից է նաև Խորեն Բայրամյանը, որն արդեն կարծես լիովին ընդգրկվել է Կապառոսի ֆուտբոլային փիլիսոփայության և գաղափարների շրջանակում:

Մեր ընտրանու դարպասում խաղից խաղ ավելի հուսալի է գործում 34-ամյա դարպասապահ Դավիդ Յուրչենկոն: Վերջինս արդեն գերազանցել է հավաքականի լեգենդար դարպասապահ Ռոման Բերեզովսկիի ռեկորդը՝ «չոր» խաղերի քանակով: Յուրչենկոն 357 րոպե է դարպասն անառիկ պահել, իսկ Բերեզովսկին՝ 282:

Կապառոսը, որը հայտնի է երիտասարդ տաղանդներին բացահայտելու ֆանտաստիկ ունակությամբ, այս առումով արդեն քայլեր ձեռնարկել է նաև Հայաստանի հավաքականում: Իսպանացի մասնագետը դեռևս միայն երեք երիտասարդ խաղացողի է հավաքականում հանդես գալու շանս տվել. Վահան Բիչախչյանը 6 անգամ փոխարինման է մտել ու դարձել մեկ գոլային փոխանցման հեղինակ, Էդուարդ Սպերցյանը Ռումինիայի հետ խաղի երկրորդ կեսում է դուրս եկել խաղադաշտ ու իր նորամուտի խաղում դարձել գոլի հեղինակ, իսկ Ժիրայր Շաղոյանը երկու անգամ փոխարինման է մտել ու բավականին հասուն ու վստահ խաղ ցուցադրել: Կապառոսը մշտապես նշում է, որ պարբերաբար դիմում է ռոտացիայի ու պատրաստ է երիտասարդներին շանս տալ՝ խաղային պրակտիկա ձեռք բերելու համար:

Մխիթարյանն՝ անգերազանցելի ավագ, բայց սովորում ենք նաև նրա բացակայությանը

Վերջին խաղերն իսկական փորձություն էին Կապառոսի թիմի համար. Հայաստանի հավաքականը, որին շատ դեպքերում իր հետևից տանում էր թիմի ավագ Հենրիխ Մխիթարյանը, ստիպված էր անչափ կարևոր խաղեր անցկացնել նրա բացակայության պայմաններում: Հավաքականի ֆուտբոլիստները պետք է ապացուցեին, որ կարողանում են նաև պատասխանատվությունն իրենց վրա վերցնել, բնավորություն ցույց տալ ու հասնել ցանկալի արդյունքի:

Մխիթարյանն, իհարկե, շարունակում է մնալ մեր թիմի անգերազանցելի առաջատարն ու բոլոր ժամանակների լավագույն ռմբարկուն, ու մերոնք, անկասկած, նրա հետ շատ ավելի ուժեղ կլինեն:

Բայց , վերջին աննախադեպ հաջողությունները մեր ընտրանին գրանցեց առանց Մխիթարյանի, ու նաև առանց մյուս առաջատարի՝ Գևորգ Ղազարյանի … փոխարենը, հավաքականի ավագի պարտականությունները փայլուն կերպով կատարեց թիմի հնաբնակներից մեկը՝ Վարազդատ Հարոյանը, ով նաև անչափ կարևոր գոլի հեղինակ դարձավ Ռումինիայի հետ երեկ կայացած խաղում:

Մի փոքր ժպիտ այս դժվարին օրերին

Հավաքականի ֆուտբոլիստները միաբերան նշում էին՝ իրենց համար մեծ երջանկություն է, որ կարողանում են մի փոքր ժպիտ և ուրախություն պարգևել մեր ազգին այս դժվարին ժամանակահատվածում: Եվ իսկապես, թերևս միայն հավաքականի նման փառահեղ ելույթները կարող էին մեզ մի քանի ժամով կտրել մեր երկրի առջև ծառացած դժվարին խնդիրներից ու հետպատերազմյան այս ծանր ժամանակներից:

Տևական դադարից հետո վերջապես հավաքականի տնային խաղին ներկա երկրպագուներն ու բազմահազար հանդիսականները՝ հեռուստաէկրանների առջև, անկասկած, կարողացան իրենց ամբողջ դրական էներգիան փոխանցել մեր ֆուտբոլիստներին ու վայելել այդքան սպասված հաղթանակների բերկրանքը:

Այդուհանդերձ, սա Կատար-2022-ի ճանապարհի դեռ սկիզբն է միայն. առջևում մեզ երկու խաղ է սպասվում Գերմանիայի, արտագնա խաղեր Ռումինիայի, Հս. Մակեդոնիայի և Իսլանդիայի հավաքականների հետ: Ամեն ինչ կորոշվի աշնանը, իսկ մինչ այդ պարզապես կարելի է վայելել այս պահն ու աղյուսակի նման դասավորությունը 🙂